Study
- Anukramaṇī
- Source
6 aṃga auravaḥ|indraḥ| jagatī|
tava̱ tya i̍ndra sa̱khyeṣu̱ vahna̍ya ṛ̱taṃ ma̍nvā̱nā vya̍dardirurva̱lam |
yatrā̍ daśa̱syannu̱ṣaso̍ ri̱ṇanna̱paḥ kutsā̍ya̱ manma̍nna̱hya̍śca da̱ṃsaya̍:
||1||तव॒ त्य इ॑न्द्र स॒ख्येषु॒ वह्न॑य ऋ॒तं म॑न्वा॒ना व्य॑दर्दिरुर्व॒लम् ।
यत्रा॑ दश॒स्यन्नु॒षसो॑ रि॒णन्न॒पः कुत्सा॑य॒ मन्म॑न्न॒ह्य॑श्च दं॒सय॑:
avā̍sṛjaḥ pra̱sva̍: śva̱ñcayo̍ gi̱rīnudā̍ja u̱srā api̍bo̱ madhu̍ pri̱yam |
ava̍rdhayo va̱nino̍ asya̱ daṃsa̍sā śu̱śoca̱ sūrya̍ ṛ̱tajā̍tayā gi̱rā
||2||अवा॑सृजः प्र॒स्व॑: श्व॒ञ्चयो॑ गि॒रीनुदा॑ज उ॒स्रा अपि॑बो॒ मधु॑ प्रि॒यम् ।
अव॑र्धयो व॒निनो॑ अस्य॒ दंस॑सा शु॒शोच॒ सूर्य॑ ऋ॒तजा॑तया गि॒रा
vi sūryo̱ madhye̍ amuca̱dratha̍ṃ di̱vo vi̱daddā̱sāya̍ prati̱māna̱mārya̍: |
dṛ̱l̤hāni̱ pipro̱rasu̍rasya mā̱yina̱ indro̱ vyā̍syaccakṛ̱vām̐ ṛ̱jiśva̍nā
||3||वि सूर्यो॒ मध्ये॑ अमुच॒द्रथं॑ दि॒वो वि॒दद्दा॒साय॑ प्रति॒मान॒मार्य॑: ।
दृ॒ळ्हानि॒ पिप्रो॒रसु॑रस्य मा॒यिन॒ इन्द्रो॒ व्या॑स्यच्चकृ॒वाँ ऋ॒जिश्व॑ना
anā̍dhṛṣṭāni dhṛṣi̱to vyā̍syanni̱dhīm̐rade̍vām̐ amṛṇada̱yāsya̍: |
mā̱seva̱ sūryo̱ vasu̱ purya̱mā da̍de gṛṇā̱naḥ śatrū̍m̐raśṛṇādvi̱rukma̍tā
||4||अना॑धृष्टानि धृषि॒तो व्या॑स्यन्नि॒धीँरदे॑वाँ अमृणद॒यास्य॑: ।
मा॒सेव॒ सूर्यो॒ वसु॒ पुर्य॒मा द॑दे गृणा॒नः शत्रूँ॑रशृणाद्वि॒रुक्म॑ता
ayu̍ddhaseno vi̱bhvā̍ vibhinda̱tā dāśa̍dvṛtra̱hā tujyā̍ni tejate |
indra̍sya̱ vajrā̍dabibhedabhi̱śnatha̱: prākrā̍macchu̱ndhyūraja̍hādu̱ṣā ana̍:
||5||अयु॑द्धसेनो वि॒भ्वा॑ विभिन्द॒ता दाश॑द्वृत्र॒हा तुज्या॑नि तेजते ।
इन्द्र॑स्य॒ वज्रा॑दबिभेदभि॒श्नथ॒: प्राक्रा॑मच्छु॒न्ध्यूरज॑हादु॒षा अन॑:
e̱tā tyā te̱ śrutyā̍ni̱ keva̍lā̱ yadeka̱ eka̱makṛ̍ṇoraya̱jñam |
mā̱sāṃ vi̱dhāna̍madadhā̱ adhi̱ dyavi̱ tvayā̱ vibhi̍nnaṃ bharati pra̱dhiṃ pi̱tā
||6||ए॒ता त्या ते॒ श्रुत्या॑नि॒ केव॑ला॒ यदेक॒ एक॒मकृ॑णोरय॒ज्ञम् ।
मा॒सां वि॒धान॑मदधा॒ अधि॒ द्यवि॒ त्वया॒ विभि॑न्नं भरति प्र॒धिं पि॒ता