Study
- Anukramaṇī
- Source
11 kautso durmitraḥ sumitro vā| indraḥ| uṣṇik, 1 gāyatrī vā 2,7 pipīlikamadhyā, 11 triṣṭup |
ka̱dā va̍so sto̱traṃ harya̍ta̱ āva̍ śma̱śā ru̍dha̱dvāḥ | dī̱rghaṃ su̱taṃ vā̱tāpyā̍ya
||1||क॒दा व॑सो स्तो॒त्रं हर्य॑त॒ आव॑ श्म॒शा रु॑ध॒द्वाः । दी॒र्घं सु॒तं वा॒ताप्या॑य
harī̱ yasya̍ su̱yujā̱ vivra̍tā̱ verarva̱ntānu̱ śepā̍ | u̱bhā ra̱jī na ke̱śinā̱ pati̱rdan
||2||हरी॒ यस्य॑ सु॒युजा॒ विव्र॑ता॒ वेरर्व॒न्तानु॒ शेपा॑ । उ॒भा र॒जी न के॒शिना॒ पति॒र्दन्
apa̱ yorindra̱: pāpa̍ja̱ ā marto̱ na śa̍śramā̱ṇo bi̍bhī̱vān | śu̱bhe yadyu̍yu̱je tavi̍ṣīvān
||3||अप॒ योरिन्द्र॒: पाप॑ज॒ आ मर्तो॒ न श॑श्रमा॒णो बि॑भी॒वान् । शु॒भे यद्यु॑यु॒जे तवि॑षीवान्
sacā̱yorindra̱ścarkṛ̍ṣa̱ ām̐ u̍pāna̱saḥ sa̍pa̱ryan | na̱dayo̱rvivra̍tayo̱: śūra̱ indra̍:
||4||सचा॒योरिन्द्र॒श्चर्कृ॑ष॒ आँ उ॑पान॒सः स॑प॒र्यन् । न॒दयो॒र्विव्र॑तयो॒: शूर॒ इन्द्र॑:
adhi̱ yasta̱sthau keśa̍vantā̱ vyaca̍svantā̱ na pu̱ṣṭyai | va̱noti̱ śiprā̍bhyāṃ śi̱priṇī̍vān
||5||अधि॒ यस्त॒स्थौ केश॑वन्ता॒ व्यच॑स्वन्ता॒ न पु॒ष्ट्यै । व॒नोति॒ शिप्रा॑भ्यां शि॒प्रिणी॑वान्
prāstau̍dṛ̱ṣvaujā̍ ṛ̱ṣvebhi̍sta̱takṣa̱ śūra̱: śava̍sā | ṛ̱bhurna kratu̍bhirmāta̱riśvā̍
||6||प्रास्तौ॑दृ॒ष्वौजा॑ ऋ॒ष्वेभि॑स्त॒तक्ष॒ शूर॒: शव॑सा । ऋ॒भुर्न क्रतु॑भिर्मात॒रिश्वा॑
vajra̱ṃ yaśca̱kre su̱hanā̍ya̱ dasya̍ve hirīma̱śo hirī̍mān | aru̍tahanu̱radbhu̍ta̱ṃ na raja̍:
||7||वज्रं॒ यश्च॒क्रे सु॒हना॑य॒ दस्य॑वे हिरीम॒शो हिरी॑मान् । अरु॑तहनु॒रद्भु॑तं॒ न रज॑:
ava̍ no vṛji̱nā śi̍śīhyṛ̱cā va̍nemā̱nṛca̍: | nābra̍hmā ya̱jña ṛdha̱gjoṣa̍ti̱ tve
||8||अव॑ नो वृजि॒ना शि॑शीह्यृ॒चा व॑नेमा॒नृच॑: । नाब्र॑ह्मा य॒ज्ञ ऋध॒ग्जोष॑ति॒ त्वे
ū̱rdhvā yatte̍ tre̱tinī̱ bhūdya̱jñasya̍ dhū̱rṣu sadma̍n | sa̱jūrnāva̱ṃ svaya̍śasa̱ṃ sacā̱yoḥ
||9||ऊ॒र्ध्वा यत्ते॑ त्रे॒तिनी॒ भूद्य॒ज्ञस्य॑ धू॒र्षु सद्म॑न् । स॒जूर्नावं॒ स्वय॑शसं॒ सचा॒योः
śri̱ye te̱ pṛśni̍rupa̱seca̍nī bhūcchri̱ye darvi̍rare̱pāḥ | yayā̱ sve pātre̍ si̱ñcasa̱ ut
||10||श्रि॒ये ते॒ पृश्नि॑रुप॒सेच॑नी भूच्छ्रि॒ये दर्वि॑ररे॒पाः । यया॒ स्वे पात्रे॑ सि॒ञ्चस॒ उत्
śa̱taṃ vā̱ yada̍surya̱ prati̍ tvā sumi̱tra i̱tthāstau̍ddurmi̱tra i̱tthāstau̍t |
āvo̱ yadda̍syu̱hatye̍ kutsapu̱traṃ prāvo̱ yadda̍syu̱hatye̍ kutsava̱tsam
||11||श॒तं वा॒ यद॑सुर्य॒ प्रति॑ त्वा सुमि॒त्र इ॒त्थास्तौ॑द्दुर्मि॒त्र इ॒त्थास्तौ॑त् ।
आवो॒ यद्द॑स्यु॒हत्ये॑ कुत्सपु॒त्रं प्रावो॒ यद्द॑स्यु॒हत्ये॑ कुत्सव॒त्सम्