अध्ययनम्
- अनुक्रमणिका
- मूलम्
१० एकद्यूर्नौधस: । इन्द्र:, १० देवा: । गायत्री, १० त्रिष्टुप् ।
न॒ह्य१न्यं ब॒ळाक॑रं मर्डि॒तारं॑ शतक्रतो । त्वं न॑ इन्द्र मृळय
॥१॥na̱hya1nyaṃ ba̱l̤āka̍raṃ marḍi̱tāra̍ṃ śatakrato | tvaṃ na̍ indra mṛl̤aya
यो न॒: शश्व॑त्पु॒रावि॒थाऽमृ॑ध्रो॒ वाज॑सातये । स त्वं न॑ इन्द्र मृळय
॥२॥yo na̱: śaśva̍tpu̱rāvi̱thā'mṛ̍dhro̱ vāja̍sātaye | sa tvaṃ na̍ indra mṛl̤aya
किम॒ङ्ग र॑ध्र॒चोद॑नः सुन्वा॒नस्या॑वि॒तेद॑सि । कु॒वित्स्वि॑न्द्र ण॒: शक॑:
॥३॥kima̱ṅga ra̍dhra̱coda̍naḥ sunvā̱nasyā̍vi̱teda̍si | ku̱vitsvi̍ndra ṇa̱: śaka̍:
इन्द्र॒ प्र णो॒ रथ॑मव प॒श्चाच्चि॒त्सन्त॑मद्रिवः । पु॒रस्ता॑देनं मे कृधि
॥४॥indra̱ pra ṇo̱ ratha̍mava pa̱ścācci̱tsanta̍madrivaḥ | pu̱rastā̍denaṃ me kṛdhi
हन्तो॒ नु किमा॑ससे प्रथ॒मं नो॒ रथं॑ कृधि । उ॒प॒मं वा॑ज॒यु श्रव॑:
॥५॥hanto̱ nu kimā̍sase pratha̱maṃ no̱ ratha̍ṃ kṛdhi | u̱pa̱maṃ vā̍ja̱yu śrava̍:
अवा॑ नो वाज॒युं रथं॑ सु॒करं॑ ते॒ किमित्परि॑ । अ॒स्मान्त्सु जि॒ग्युष॑स्कृधि
॥६॥avā̍ no vāja̱yuṃ ratha̍ṃ su̱kara̍ṃ te̱ kimitpari̍ | a̱smāntsu ji̱gyuṣa̍skṛdhi
इन्द्र॒ दृह्य॑स्व॒ पूर॑सि भ॒द्रा त॑ एति निष्कृ॒तम् । इ॒यं धीॠ॒त्विया॑वती
॥७॥indra̱ dṛhya̍sva̱ pūra̍si bha̱drā ta̍ eti niṣkṛ̱tam | i̱yaṃ dhīṝ̱tviyā̍vatī
मा सी॑मव॒द्य आ भा॑गु॒र्वी काष्ठा॑ हि॒तं धन॑म् । अ॒पावृ॑क्ता अर॒त्नय॑:
॥८॥mā sī̍mava̱dya ā bhā̍gu̱rvī kāṣṭhā̍ hi̱taṃ dhana̍m | a̱pāvṛ̍ktā ara̱tnaya̍:
तु॒रीयं॒ नाम॑ य॒ज्ञियं॑ य॒दा कर॒स्तदु॑श्मसि । आदित्पति॑र्न ओहसे
॥९॥tu̱rīya̱ṃ nāma̍ ya̱jñiya̍ṃ ya̱dā kara̱stadu̍śmasi | āditpati̍rna ohase
अवी॑वृधद्वो अमृता॒ अम॑न्दीदेक॒द्यूर्दे॑वा उ॒त याश्च॑ देवीः ।
तस्मा॑ उ॒ राध॑: कृणुत प्रश॒स्तं प्रा॒तर्म॒क्षू धि॒याव॑सुर्जगम्यात्
॥१०॥avī̍vṛdhadvo amṛtā̱ ama̍ndīdeka̱dyūrde̍vā u̱ta yāśca̍ devīḥ |
tasmā̍ u̱ rādha̍: kṛṇuta praśa̱staṃ prā̱tarma̱kṣū dhi̱yāva̍surjagamyāt