Study
- Anukramaṇī
- Source
8 veno bhārgavaḥ| venaḥ| triṣṭup|
a̱yaṃ ve̱naśco̍daya̱tpṛśni̍garbhā̱ jyoti̍rjarāyū̱ raja̍so vi̱māne̍ |
i̱mama̱pāṃ sa̍ṃga̱me sūrya̍sya̱ śiśu̱ṃ na viprā̍ ma̱tibhī̍ rihanti
||1||अ॒यं वे॒नश्चो॑दय॒त्पृश्नि॑गर्भा॒ ज्योति॑र्जरायू॒ रज॑सो वि॒माने॑ ।
इ॒मम॒पां सं॑ग॒मे सूर्य॑स्य॒ शिशुं॒ न विप्रा॑ म॒तिभी॑ रिहन्ति
sa̱mu̱drādū̱rmimudi̍yarti ve̱no na̍bho̱jāḥ pṛ̱ṣṭhaṃ ha̍rya̱tasya̍ darśi |
ṛ̱tasya̱ sānā̱vadhi̍ vi̱ṣṭapi̱ bhrāṭ sa̍mā̱naṃ yoni̍ma̱bhya̍nūṣata̱ vrāḥ
||2||स॒मु॒द्रादू॒र्मिमुदि॑यर्ति वे॒नो न॑भो॒जाः पृ॒ष्ठं ह॑र्य॒तस्य॑ दर्शि ।
ऋ॒तस्य॒ साना॒वधि॑ वि॒ष्टपि॒ भ्राट् स॑मा॒नं योनि॑म॒भ्य॑नूषत॒ व्राः
sa̱mā̱naṃ pū̱rvīra̱bhi vā̍vaśā̱nāstiṣṭha̍nva̱tsasya̍ mā̱tara̱: sanī̍l̤āḥ |
ṛ̱tasya̱ sānā̱vadhi̍ cakramā̱ṇā ri̱hanti̱ madhvo̍ a̱mṛta̍sya̱ vāṇī̍:
||3||स॒मा॒नं पू॒र्वीर॒भि वा॑वशा॒नास्तिष्ठ॑न्व॒त्सस्य॑ मा॒तर॒: सनी॑ळाः ।
ऋ॒तस्य॒ साना॒वधि॑ चक्रमा॒णा रि॒हन्ति॒ मध्वो॑ अ॒मृत॑स्य॒ वाणी॑:
jā̱nanto̍ rū̱pama̍kṛpanta̱ viprā̍ mṛ̱gasya̱ ghoṣa̍ṃ mahi̱ṣasya̱ hi gman |
ṛ̱tena̱ yanto̱ adhi̱ sindhu̍masthurvi̱dadga̍ndha̱rvo a̱mṛtā̍ni̱ nāma̍
||4||जा॒नन्तो॑ रू॒पम॑कृपन्त॒ विप्रा॑ मृ॒गस्य॒ घोषं॑ महि॒षस्य॒ हि ग्मन् ।
ऋ॒तेन॒ यन्तो॒ अधि॒ सिन्धु॑मस्थुर्वि॒दद्ग॑न्ध॒र्वो अ॒मृता॑नि॒ नाम॑
a̱psa̱rā jā̱ramu̍pasiṣmiyā̱ṇā yoṣā̍ bibharti para̱me vyo̍man |
cara̍tpri̱yasya̱ yoni̍ṣu pri̱yaḥ santsīda̍tpa̱kṣe hi̍ra̱ṇyaye̱ sa ve̱naḥ
||5||अ॒प्स॒रा जा॒रमु॑पसिष्मिया॒णा योषा॑ बिभर्ति पर॒मे व्यो॑मन् ।
चर॑त्प्रि॒यस्य॒ योनि॑षु प्रि॒यः सन्त्सीद॑त्प॒क्षे हि॑र॒ण्यये॒ स वे॒नः
nāke̍ supa̱rṇamupa̱ yatpata̍ntaṃ hṛ̱dā vena̍nto a̱bhyaca̍kṣata tvā |
hira̍ṇyapakṣa̱ṃ varu̍ṇasya dū̱taṃ ya̱masya̱ yonau̍ śaku̱naṃ bhu̍ra̱ṇyum
||6||नाके॑ सुप॒र्णमुप॒ यत्पत॑न्तं हृ॒दा वेन॑न्तो अ॒भ्यच॑क्षत त्वा ।
हिर॑ण्यपक्षं॒ वरु॑णस्य दू॒तं य॒मस्य॒ योनौ॑ शकु॒नं भु॑र॒ण्युम्
ū̱rdhvo ga̍ndha̱rvo adhi̱ nāke̍ asthātpra̱tyaṅci̱trā bibhra̍da̱syāyu̍dhāni |
vasā̍no̱ atka̍ṃ sura̱bhiṃ dṛ̱śe kaṃ sva1rṇa nāma̍ janata pri̱yāṇi̍
||7||ऊ॒र्ध्वो ग॑न्ध॒र्वो अधि॒ नाके॑ अस्थात्प्र॒त्यङ्चि॒त्रा बिभ्र॑द॒स्यायु॑धानि ।
वसा॑नो॒ अत्कं॑ सुर॒भिं दृ॒शे कं स्व१र्ण नाम॑ जनत प्रि॒याणि॑
dra̱psaḥ sa̍mu̱drama̱bhi yajjigā̍ti̱ paśya̱ngṛdhra̍sya̱ cakṣa̍sā̱ vidha̍rman |
bhā̱nuḥ śu̱kreṇa̍ śo̱ciṣā̍ cakā̱nastṛ̱tīye̍ cakre̱ raja̍si pri̱yāṇi̍
||8||द्र॒प्सः स॑मु॒द्रम॒भि यज्जिगा॑ति॒ पश्य॒न्गृध्र॑स्य॒ चक्ष॑सा॒ विध॑र्मन् ।
भा॒नुः शु॒क्रेण॑ शो॒चिषा॑ चका॒नस्तृ॒तीये॑ चक्रे॒ रज॑सि प्रि॒याणि॑