Study
- Anukramaṇī
- Source
9 urukṣaya āmahīyavaḥ| rakṣohā'gniḥ| gāyatrī|
agne̱ haṃsi̱ nya1triṇa̱ṃ dīdya̱nmartye̱ṣvā | sve kṣaye̍ śucivrata
||1||अग्ने॒ हंसि॒ न्य१त्रिणं॒ दीद्य॒न्मर्त्ये॒ष्वा । स्वे क्षये॑ शुचिव्रत
utti̍ṣṭhasi̱ svā̍huto ghṛ̱tāni̱ prati̍ modase | yattvā̱ sruca̍: sa̱masthi̍ran
||2||उत्ति॑ष्ठसि॒ स्वा॑हुतो घृ॒तानि॒ प्रति॑ मोदसे । यत्त्वा॒ स्रुच॑: स॒मस्थि॑रन्
sa āhu̍to̱ vi ro̍cate̱'gnirī̱l̤enyo̍ gi̱rā | sru̱cā pratī̍kamajyate
||3||स आहु॑तो॒ वि रो॑चते॒ऽग्निरी॒ळेन्यो॑ गि॒रा । स्रु॒चा प्रती॑कमज्यते
ghṛ̱tenā̱gniḥ sama̍jyate̱ madhu̍pratīka̱ āhu̍taḥ | roca̍māno vi̱bhāva̍suḥ
||4||घृ॒तेना॒ग्निः सम॑ज्यते॒ मधु॑प्रतीक॒ आहु॑तः । रोच॑मानो वि॒भाव॑सुः
jara̍māṇa̱: sami̍dhyase de̱vebhyo̍ havyavāhana | taṃ tvā̍ havanta̱ martyā̍:
||5||जर॑माण॒: समि॑ध्यसे दे॒वेभ्यो॑ हव्यवाहन । तं त्वा॑ हवन्त॒ मर्त्या॑:
taṃ ma̍rtā̱ ama̍rtyaṃ ghṛ̱tenā̱gniṃ sa̍paryata | adā̍bhyaṃ gṛ̱hapa̍tim
||6||तं म॑र्ता॒ अम॑र्त्यं घृ॒तेना॒ग्निं स॑पर्यत । अदा॑भ्यं गृ॒हप॑तिम्
adā̍bhyena śo̱ciṣā'gne̱ rakṣa̱stvaṃ da̍ha | go̱pā ṛ̱tasya̍ dīdihi
||7||अदा॑भ्येन शो॒चिषाऽग्ने॒ रक्ष॒स्त्वं द॑ह । गो॒पा ऋ॒तस्य॑ दीदिहि
sa tvama̍gne̱ pratī̍kena̱ pratyo̍ṣa yātudhā̱nya̍: | u̱ru̱kṣaye̍ṣu̱ dīdya̍t
||8||स त्वम॑ग्ने॒ प्रती॑केन॒ प्रत्यो॑ष यातुधा॒न्य॑: । उ॒रु॒क्षये॑षु॒ दीद्य॑त्
taṃ tvā̍ gī̱rbhiru̍ru̱kṣayā̍ havya̱vāha̱ṃ samī̍dhire | yaji̍ṣṭha̱ṃ mānu̍ṣe̱ jane̍
||9||तं त्वा॑ गी॒र्भिरु॑रु॒क्षया॑ हव्य॒वाहं॒ समी॑धिरे । यजि॑ष्ठं॒ मानु॑षे॒ जने॑