Study
- Anukramaṇī
- Source
9kavaṣa ailūṣaḥ| 1 viśvedevāḥ, 2-3 indraḥ, 4-5 kuruśravaṇastrāsadasyavaḥ, 6-9 upamaśravā maitrātithiḥ| 1 triṣṭup , pragāthaḥ = ( 2 bṛhatī, 3 satobṛhatī ),4-9 gāyatrī |
pra mā̍ yuyujre pra̱yujo̱ janā̍nā̱ṃ vahā̍mi sma pū̱ṣaṇa̱manta̍reṇa |
viśve̍ de̱vāso̱ adha̱ māma̍rakṣandu̱:śāsu̱rāgā̱diti̱ ghoṣa̍ āsīt
||1||प्र मा॑ युयुज्रे प्र॒युजो॒ जना॑नां॒ वहा॑मि स्म पू॒षण॒मन्त॑रेण ।
विश्वे॑ दे॒वासो॒ अध॒ माम॑रक्षन्दु॒:शासु॒रागा॒दिति॒ घोष॑ आसीत्
saṃ mā̍ tapantya̱bhita̍: sa̱patnī̍riva̱ parśa̍vaḥ | ni bā̍dhate̱ ama̍tirna̱gnatā̱ jasu̱rverna ve̍vīyate ma̱tiḥ
||2||सं मा॑ तपन्त्य॒भित॑: स॒पत्नी॑रिव॒ पर्श॑वः । नि बा॑धते॒ अम॑तिर्न॒ग्नता॒ जसु॒र्वेर्न वे॑वीयते म॒तिः
mūṣo̱ na śi̱śnā vya̍danti mā̱dhya̍ sto̱tāra̍ṃ te śatakrato | sa̱kṛtsu no̍ maghavannindra mṛl̤a̱yā'dhā̍ pi̱teva̍ no bhava
||3||मूषो॒ न शि॒श्ना व्य॑दन्ति मा॒ध्य॑ स्तो॒तारं॑ ते शतक्रतो । स॒कृत्सु नो॑ मघवन्निन्द्र मृळ॒याऽधा॑ पि॒तेव॑ नो भव
ku̱ru̱śrava̍ṇamāvṛṇi̱ rājā̍na̱ṃ trāsa̍dasyavam | maṃhi̍ṣṭhaṃ vā̱ghatā̱mṛṣi̍:
||4||कु॒रु॒श्रव॑णमावृणि॒ राजा॑नं॒ त्रास॑दस्यवम् । मंहि॑ष्ठं वा॒घता॒मृषि॑:
yasya̍ mā ha̱rito̱ rathe̍ ti̱sro vaha̍nti sādhu̱yā | stavai̍ sa̱hasra̍dakṣiṇe
||5||यस्य॑ मा ह॒रितो॒ रथे॑ ति॒स्रो वह॑न्ति साधु॒या । स्तवै॑ स॒हस्र॑दक्षिणे
yasya̱ prasvā̍daso̱ gira̍ upa̱maśra̍vasaḥ pi̱tuḥ | kṣetra̱ṃ na ra̱ṇvamū̱cuṣe̍
||6||यस्य॒ प्रस्वा॑दसो॒ गिर॑ उप॒मश्र॑वसः पि॒तुः । क्षेत्रं॒ न र॒ण्वमू॒चुषे॑
adhi̍ putropamaśravo̱ napā̍nmitrātitherihi | pi̱tuṣṭe̍ asmi vandi̱tā
||7||अधि॑ पुत्रोपमश्रवो॒ नपा॑न्मित्रातिथेरिहि । पि॒तुष्टे॑ अस्मि वन्दि॒ता
yadīśī̍yā̱mṛtā̍nāmu̱ta vā̱ martyā̍nām | jīve̱dinma̱ghavā̱ mama̍
||8||यदीशी॑या॒मृता॑नामु॒त वा॒ मर्त्या॑नाम् । जीवे॒दिन्म॒घवा॒ मम॑
na de̱vānā̱mati̍ vra̱taṃ śa̱tātmā̍ ca̱na jī̍vati | tathā̍ yu̱jā vi vā̍vṛte
||9||न दे॒वाना॒मति॑ व्र॒तं श॒तात्मा॑ च॒न जी॑वति । तथा॑ यु॒जा वि वा॑वृते