Study
- Anukramaṇī
- Source
6 brāhmo rakṣohā| rakṣohā| anuṣṭup|
brahma̍ṇā̱gniḥ sa̍ṃvidā̱no ra̍kṣo̱hā bā̍dhatāmi̱taḥ | amī̍vā̱ yaste̱ garbha̍ṃ du̱rṇāmā̱ yoni̍mā̱śaye̍
||1||ब्रह्म॑णा॒ग्निः सं॑विदा॒नो र॑क्षो॒हा बा॑धतामि॒तः । अमी॑वा॒ यस्ते॒ गर्भं॑ दु॒र्णामा॒ योनि॑मा॒शये॑
yaste̱ garbha̱mamī̍vā du̱rṇāmā̱ yoni̍mā̱śaye̍ | a̱gniṣṭaṃ brahma̍ṇā sa̱ha niṣkra̱vyāda̍manīnaśat
||2||यस्ते॒ गर्भ॒ममी॑वा दु॒र्णामा॒ योनि॑मा॒शये॑ । अ॒ग्निष्टं ब्रह्म॑णा स॒ह निष्क्र॒व्याद॑मनीनशत्
yaste̱ hanti̍ pa̱taya̍ntaṃ niṣa̱tsnuṃ yaḥ sa̍rīsṛ̱pam | jā̱taṃ yaste̱ jighā̍ṃsati̱ tami̱to nā̍śayāmasi
||3||यस्ते॒ हन्ति॑ प॒तय॑न्तं निष॒त्स्नुं यः स॑रीसृ॒पम् । जा॒तं यस्ते॒ जिघां॑सति॒ तमि॒तो ना॑शयामसि
yasta̍ ū̱rū vi̱hara̍tyanta̱rā dampa̍tī̱ śaye̍ | yoni̱ṃ yo a̱ntarā̱rel̤hi̱ tami̱to nā̍śayāmasi
||4||यस्त॑ ऊ॒रू वि॒हर॑त्यन्त॒रा दम्प॑ती॒ शये॑ । योनिं॒ यो अ॒न्तरा॒रेळ्हि॒ तमि॒तो ना॑शयामसि
yastvā̱ bhrātā̱ pati̍rbhū̱tvā jā̱ro bhū̱tvā ni̱padya̍te | pra̱jāṃ yaste̱ jighā̍ṃsati̱ tami̱to nā̍śayāmasi
||5||यस्त्वा॒ भ्राता॒ पति॑र्भू॒त्वा जा॒रो भू॒त्वा नि॒पद्य॑ते । प्र॒जां यस्ते॒ जिघां॑सति॒ तमि॒तो ना॑शयामसि
yastvā̱ svapne̍na̱ tama̍sā mohayi̱tvā ni̱padya̍te | pra̱jāṃ yaste̱ jighā̍ṃsati̱ tami̱to nā̍śayāmasi
||6||यस्त्वा॒ स्वप्ने॑न॒ तम॑सा मोहयि॒त्वा नि॒पद्य॑ते । प्र॒जां यस्ते॒ जिघां॑सति॒ तमि॒तो ना॑शयामसि