Sūktam 32 — pra (9 mantras) — Śākala Saṃhitā (Ṛgveda)

Study

pra su gmantā̍ dhiyasā̱nasya̍ sa̱kṣaṇi̍ va̱rebhi̍rva̱rām̐ a̱bhi ṣu pra̱sīda̍taḥ |

a̱smāka̱mindra̍ u̱bhaya̍ṃ jujoṣati̱ yatso̱myasyāndha̍so̱ bubo̍dhati

||1||

प्र सु ग्मन्ता॑ धियसा॒नस्य॑ स॒क्षणि॑ व॒रेभि॑र्व॒राँ अ॒भि षु प्र॒सीद॑तः ।

अ॒स्माक॒मिन्द्र॑ उ॒भयं॑ जुजोषति॒ यत्सो॒म्यस्यान्ध॑सो॒ बुबो॑धति

vī̍ndra yāsi di̱vyāni̍ roca̱nā vi pārthi̍vāni̱ raja̍sā puruṣṭuta |

ye tvā̱ vaha̍nti̱ muhu̍radhva̱rām̐ upa̱ te su va̍nvantu vagva̱nām̐ a̍rā̱dhasa̍:

||2||

वी॑न्द्र यासि दि॒व्यानि॑ रोच॒ना वि पार्थि॑वानि॒ रज॑सा पुरुष्टुत ।

ये त्वा॒ वह॑न्ति॒ मुहु॑रध्व॒राँ उप॒ ते सु व॑न्वन्तु वग्व॒नाँ अ॑रा॒धस॑:

tadinme̍ chantsa̱dvapu̍ṣo̱ vapu̍ṣṭaraṃ pu̱tro yajjāna̍ṃ pi̱trora̱dhīya̍ti |

jā̱yā pati̍ṃ vahati va̱gnunā̍ su̱matpu̱ṃsa idbha̱dro va̍ha̱tuḥ pari̍ṣkṛtaḥ

||3||

तदिन्मे॑ छन्त्स॒द्वपु॑षो॒ वपु॑ष्टरं पु॒त्रो यज्जानं॑ पि॒त्रोर॒धीय॑ति ।

जा॒या पतिं॑ वहति व॒ग्नुना॑ सु॒मत्पुं॒स इद्भ॒द्रो व॑ह॒तुः परि॑ष्कृतः

taditsa̱dhastha̍ma̱bhi cāru̍ dīdhaya̱ gāvo̱ yacchāsa̍nvaha̱tuṃ na dhe̱nava̍: |

mā̱tā yanmantu̍ryū̱thasya̍ pū̱rvyā'bhi vā̱ṇasya̍ sa̱ptadhā̍tu̱rijjana̍:

||4||

तदित्स॒धस्थ॑म॒भि चारु॑ दीधय॒ गावो॒ यच्छास॑न्वह॒तुं न धे॒नव॑: ।

मा॒ता यन्मन्तु॑र्यू॒थस्य॑ पू॒र्व्याऽभि वा॒णस्य॑ स॒प्तधा॑तु॒रिज्जन॑:

pra vo'cchā̍ ririce deva̱yuṣpa̱dameko̍ ru̱drebhi̍ryāti tu̱rvaṇi̍: |

ja̱rā vā̱ yeṣva̱mṛte̍ṣu dā̱vane̱ pari̍ va̱ ūme̍bhyaḥ siñcatā̱ madhu̍

||5||

प्र वोऽच्छा॑ रिरिचे देव॒युष्प॒दमेको॑ रु॒द्रेभि॑र्याति तु॒र्वणि॑: ।

ज॒रा वा॒ येष्व॒मृते॑षु दा॒वने॒ परि॑ व॒ ऊमे॑भ्यः सिञ्चता॒ मधु॑

ni̱dhī̱yamā̍na̱mapa̍gūl̤hama̱psu pra me̍ de̱vānā̍ṃ vrata̱pā u̍vāca |

indro̍ vi̱dvām̐ anu̱ hi tvā̍ ca̱cakṣa̱ tenā̱hama̍gne̱ anu̍śiṣṭa̱ āgā̍m

||6||

नि॒धी॒यमा॑न॒मप॑गूळ्हम॒प्सु प्र मे॑ दे॒वानां॑ व्रत॒पा उ॑वाच ।

इन्द्रो॑ वि॒द्वाँ अनु॒ हि त्वा॑ च॒चक्ष॒ तेना॒हम॑ग्ने॒ अनु॑शिष्ट॒ आगा॑म्

akṣe̍travitkṣetra̱vida̱ṃ hyaprā̱ṭ sa praiti̍ kṣetra̱vidānu̍śiṣṭaḥ |

e̱tadvai bha̱drama̍nu̱śāsa̍nasyo̱ta sru̱tiṃ vi̍ndatyañja̱sīnā̍m

||7||

अक्षे॑त्रवित्क्षेत्र॒विदं॒ ह्यप्रा॒ट् स प्रैति॑ क्षेत्र॒विदानु॑शिष्टः ।

ए॒तद्वै भ॒द्रम॑नु॒शास॑नस्यो॒त स्रु॒तिं वि॑न्दत्यञ्ज॒सीना॑म्

a̱dyedu̱ prāṇī̱dama̍manni̱māhā'pī̍vṛto adhayanmā̱turūdha̍: |

eme̍namāpa jari̱mā yuvā̍na̱mahe̍l̤a̱nvasu̍: su̱manā̍ babhūva

||8||

अ॒द्येदु॒ प्राणी॒दम॑मन्नि॒माहाऽपी॑वृतो अधयन्मा॒तुरूध॑: ।

एमे॑नमाप जरि॒मा युवा॑न॒महे॑ळ॒न्वसु॑: सु॒मना॑ बभूव

e̱tāni̍ bha̱drā ka̍laśa kriyāma̱ kuru̍śravaṇa̱ dada̍to ma̱ghāni̍ |

dā̱na idvo̍ maghavāna̱: so a̍stva̱yaṃ ca̱ somo̍ hṛ̱di yaṃ bibha̍rmi

||9||

ए॒तानि॑ भ॒द्रा क॑लश क्रियाम॒ कुरु॑श्रवण॒ दद॑तो म॒घानि॑ ।

दा॒न इद्वो॑ मघवान॒: सो अ॑स्त्व॒यं च॒ सोमो॑ हृ॒दि यं बिभ॑र्मि