Study
- Anukramaṇī
- Source
7 bṛhaduktho vāmadevyaḥ| viśvedevāḥ| triṣṭup| 4-6 jagatī|
i̱daṃ ta̱ eka̍ṃ pa̱ra ū̍ ta̱ eka̍ṃ tṛ̱tīye̍na̱ jyoti̍ṣā̱ saṃ vi̍śasva |
sa̱ṃveśa̍ne ta̱nva1ścāru̍redhi pri̱yo de̱vānā̍ṃ para̱me ja̱nitre̍
||1||इ॒दं त॒ एकं॑ प॒र ऊ॑ त॒ एकं॑ तृ॒तीये॑न॒ ज्योति॑षा॒ सं वि॑शस्व ।
सं॒वेश॑ने त॒न्व१श्चारु॑रेधि प्रि॒यो दे॒वानां॑ पर॒मे ज॒नित्रे॑
ta̱nūṣṭe̍ vājinta̱nvaṃ1 naya̍ntī vā̱mama̱smabhya̱ṃ dhātu̱ śarma̱ tubhya̍m |
ahru̍to ma̱ho dha̱ruṇā̍ya de̱vāndi̱vī̍va̱ jyoti̱: svamā mi̍mīyāḥ
||2||त॒नूष्टे॑ वाजिन्त॒न्वं१ नय॑न्ती वा॒मम॒स्मभ्यं॒ धातु॒ शर्म॒ तुभ्य॑म् ।
अह्रु॑तो म॒हो ध॒रुणा॑य दे॒वान्दि॒वी॑व॒ ज्योति॒: स्वमा मि॑मीयाः
vā̱jya̍si̱ vāji̍nenā suve̱nīḥ su̍vi̱taḥ stoma̍ṃ suvi̱to diva̍ṃ gāḥ |
su̱vi̱to dharma̍ pratha̱mānu̍ sa̱tyā su̍vi̱to de̱vāntsu̍vi̱to'nu̱ patma̍
||3||वा॒ज्य॑सि॒ वाजि॑नेना सुवे॒नीः सु॑वि॒तः स्तोमं॑ सुवि॒तो दिवं॑ गाः ।
सु॒वि॒तो धर्म॑ प्रथ॒मानु॑ स॒त्या सु॑वि॒तो दे॒वान्त्सु॑वि॒तोऽनु॒ पत्म॑
ma̱hi̱mna e̍ṣāṃ pi̱tara̍śca̱neśi̍re de̱vā de̱veṣva̍dadhu̱rapi̱ kratu̍m |
sama̍vivyacuru̱ta yānyatvi̍ṣu̱raiṣā̍ṃ ta̱nūṣu̱ ni vi̍viśu̱: puna̍:
||4||म॒हि॒म्न ए॑षां पि॒तर॑श्च॒नेशि॑रे दे॒वा दे॒वेष्व॑दधु॒रपि॒ क्रतु॑म् ।
सम॑विव्यचुरु॒त यान्यत्वि॑षु॒रैषां॑ त॒नूषु॒ नि वि॑विशु॒: पुन॑:
saho̍bhi̱rviśva̱ṃ pari̍ cakramū̱ raja̱: pūrvā̱ dhāmā̱nyami̍tā̱ mimā̍nāḥ |
ta̱nūṣu̱ viśvā̱ bhuva̍nā̱ ni ye̍mire̱ prāsā̍rayanta puru̱dha pra̱jā anu̍
||5||सहो॑भि॒र्विश्वं॒ परि॑ चक्रमू॒ रज॒: पूर्वा॒ धामा॒न्यमि॑ता॒ मिमा॑नाः ।
त॒नूषु॒ विश्वा॒ भुव॑ना॒ नि ये॑मिरे॒ प्रासा॑रयन्त पुरु॒ध प्र॒जा अनु॑
dvidhā̍ sū̱navo'su̍raṃ sva̱rvida̱māsthā̍payanta tṛ̱tīye̍na̱ karma̍ṇā |
svāṃ pra̱jāṃ pi̱tara̱: pitrya̱ṃ saha̱ āva̍reṣvadadhu̱stantu̱māta̍tam
||6||द्विधा॑ सू॒नवोऽसु॑रं स्व॒र्विद॒मास्था॑पयन्त तृ॒तीये॑न॒ कर्म॑णा ।
स्वां प्र॒जां पि॒तर॒: पित्र्यं॒ सह॒ आव॑रेष्वदधु॒स्तन्तु॒मात॑तम्
nā̱vā na kṣoda̍: pra̱diśa̍: pṛthi̱vyāḥ sva̱stibhi̱rati̍ du̱rgāṇi̱ viśvā̍ |
svāṃ pra̱jāṃ bṛ̱hadu̍ktho mahi̱tvā''va̍reṣvadadhā̱dā pare̍ṣu
||7||ना॒वा न क्षोद॑: प्र॒दिश॑: पृथि॒व्याः स्व॒स्तिभि॒रति॑ दु॒र्गाणि॒ विश्वा॑ ।
स्वां प्र॒जां बृ॒हदु॑क्थो महि॒त्वाऽऽव॑रेष्वदधा॒दा परे॑षु