अध्ययनम्
- अनुक्रमणिका
- मूलम्
६ नृमेध-पुरुमेधावाङ्गिरसौ । इन्द्र: । १-४ प्रगाथ: = ( विषमा बृहती, समा सतोबृहती ) ।
आ नो॒ विश्वा॑सु॒ हव्य॒ इन्द्र॑: स॒मत्सु॑ भूषतु । उप॒ ब्रह्मा॑णि॒ सव॑नानि वृत्र॒हा प॑रम॒ज्या ऋची॑षमः
॥१॥ā no̱ viśvā̍su̱ havya̱ indra̍: sa̱matsu̍ bhūṣatu | upa̱ brahmā̍ṇi̱ sava̍nāni vṛtra̱hā pa̍rama̱jyā ṛcī̍ṣamaḥ
त्वं दा॒ता प्र॑थ॒मो राध॑साम॒स्यसि॑ स॒त्य ई॑शान॒कृत् । तु॒वि॒द्यु॒म्नस्य॒ युज्या वृ॑णीमहे पु॒त्रस्य॒ शव॑सो म॒हः
॥२॥tvaṃ dā̱tā pra̍tha̱mo rādha̍sāma̱syasi̍ sa̱tya ī̍śāna̱kṛt | tu̱vi̱dyu̱mnasya̱ yujyā vṛ̍ṇīmahe pu̱trasya̱ śava̍so ma̱haḥ
ब्रह्मा॑ त इन्द्र गिर्वणः क्रि॒यन्ते॒ अन॑तिद्भुता । इ॒मा जु॑षस्व हर्यश्व॒ योज॒नेन्द्र॒ या ते॒ अम॑न्महि
॥३॥brahmā̍ ta indra girvaṇaḥ kri̱yante̱ ana̍tidbhutā | i̱mā ju̍ṣasva haryaśva̱ yoja̱nendra̱ yā te̱ ama̍nmahi
त्वं हि स॒त्यो म॑घव॒न्नना॑नतो वृ॒त्रा भूरि॑ न्यृ॒ञ्जसे॑ । स त्वं श॑विष्ठ वज्रहस्त दा॒शुषे॒ऽर्वाञ्चं॑ र॒यिमा कृ॑धि
॥४॥tvaṃ hi sa̱tyo ma̍ghava̱nnanā̍nato vṛ̱trā bhūri̍ nyṛ̱ñjase̍ | sa tvaṃ śa̍viṣṭha vajrahasta dā̱śuṣe̱'rvāñca̍ṃ ra̱yimā kṛ̍dhi
त्वमि॑न्द्र य॒शा अ॑स्यृजी॒षी श॑वसस्पते । त्वं वृ॒त्राणि॑ हंस्यप्र॒तीन्येक॒ इदनु॑त्ता चर्षणी॒धृता॑
॥५॥tvami̍ndra ya̱śā a̍syṛjī̱ṣī śa̍vasaspate | tvaṃ vṛ̱trāṇi̍ haṃsyapra̱tīnyeka̱ idanu̍ttā carṣaṇī̱dhṛtā̍
तमु॑ त्वा नू॒नम॑सुर॒ प्रचे॑तसं॒ राधो॑ भा॒गमि॑वेमहे । म॒हीव॒ कृत्ति॑: शर॒णा त॑ इन्द्र॒ प्र ते॑ सु॒म्ना नो॑ अश्नवन्
॥६॥tamu̍ tvā nū̱nama̍sura̱ prace̍tasa̱ṃ rādho̍ bhā̱gami̍vemahe | ma̱hīva̱ kṛtti̍: śara̱ṇā ta̍ indra̱ pra te̍ su̱mnā no̍ aśnavan