Study
- Anukramaṇī
- Source
10 vatsaprirbhālandanaḥ| agniḥ| triṣṭup|
pra hotā̍ jā̱to ma̱hānna̍bho̱vinnṛ̱ṣadvā̍ sīdada̱pāmu̱pasthe̍ |
dadhi̱ryo dhāyi̱ sa te̱ vayā̍ṃsi ya̱ntā vasū̍ni vidha̱te ta̍nū̱pāḥ
||1||प्र होता॑ जा॒तो म॒हान्न॑भो॒विन्नृ॒षद्वा॑ सीदद॒पामु॒पस्थे॑ ।
दधि॒र्यो धायि॒ स ते॒ वयां॑सि य॒न्ता वसू॑नि विध॒ते त॑नू॒पाः
i̱maṃ vi̱dhanto̍ a̱pāṃ sa̱dhasthe̍ pa̱śuṃ na na̱ṣṭaṃ pa̱dairanu̍ gman |
guhā̱ cata̍ntamu̱śijo̱ namo̍bhiri̱cchanto̱ dhīrā̱ bhṛga̍vo'vindan
||2||इ॒मं वि॒धन्तो॑ अ॒पां स॒धस्थे॑ प॒शुं न न॒ष्टं प॒दैरनु॑ ग्मन् ।
गुहा॒ चत॑न्तमु॒शिजो॒ नमो॑भिरि॒च्छन्तो॒ धीरा॒ भृग॑वोऽविन्दन्
i̱maṃ tri̱to bhūrya̍vindadi̱cchanvai̍bhūva̱so mū̱rdhanyaghnyā̍yāḥ |
sa śevṛ̍dho jā̱ta ā ha̱rmyeṣu̱ nābhi̱ryuvā̍ bhavati roca̱nasya̍
||3||इ॒मं त्रि॒तो भूर्य॑विन्ददि॒च्छन्वै॑भूव॒सो मू॒र्धन्यघ्न्या॑याः ।
स शेवृ॑धो जा॒त आ ह॒र्म्येषु॒ नाभि॒र्युवा॑ भवति रोच॒नस्य॑
ma̱ndraṃ hotā̍ramu̱śijo̱ namo̍bhi̱: prāñca̍ṃ ya̱jñaṃ ne̱tāra̍madhva̱rāṇā̍m |
vi̱śāma̍kṛṇvannara̱tiṃ pā̍va̱kaṃ ha̍vya̱vāha̱ṃ dadha̍to̱ mānu̍ṣeṣu
||4||म॒न्द्रं होता॑रमु॒शिजो॒ नमो॑भि॒: प्राञ्चं॑ य॒ज्ञं ने॒तार॑मध्व॒राणा॑म् ।
वि॒शाम॑कृण्वन्नर॒तिं पा॑व॒कं ह॑व्य॒वाहं॒ दध॑तो॒ मानु॑षेषु
pra bhū̱rjaya̍ntaṃ ma̱hāṃ vi̍po̱dhāṃ mū̱rā amū̍raṃ pu̱rāṃ da̱rmāṇa̍m |
naya̍nto̱ garbha̍ṃ va̱nāṃ dhiya̍ṃ dhu̱rhiri̍śmaśru̱ṃ nārvā̍ṇa̱ṃ dhana̍rcam
||5||प्र भू॒र्जय॑न्तं म॒हां वि॑पो॒धां मू॒रा अमू॑रं पु॒रां द॒र्माण॑म् ।
नय॑न्तो॒ गर्भं॑ व॒नां धियं॑ धु॒र्हिरि॑श्मश्रुं॒ नार्वा॑णं॒ धन॑र्चम्
ni pa̱styā̍su tri̱taḥ sta̍bhū̱yanpari̍vīto̱ yonau̍ sīdada̱ntaḥ |
ata̍: sa̱ṃgṛbhyā̍ vi̱śāṃ damū̍nā̱ vidha̍rmaṇāya̱ntrairī̍yate̱ nṝn
||6||नि प॒स्त्या॑सु त्रि॒तः स्त॑भू॒यन्परि॑वीतो॒ योनौ॑ सीदद॒न्तः ।
अत॑: सं॒गृभ्या॑ वि॒शां दमू॑ना॒ विध॑र्मणाय॒न्त्रैरी॑यते॒ नॄन्
a̱syājarā̍so da̱māma̱ritrā̍ a̱rcaddhū̍māso a̱gnaya̍: pāva̱kāḥ |
śvi̱tī̱caya̍: śvā̱trāso̍ bhura̱ṇyavo̍ vana̱rṣado̍ vā̱yavo̱ na somā̍:
||7||अ॒स्याजरा॑सो द॒माम॒रित्रा॑ अ॒र्चद्धू॑मासो अ॒ग्नय॑: पाव॒काः ।
श्वि॒ती॒चय॑: श्वा॒त्रासो॑ भुर॒ण्यवो॑ वन॒र्षदो॑ वा॒यवो॒ न सोमा॑:
pra ji̱hvayā̍ bharate̱ vepo̍ a̱gniḥ pra va̱yunā̍ni̱ ceta̍sā pṛthi̱vyāḥ |
tamā̱yava̍: śu̱caya̍ntaṃ pāva̱kaṃ ma̱ndraṃ hotā̍raṃ dadhire̱ yaji̍ṣṭham
||8||प्र जि॒ह्वया॑ भरते॒ वेपो॑ अ॒ग्निः प्र व॒युना॑नि॒ चेत॑सा पृथि॒व्याः ।
तमा॒यव॑: शु॒चय॑न्तं पाव॒कं म॒न्द्रं होता॑रं दधिरे॒ यजि॑ष्ठम्
dyāvā̱ yama̱gniṃ pṛ̍thi̱vī jani̍ṣṭā̱māpa̱stvaṣṭā̱ bhṛga̍vo̱ yaṃ saho̍bhiḥ |
ī̱l̤enya̍ṃ pratha̱maṃ mā̍ta̱riśvā̍ de̱vāsta̍takṣu̱rmana̍ve̱ yaja̍tram
||9||द्यावा॒ यम॒ग्निं पृ॑थि॒वी जनि॑ष्टा॒माप॒स्त्वष्टा॒ भृग॑वो॒ यं सहो॑भिः ।
ई॒ळेन्यं॑ प्रथ॒मं मा॑त॒रिश्वा॑ दे॒वास्त॑तक्षु॒र्मन॑वे॒ यज॑त्रम्
yaṃ tvā̍ de̱vā da̍dhi̱re ha̍vya̱vāha̍ṃ puru̱spṛho̱ mānu̍ṣāso̱ yaja̍tram |
sa yāma̍nnagne stuva̱te vayo̍ dhā̱: pra de̍va̱yanya̱śasa̱: saṃ hi pū̱rvīḥ
||10||यं त्वा॑ दे॒वा द॑धि॒रे ह॑व्य॒वाहं॑ पुरु॒स्पृहो॒ मानु॑षासो॒ यज॑त्रम् ।
स याम॑न्नग्ने स्तुव॒ते वयो॑ धा॒: प्र दे॑व॒यन्य॒शस॒: सं हि पू॒र्वीः