Study
- Anukramaṇī
- Source
10 aindro vimadaḥ prājāpatyo vā, vāsukro vasukṛdvā| agniḥ| gāyatrī, 1 ekapadā virāṭ (eṣa mantra: śāntyarthaḥ) 2anuṣṭup,9 virāṭ 10 triṣṭup|
bha̱draṃ no̱ api̍ vātaya̱ mana̍:
||1||भ॒द्रं नो॒ अपि॑ वातय॒ मन॑:
a̱gnimī̍l̤e bhu̱jāṃ yavi̍ṣṭhaṃ śā̱sā mi̱traṃ du̱rdharī̍tum | yasya̱ dharma̱ntsva1renī̍: sapa̱ryanti̍ mā̱turūdha̍:
||2||अ॒ग्निमी॑ळे भु॒जां यवि॑ष्ठं शा॒सा मि॒त्रं दु॒र्धरी॑तुम् । यस्य॒ धर्म॒न्त्स्व१रेनी॑: सप॒र्यन्ति॑ मा॒तुरूध॑:
yamā̱sā kṛ̱panī̍l̤aṃ bhā̱sāke̍tuṃ va̱rdhaya̍nti | bhrāja̍te̱ śreṇi̍dan
||3||यमा॒सा कृ॒पनी॑ळं भा॒साके॑तुं व॒र्धय॑न्ति । भ्राज॑ते॒ श्रेणि॑दन्
a̱ryo vi̱śāṃ gā̱ture̍ti̱ pra yadāna̍ḍdi̱vo antā̍n | ka̱vira̱bhraṃ dīdyā̍naḥ
||4||अ॒र्यो वि॒शां गा॒तुरे॑ति॒ प्र यदान॑ड्दि॒वो अन्ता॑न् । क॒विर॒भ्रं दीद्या॑नः
ju̱ṣaddha̱vyā mānu̍ṣasyo̱rdhvasta̍sthā̱vṛbhvā̍ ya̱jñe | mi̱nvantsadma̍ pu̱ra e̍ti
||5||जु॒षद्ध॒व्या मानु॑षस्यो॒र्ध्वस्त॑स्था॒वृभ्वा॑ य॒ज्ञे । मि॒न्वन्त्सद्म॑ पु॒र ए॑ति
sa hi kṣemo̍ ha̱virya̱jñaḥ śru̱ṣṭīda̍sya gā̱ture̍ti | a̱gniṃ de̱vā vāśī̍mantam
||6||स हि क्षेमो॑ ह॒विर्य॒ज्ञः श्रु॒ष्टीद॑स्य गा॒तुरे॑ति । अ॒ग्निं दे॒वा वाशी॑मन्तम्
ya̱jñā̱sāha̱ṃ duva̍ iṣe̱'gniṃ pūrva̍sya̱ śeva̍sya | adre̍: sū̱numā̱yumā̍huḥ
||7||य॒ज्ञा॒साहं॒ दुव॑ इषे॒ऽग्निं पूर्व॑स्य॒ शेव॑स्य । अद्रे॑: सू॒नुमा॒युमा॑हुः
naro̱ ye ke cā̱smadā viśvette vā̱ma ā syu̍: | a̱gniṃ ha̱viṣā̱ vardha̍ntaḥ
||8||नरो॒ ये के चा॒स्मदा विश्वेत्ते वा॒म आ स्यु॑: । अ॒ग्निं ह॒विषा॒ वर्ध॑न्तः
kṛ̱ṣṇaḥ śve̱to̍'ru̱ṣo yāmo̍ asya bra̱dhna ṛ̱jra u̱ta śoṇo̱ yaśa̍svān | hira̍ṇyarūpa̱ṃ jani̍tā jajāna
||9||कृ॒ष्णः श्वे॒तो॑ऽरु॒षो यामो॑ अस्य ब्र॒ध्न ऋ॒ज्र उ॒त शोणो॒ यश॑स्वान् । हिर॑ण्यरूपं॒ जनि॑ता जजान
e̱vā te̍ agne vima̱do ma̍nī̱ṣāmūrjo̍ napāda̱mṛte̍bhiḥ sa̱joṣā̍: |
gira̱ ā va̍kṣatsuma̱tīri̍yā̱na iṣa̱mūrja̍ṃ sukṣi̱tiṃ viśva̱mābhā̍:
||10||ए॒वा ते॑ अग्ने विम॒दो म॑नी॒षामूर्जो॑ नपाद॒मृते॑भिः स॒जोषा॑: ।
गिर॒ आ व॑क्षत्सुम॒तीरि॑या॒न इष॒मूर्जं॑ सुक्षि॒तिं विश्व॒माभा॑: