Study
- Anukramaṇī
- Source
4 viśvāmitra-jamadagnī| indraḥ, 3 soma-varuṇa-bṛhaspati-anumati-maghavat-dhātṛ-vidhātāraḥ| jagatī |
tubhye̱dami̍ndra̱ pari̍ ṣicyate̱ madhu̱ tvaṃ su̱tasya̍ ka̱laśa̍sya rājasi |
tvaṃ ra̱yiṃ pu̍ru̱vīrā̍mu naskṛdhi̱ tvaṃ tapa̍: pari̱tapyā̍jaya̱: sva̍:
||1||तुभ्ये॒दमि॑न्द्र॒ परि॑ षिच्यते॒ मधु॒ त्वं सु॒तस्य॑ क॒लश॑स्य राजसि ।
त्वं र॒यिं पु॑रु॒वीरा॑मु नस्कृधि॒ त्वं तप॑: परि॒तप्या॑जय॒: स्व॑:
sva̱rjita̱ṃ mahi̍ mandā̱namandha̍so̱ havā̍mahe̱ pari̍ śa̱kraṃ su̱tām̐ upa̍ |
i̱maṃ no̍ ya̱jñami̱ha bo̱dhyā ga̍hi̱ spṛdho̱ jaya̍ntaṃ ma̱ghavā̍namīmahe
||2||स्व॒र्जितं॒ महि॑ मन्दा॒नमन्ध॑सो॒ हवा॑महे॒ परि॑ श॒क्रं सु॒ताँ उप॑ ।
इ॒मं नो॑ य॒ज्ञमि॒ह बो॒ध्या ग॑हि॒ स्पृधो॒ जय॑न्तं म॒घवा॑नमीमहे
soma̍sya̱ rājño̱ varu̍ṇasya̱ dharma̍ṇi̱ bṛha̱spate̱ranu̍matyā u̱ śarma̍ṇi |
tavā̱hama̱dya ma̍ghava̱nnupa̍stutau̱ dhāta̱rvidhā̍taḥ ka̱laśā̍m̐ abhakṣayam
||3||सोम॑स्य॒ राज्ञो॒ वरु॑णस्य॒ धर्म॑णि॒ बृह॒स्पते॒रनु॑मत्या उ॒ शर्म॑णि ।
तवा॒हम॒द्य म॑घव॒न्नुप॑स्तुतौ॒ धात॒र्विधा॑तः क॒लशाँ॑ अभक्षयम्
prasū̍to bha̱kṣama̍karaṃ ca̱rāvapi̱ stoma̍ṃ ce̱maṃ pra̍tha̱maḥ sū̱rirunmṛ̍je |
su̱te sā̱tena̱ yadyāga̍maṃ vā̱ṃ prati̍ viśvāmitrajamadagnī̱ dame̍
||4||प्रसू॑तो भ॒क्षम॑करं च॒रावपि॒ स्तोमं॑ चे॒मं प्र॑थ॒मः सू॒रिरुन्मृ॑जे ।
सु॒ते सा॒तेन॒ यद्याग॑मं वां॒ प्रति॑ विश्वामित्रजमदग्नी॒ दमे॑