Study
- Anukramaṇī
- Source
9 sthauro'gniyutaḥ sthauro'gniyūpo vā|indraḥ triṣṭup|
pibā̱ soma̍ṃ maha̱ta i̍ndri̱yāya̱ pibā̍ vṛ̱trāya̱ hanta̍ve śaviṣṭha |
piba̍ rā̱ye śava̍se hū̱yamā̍na̱: piba̱ madhva̍stṛ̱padi̱ndrā vṛ̍ṣasva
||1||पिबा॒ सोमं॑ मह॒त इ॑न्द्रि॒याय॒ पिबा॑ वृ॒त्राय॒ हन्त॑वे शविष्ठ ।
पिब॑ रा॒ये शव॑से हू॒यमा॑न॒: पिब॒ मध्व॑स्तृ॒पदि॒न्द्रा वृ॑षस्व
a̱sya pi̍ba kṣu̱mata̱: prasthi̍ta̱syendra̱ soma̍sya̱ vara̱mā su̱tasya̍ |
sva̱sti̱dā mana̍sā mādayasvā'rvācī̱no re̱vate̱ saubha̍gāya
||2||अ॒स्य पि॑ब क्षु॒मत॒: प्रस्थि॑त॒स्येन्द्र॒ सोम॑स्य॒ वर॒मा सु॒तस्य॑ ।
स्व॒स्ति॒दा मन॑सा मादयस्वाऽर्वाची॒नो रे॒वते॒ सौभ॑गाय
ma̱mattu̍ tvā di̱vyaḥ soma̍ indra ma̱mattu̱ yaḥ sū̱yate̱ pārthi̍veṣu |
ma̱mattu̱ yena̱ vari̍vaśca̱kartha̍ ma̱mattu̱ yena̍ niri̱ṇāsi̱ śatrū̍n
||3||म॒मत्तु॑ त्वा दि॒व्यः सोम॑ इन्द्र म॒मत्तु॒ यः सू॒यते॒ पार्थि॑वेषु ।
म॒मत्तु॒ येन॒ वरि॑वश्च॒कर्थ॑ म॒मत्तु॒ येन॑ निरि॒णासि॒ शत्रू॑न्
ā dvi̱barhā̍ ami̱no yā̱tvindro̱ vṛṣā̱ hari̍bhyā̱ṃ pari̍ṣikta̱mandha̍: |
gavyā su̱tasya̱ prabhṛ̍tasya̱ madhva̍: sa̱trā khedā̍maruśa̱hā vṛ̍ṣasva
||4||आ द्वि॒बर्हा॑ अमि॒नो या॒त्विन्द्रो॒ वृषा॒ हरि॑भ्यां॒ परि॑षिक्त॒मन्ध॑: ।
गव्या सु॒तस्य॒ प्रभृ॑तस्य॒ मध्व॑: स॒त्रा खेदा॑मरुश॒हा वृ॑षस्व
ni ti̱gmāni̍ bhrā̱śaya̱nbhrāśyā̱nyava̍ sthi̱rā ta̍nuhi yātu̱jūnā̍m |
u̱grāya̍ te̱ saho̱ bala̍ṃ dadāmi pra̱tītyā̱ śatrū̍nviga̱deṣu̍ vṛśca
||5||नि ति॒ग्मानि॑ भ्रा॒शय॒न्भ्राश्या॒न्यव॑ स्थि॒रा त॑नुहि यातु॒जूना॑म् ।
उ॒ग्राय॑ ते॒ सहो॒ बलं॑ ददामि प्र॒तीत्या॒ शत्रू॑न्विग॒देषु॑ वृश्च
vya1rya i̍ndra tanuhi̱ śravā̱ṃsyoja̍: sthi̱reva̱ dhanva̍no̱'bhimā̍tīḥ |
a̱sma̱drya̍gvāvṛdhā̱naḥ saho̍bhi̱rani̍bhṛṣṭasta̱nva̍ṃ vāvṛdhasva
||6||व्य१र्य इ॑न्द्र तनुहि॒ श्रवां॒स्योज॑: स्थि॒रेव॒ धन्व॑नो॒ऽभिमा॑तीः ।
अ॒स्म॒द्र्य॑ग्वावृधा॒नः सहो॑भि॒रनि॑भृष्टस्त॒न्वं॑ वावृधस्व
i̱daṃ ha̱virma̍ghava̱ntubhya̍ṃ rā̱taṃ prati̍ samrā̱l̤ahṛ̍ṇāno gṛbhāya |
tubhya̍ṃ su̱to ma̍ghava̱ntubhya̍ṃ pa̱kvo̱3'ddhī̍ndra̱ piba̍ ca̱ prasthi̍tasya
||7||इ॒दं ह॒विर्म॑घव॒न्तुभ्यं॑ रा॒तं प्रति॑ सम्रा॒ळहृ॑णानो गृभाय ।
तुभ्यं॑ सु॒तो म॑घव॒न्तुभ्यं॑ प॒क्वो॒३ऽद्धी॑न्द्र॒ पिब॑ च॒ प्रस्थि॑तस्य
a̱ddhīdi̍ndra̱ prasthi̍te̱mā ha̱vīṃṣi̱ cano̍ dadhiṣva paca̱tota soma̍m |
praya̍svanta̱: prati̍ haryāmasi tvā sa̱tyāḥ sa̍ntu̱ yaja̍mānasya̱ kāmā̍:
||8||अ॒द्धीदि॑न्द्र॒ प्रस्थि॑ते॒मा ह॒वींषि॒ चनो॑ दधिष्व पच॒तोत सोम॑म् ।
प्रय॑स्वन्त॒: प्रति॑ हर्यामसि त्वा स॒त्याः स॑न्तु॒ यज॑मानस्य॒ कामा॑:
prendrā̱gnibhyā̍ṃ suvaca̱syāmi̍yarmi̱ sindhā̍viva̱ prera̍ya̱ṃ nāva̍ma̱rkaiḥ |
ayā̍ iva̱ pari̍ caranti de̱vā ye a̱smabhya̍ṃ dhana̱dā u̱dbhida̍śca
||9||प्रेन्द्रा॒ग्निभ्यां॑ सुवच॒स्यामि॑यर्मि॒ सिन्धा॑विव॒ प्रेर॑यं॒ नाव॑म॒र्कैः ।
अया॑ इव॒ परि॑ चरन्ति दे॒वा ये अ॒स्मभ्यं॑ धन॒दा उ॒द्भिद॑श्च