Study
- Anukramaṇī
- Source
9 aindro vimadaḥ, prājāpatyo vā, vāsukro vasukṛdvā|pūṣā| anuṣṭup ,1,4 uṣṇik|
pra hyacchā̍ manī̱ṣā spā̱rhā yanti̍ ni̱yuta̍: | pra da̱srā ni̱yudra̍thaḥ pū̱ṣā a̍viṣṭu̱ māhi̍naḥ
||1||प्र ह्यच्छा॑ मनी॒षा स्पा॒र्हा यन्ति॑ नि॒युत॑: । प्र द॒स्रा नि॒युद्र॑थः पू॒षा अ॑विष्टु॒ माहि॑नः
yasya̱ tyanma̍hi̱tvaṃ vā̱tāpya̍ma̱yaṃ jana̍: | vipra̱ ā va̍ṃsaddhī̱tibhi̱ścike̍ta suṣṭutī̱nām
||2||यस्य॒ त्यन्म॑हि॒त्वं वा॒ताप्य॑म॒यं जन॑: । विप्र॒ आ वं॑सद्धी॒तिभि॒श्चिके॑त सुष्टुती॒नाम्
sa ve̍da suṣṭutī̱nāmindu̱rna pū̱ṣā vṛṣā̍ | a̱bhi psura̍: pruṣāyati vra̱jaṃ na̱ ā pru̍ṣāyati
||3||स वे॑द सुष्टुती॒नामिन्दु॒र्न पू॒षा वृषा॑ । अ॒भि प्सुर॑: प्रुषायति व्र॒जं न॒ आ प्रु॑षायति
ma̱ṃsī̱mahi̍ tvā va̱yama̱smāka̍ṃ deva pūṣan | ma̱tī̱nāṃ ca̱ sādha̍na̱ṃ viprā̍ṇāṃ cādha̱vam
||4||मं॒सी॒महि॑ त्वा व॒यम॒स्माकं॑ देव पूषन् । म॒ती॒नां च॒ साध॑नं॒ विप्रा॑णां चाध॒वम्
pratya̍rdhirya̱jñānā̍maśvaha̱yo rathā̍nām | ṛṣi̱: sa yo manu̍rhito̱ vipra̍sya yāvayatsa̱khaḥ
||5||प्रत्य॑र्धिर्य॒ज्ञाना॑मश्वह॒यो रथा॑नाम् । ऋषि॒: स यो मनु॑र्हितो॒ विप्र॑स्य यावयत्स॒खः
ā̱dhīṣa̍māṇāyā̱: pati̍: śu̱cāyā̍śca śu̱casya̍ ca | vā̱so̱vā̱yo'vī̍nā̱mā vāsā̍ṃsi̱ marmṛ̍jat
||6||आ॒धीष॑माणाया॒: पति॑: शु॒चाया॑श्च शु॒चस्य॑ च । वा॒सो॒वा॒योऽवी॑ना॒मा वासां॑सि॒ मर्मृ॑जत्
i̱no vājā̍nā̱ṃ pati̍ri̱naḥ pu̍ṣṭī̱nāṃ sakhā̍ | pra śmaśru̍ harya̱to dū̍dho̱dvi vṛthā̱ yo adā̍bhyaḥ
||7||इ॒नो वाजा॑नां॒ पति॑रि॒नः पु॑ष्टी॒नां सखा॑ । प्र श्मश्रु॑ हर्य॒तो दू॑धो॒द्वि वृथा॒ यो अदा॑भ्यः
ā te̱ ratha̍sya pūṣanna̱jā dhura̍ṃ vavṛtyuḥ | viśva̍syā̱rthina̱: sakhā̍ sano̱jā ana̍pacyutaḥ
||8||आ ते॒ रथ॑स्य पूषन्न॒जा धुरं॑ ववृत्युः । विश्व॑स्या॒र्थिन॒: सखा॑ सनो॒जा अन॑पच्युतः
a̱smāka̍mū̱rjā ratha̍ṃ pū̱ṣā a̍viṣṭu̱ māhi̍naḥ | bhuva̱dvājā̍nāṃ vṛ̱dha i̱maṃ na̍: śṛṇava̱ddhava̍m
||9||अ॒स्माक॑मू॒र्जा रथं॑ पू॒षा अ॑विष्टु॒ माहि॑नः । भुव॒द्वाजा॑नां वृ॒ध इ॒मं न॑: शृणव॒द्धव॑म्