Study
- Anukramaṇī
- Source
6 bṛhaduktho vāmadevyaḥ| indraḥ| triṣṭup|
tāṃ su te̍ kī̱rtiṃ ma̍ghavanmahi̱tvā yattvā̍ bhī̱te roda̍sī̱ ahva̍yetām |
prāvo̍ de̱vām̐ āti̍ro̱ dāsa̱moja̍: pra̱jāyai̍ tvasyai̱ yadaśi̍kṣa indra
||1||तां सु ते॑ की॒र्तिं म॑घवन्महि॒त्वा यत्त्वा॑ भी॒ते रोद॑सी॒ अह्व॑येताम् ।
प्रावो॑ दे॒वाँ आति॑रो॒ दास॒मोज॑: प्र॒जायै॑ त्वस्यै॒ यदशि॑क्ष इन्द्र
yadaca̍rasta̱nvā̍ vāvṛdhā̱no balā̍nīndra prabruvā̱ṇo jane̍ṣu |
mā̱yetsā te̱ yāni̍ yu̱ddhānyā̱hurnādya śatru̍ṃ na̱nu pu̱rā vi̍vitse
||2||यदच॑रस्त॒न्वा॑ वावृधा॒नो बला॑नीन्द्र प्रब्रुवा॒णो जने॑षु ।
मा॒येत्सा ते॒ यानि॑ यु॒द्धान्या॒हुर्नाद्य शत्रुं॑ न॒नु पु॒रा वि॑वित्से
ka u̱ nu te̍ mahi̱mana̍: samasyā̱'smatpūrva̱ ṛṣa̱yo'nta̍māpuḥ |
yanmā̱tara̍ṃ ca pi̱tara̍ṃ ca sā̱kamaja̍nayathāsta̱nva1: svāyā̍:
||3||क उ॒ नु ते॑ महि॒मन॑: समस्या॒ऽस्मत्पूर्व॒ ऋष॒योऽन्त॑मापुः ।
यन्मा॒तरं॑ च पि॒तरं॑ च सा॒कमज॑नयथास्त॒न्व१: स्वाया॑:
ca̱tvāri̍ te asu̱ryā̍ṇi̱ nāmā'dā̍bhyāni mahi̱ṣasya̍ santi |
tvama̱ṅga tāni̱ viśvā̍ni vitse̱ yebhi̱: karmā̍ṇi maghavañca̱kartha̍
||4||च॒त्वारि॑ ते असु॒र्या॑णि॒ नामाऽदा॑भ्यानि महि॒षस्य॑ सन्ति ।
त्वम॒ङ्ग तानि॒ विश्वा॑नि वित्से॒ येभि॒: कर्मा॑णि मघवञ्च॒कर्थ॑
tvaṃ viśvā̍ dadhiṣe̱ keva̍lāni̱ yānyā̱viryā ca̱ guhā̱ vasū̍ni |
kāma̱minme̍ maghava̱nmā vi tā̍rī̱stvamā̍jñā̱tā tvami̍ndrāsi dā̱tā
||5||त्वं विश्वा॑ दधिषे॒ केव॑लानि॒ यान्या॒विर्या च॒ गुहा॒ वसू॑नि ।
काम॒मिन्मे॑ मघव॒न्मा वि ता॑री॒स्त्वमा॑ज्ञा॒ता त्वमि॑न्द्रासि दा॒ता
yo ada̍dhā̱jjyoti̍ṣi̱ jyoti̍ra̱ntaryo asṛ̍ja̱nmadhu̍nā̱ saṃ madhū̍ni |
adha̍ pri̱yaṃ śū̱ṣamindrā̍ya̱ manma̍ brahma̱kṛto̍ bṛ̱hadu̍kthādavāci
||6||यो अद॑धा॒ज्ज्योति॑षि॒ ज्योति॑र॒न्तर्यो असृ॑ज॒न्मधु॑ना॒ सं मधू॑नि ।
अध॑ प्रि॒यं शू॒षमिन्द्रा॑य॒ मन्म॑ ब्रह्म॒कृतो॑ बृ॒हदु॑क्थादवाचि