Study
- Anukramaṇī
- Source
12 vamro vaikhānasaḥ| indraḥ| triṣṭup|
kaṃ na̍ści̱trami̍ṣaṇyasi ciki̱tvānpṛ̍thu̱gmāna̍ṃ vā̱śraṃ vā̍vṛ̱dhadhyai̍ |
kattasya̱ dātu̱ śava̍so̱ vyu̍ṣṭau̱ takṣa̱dvajra̍ṃ vṛtra̱tura̱mapi̍nvat
||1||कं न॑श्चि॒त्रमि॑षण्यसि चिकि॒त्वान्पृ॑थु॒ग्मानं॑ वा॒श्रं वा॑वृ॒धध्यै॑ ।
कत्तस्य॒ दातु॒ शव॑सो॒ व्यु॑ष्टौ॒ तक्ष॒द्वज्रं॑ वृत्र॒तुर॒मपि॑न्वत्
sa hi dyu̱tā vi̱dyutā̱ veti̱ sāma̍ pṛ̱thuṃ yoni̍masura̱tvā sa̍sāda |
sa sanī̍l̤ebhiḥ prasahā̱no a̍sya̱ bhrātu̱rna ṛ̱te sa̱ptatha̍sya mā̱yāḥ
||2||स हि द्यु॒ता वि॒द्युता॒ वेति॒ साम॑ पृ॒थुं योनि॑मसुर॒त्वा स॑साद ।
स सनी॑ळेभिः प्रसहा॒नो अ॑स्य॒ भ्रातु॒र्न ऋ॒ते स॒प्तथ॑स्य मा॒याः
sa vāja̱ṃ yātāpa̍duṣpadā̱ yantsva̍rṣātā̱ pari̍ ṣadatsani̱ṣyan |
a̱na̱rvā yaccha̱tadu̍rasya̱ vedo̱ ghnañchi̱śnade̍vām̐ a̱bhi varpa̍sā̱ bhūt
||3||स वाजं॒ याताप॑दुष्पदा॒ यन्त्स्व॑र्षाता॒ परि॑ षदत्सनि॒ष्यन् ।
अ॒न॒र्वा यच्छ॒तदु॑रस्य॒ वेदो॒ घ्नञ्छि॒श्नदे॑वाँ अ॒भि वर्प॑सा॒ भूत्
sa ya̱hvyo̱3'vanī̱rgoṣvarvā ''ju̍hoti pradha̱nyā̍su̱ sasri̍: |
a̱pādo̱ yatra̱ yujyā̍so'ra̱thā dro̱ṇya̍śvāsa̱ īra̍te ghṛ̱taṃ vāḥ
||4||स य॒ह्व्यो॒३ऽवनी॒र्गोष्वर्वा ऽऽजु॑होति प्रध॒न्या॑सु॒ सस्रि॑: ।
अ॒पादो॒ यत्र॒ युज्या॑सोऽर॒था द्रो॒ण्य॑श्वास॒ ईर॑ते घृ॒तं वाः
sa ru̱drebhi̱raśa̍stavāra̱ ṛbhvā̍ hi̱tvī gaya̍mā̱rea̍vadya̱ āgā̍t |
va̱mrasya̍ manye mithu̱nā viva̍vrī̱ anna̍ma̱bhītyā̍rodayanmuṣā̱yan
||5||स रु॒द्रेभि॒रश॑स्तवार॒ ऋभ्वा॑ हि॒त्वी गय॑मा॒रेअ॑वद्य॒ आगा॑त् ।
व॒म्रस्य॑ मन्ये मिथु॒ना विव॑व्री॒ अन्न॑म॒भीत्या॑रोदयन्मुषा॒यन्
sa iddāsa̍ṃ tuvī̱rava̱ṃ pati̱rdanṣa̍l̤a̱kṣaṃ tri̍śī̱rṣāṇa̍ṃ damanyat |
a̱sya tri̱to nvoja̍sā vṛdhā̱no vi̱pā va̍rā̱hamayo̍agrayā han
||6||स इद्दासं॑ तुवी॒रवं॒ पति॒र्दन्ष॑ळ॒क्षं त्रि॑शी॒र्षाणं॑ दमन्यत् ।
अ॒स्य त्रि॒तो न्वोज॑सा वृधा॒नो वि॒पा व॑रा॒हमयो॑अग्रया हन्
sa druhva̍ṇe̱ manu̍ṣa ūrdhvasā̱na ā sā̍viṣadarśasā̱nāya̱ śaru̍m |
sa nṛta̍mo̱ nahu̍ṣo̱'smatsujā̍ta̱: puro̍'bhina̱darha̍ndasyu̱hatye̍
||7||स द्रुह्व॑णे॒ मनु॑ष ऊर्ध्वसा॒न आ सा॑विषदर्शसा॒नाय॒ शरु॑म् ।
स नृत॑मो॒ नहु॑षो॒ऽस्मत्सुजा॑त॒: पुरो॑ऽभिन॒दर्ह॑न्दस्यु॒हत्ये॑
so a̱bhriyo̱ na yava̍sa uda̱nyankṣayā̍ya gā̱tuṃ vi̱danno̍ a̱sme |
upa̱ yatsīda̱dindu̱ṃ śarī̍raiḥ śye̱no'yo̍pāṣṭirhanti̱ dasyū̍n
||8||सो अ॒भ्रियो॒ न यव॑स उद॒न्यन्क्षया॑य गा॒तुं वि॒दन्नो॑ अ॒स्मे ।
उप॒ यत्सीद॒दिन्दुं॒ शरी॑रैः श्ये॒नोऽयो॑पाष्टिर्हन्ति॒ दस्यू॑न्
sa vrādha̍taḥ śavasā̱nebhi̍rasya̱ kutsā̍ya̱ śuṣṇa̍ṃ kṛ̱paṇe̱ parā̍dāt |
a̱yaṃ ka̱vima̍nayaccha̱syamā̍na̱matka̱ṃ yo a̍sya̱ sani̍to̱ta nṛ̱ṇām
||9||स व्राध॑तः शवसा॒नेभि॑रस्य॒ कुत्सा॑य॒ शुष्णं॑ कृ॒पणे॒ परा॑दात् ।
अ॒यं क॒विम॑नयच्छ॒स्यमा॑न॒मत्कं॒ यो अ॑स्य॒ सनि॑तो॒त नृ॒णाम्
a̱yaṃ da̍śa̱syannarye̍bhirasya da̱smo de̱vebhi̱rvaru̍ṇo̱ na mā̱yī |
a̱yaṃ ka̱nīna̍ ṛtu̱pā a̍ve̱dyami̍mītā̱raru̱ṃ yaścatu̍ṣpāt
||10||अ॒यं द॑श॒स्यन्नर्ये॑भिरस्य द॒स्मो दे॒वेभि॒र्वरु॑णो॒ न मा॒यी ।
अ॒यं क॒नीन॑ ऋतु॒पा अ॑वे॒द्यमि॑मीता॒ररुं॒ यश्चतु॑ष्पात्
a̱sya stome̍bhirauśi̱ja ṛ̱jiśvā̍ vra̱jaṃ da̍rayadvṛṣa̱bheṇa̱ pipro̍: |
sutvā̱ yadya̍ja̱to dī̱daya̱dgīḥ pura̍ iyā̱no a̱bhi varpa̍sā̱ bhūt
||11||अ॒स्य स्तोमे॑भिरौशि॒ज ऋ॒जिश्वा॑ व्र॒जं द॑रयद्वृष॒भेण॒ पिप्रो॑: ।
सुत्वा॒ यद्य॑ज॒तो दी॒दय॒द्गीः पुर॑ इया॒नो अ॒भि वर्प॑सा॒ भूत्
e̱vā ma̱ho a̍sura va̱kṣathā̍ya vamra̱kaḥ pa̱ḍbhirupa̍ sarpa̱dindra̍m |
sa i̍yā̱naḥ ka̍rati sva̱stima̍smā̱ iṣa̱mūrja̍ṃ sukṣi̱tiṃ viśva̱mābhā̍:
||12||ए॒वा म॒हो अ॑सुर व॒क्षथा॑य वम्र॒कः प॒ड्भिरुप॑ सर्प॒दिन्द्र॑म् ।
स इ॑या॒नः क॑रति स्व॒स्तिम॑स्मा॒ इष॒मूर्जं॑ सुक्षि॒तिं विश्व॒माभा॑: