Study
- Anukramaṇī
- Source
18 gāthino viśvāmitraḥ 16-18 jamadagnirvā|1-3 indrāvaruṇau, 4-6 bṛhaspatiḥ, 7-9 pūṣā, 10-12 savitā, 13-15 somaḥ, 16-18 mitrāvaruṇau| gāyatrī, 1-3 triṣṭup|
i̱mā u̍ vāṃ bhṛ̱mayo̱ manya̍mānā yu̱vāva̍te̱ na tujyā̍ abhūvan |
kva1 tyadi̍ndrāvaruṇā̱ yaśo̍ vā̱ṃ yena̍ smā̱ sina̱ṃ bhara̍tha̱: sakhi̍bhyaḥ
||1||इ॒मा उ॑ वां भृ॒मयो॒ मन्य॑माना यु॒वाव॑ते॒ न तुज्या॑ अभूवन् ।
क्व१ त्यदि॑न्द्रावरुणा॒ यशो॑ वां॒ येन॑ स्मा॒ सिनं॒ भर॑थ॒: सखि॑भ्यः
a̱yamu̍ vāṃ puru̱tamo̍ rayī̱yañcha̍śvatta̱mamava̍se johavīti |
sa̱joṣā̍vindrāvaruṇā ma̱rudbhi̍rdi̱vā pṛ̍thi̱vyā śṛ̍ṇuta̱ṃ hava̍ṃ me
||2||अ॒यमु॑ वां पुरु॒तमो॑ रयी॒यञ्छ॑श्वत्त॒ममव॑से जोहवीति ।
स॒जोषा॑विन्द्रावरुणा म॒रुद्भि॑र्दि॒वा पृ॑थि॒व्या शृ॑णुतं॒ हवं॑ मे
a̱sme tadi̍ndrāvaruṇā̱ vasu̍ ṣyāda̱sme ra̱yirma̍ruta̱: sarva̍vīraḥ |
a̱smān varū̍trīḥ śara̱ṇaira̍vantva̱smān hotrā̱ bhāra̍tī̱ dakṣi̍ṇābhiḥ
||3||अ॒स्मे तदि॑न्द्रावरुणा॒ वसु॑ ष्याद॒स्मे र॒यिर्म॑रुत॒: सर्व॑वीरः ।
अ॒स्मान् वरू॑त्रीः शर॒णैर॑वन्त्व॒स्मान् होत्रा॒ भार॑ती॒ दक्षि॑णाभिः
bṛha̍spate ju̱ṣasva̍ no ha̱vyāni̍ viśvadevya | rāsva̱ ratnā̍ni dā̱śuṣe̍
||4||बृह॑स्पते जु॒षस्व॑ नो ह॒व्यानि॑ विश्वदेव्य । रास्व॒ रत्ना॑नि दा॒शुषे॑
śuci̍ma̱rkairbṛha̱spati̍madhva̱reṣu̍ namasyata | anā̱myoja̱ ā ca̍ke
||5||शुचि॑म॒र्कैर्बृह॒स्पति॑मध्व॒रेषु॑ नमस्यत । अना॒म्योज॒ आ च॑के
vṛ̱ṣa̱bhaṃ ca̍rṣaṇī̱nāṃ vi̱śvarū̍pa̱madā̍bhyam | bṛha̱spati̱ṃ vare̍ṇyam
||6||वृ॒ष॒भं च॑र्षणी॒नां वि॒श्वरू॑प॒मदा॑भ्यम् । बृह॒स्पतिं॒ वरे॑ण्यम्
i̱yaṃ te̍ pūṣannāghṛṇe suṣṭu̱tirde̍va̱ navya̍sī | a̱smābhi̱stubhya̍ṃ śasyate
||7||इ॒यं ते॑ पूषन्नाघृणे सुष्टु॒तिर्दे॑व॒ नव्य॑सी । अ॒स्माभि॒स्तुभ्यं॑ शस्यते
tāṃ ju̍ṣasva̱ gira̱ṃ mama̍ vāja̱yantī̍mavā̱ dhiya̍m | va̱dhū̱yuri̍va̱ yoṣa̍ṇām
||8||तां जु॑षस्व॒ गिरं॒ मम॑ वाज॒यन्ती॑मवा॒ धिय॑म् । व॒धू॒युरि॑व॒ योष॑णाम्
yo viśvā̱bhi vi̱paśya̍ti̱ bhuva̍nā̱ saṃ ca̱ paśya̍ti | sa na̍: pū̱ṣāvi̱tā bhu̍vat
||9||यो विश्वा॒भि वि॒पश्य॑ति॒ भुव॑ना॒ सं च॒ पश्य॑ति । स न॑: पू॒षावि॒ता भु॑वत्
tat sa̍vi̱turvare̍ṇya̱ṃ bhargo̍ de̱vasya̍ dhīmahi | dhiyo̱ yo na̍: praco̱dayā̍t
||10||तत् स॑वि॒तुर्वरे॑ण्यं॒ भर्गो॑ दे॒वस्य॑ धीमहि । धियो॒ यो न॑: प्रचो॒दया॑त्
de̱vasya̍ savi̱turva̱yaṃ vā̍ja̱yanta̱: pura̍ṃdhyā | bhaga̍sya rā̱timī̍mahe
||11||दे॒वस्य॑ सवि॒तुर्व॒यं वा॑ज॒यन्त॒: पुरं॑ध्या । भग॑स्य रा॒तिमी॑महे
de̱vaṃ nara̍: savi̱tāra̱ṃ viprā̍ ya̱jñaiḥ su̍vṛ̱ktibhi̍: | na̱ma̱syanti̍ dhi̱yeṣi̱tāḥ
||12||दे॒वं नर॑: सवि॒तारं॒ विप्रा॑ य॒ज्ञैः सु॑वृ॒क्तिभि॑: । न॒म॒स्यन्ति॑ धि॒येषि॒ताः
somo̍ jigāti gātu̱vid de̱vānā̍meti niṣkṛ̱tam | ṛ̱tasya̱ yoni̍mā̱sada̍m
||13||सोमो॑ जिगाति गातु॒विद् दे॒वाना॑मेति निष्कृ॒तम् । ऋ॒तस्य॒ योनि॑मा॒सद॑म्
somo̍ a̱smabhya̍ṃ dvi̱pade̱ catu̍ṣpade ca pa̱śave̍ | a̱na̱mī̱vā iṣa̍skarat
||14||सोमो॑ अ॒स्मभ्यं॑ द्वि॒पदे॒ चतु॑ष्पदे च प॒शवे॑ । अ॒न॒मी॒वा इष॑स्करत्
a̱smāka̱māyu̍rva̱rdhaya̍nna̱bhimā̍tī̱: saha̍mānaḥ | soma̍: sa̱dhastha̱māsa̍dat
||15||अ॒स्माक॒मायु॑र्व॒र्धय॑न्न॒भिमा॑ती॒: सह॑मानः । सोम॑: स॒धस्थ॒मास॑दत्
ā no̍ mitrāvaruṇā ghṛ̱tairgavyū̍timukṣatam | madhvā̱ rajā̍ṃsi sukratū
||16||आ नो॑ मित्रावरुणा घृ॒तैर्गव्यू॑तिमुक्षतम् । मध्वा॒ रजां॑सि सुक्रतू
u̱ru̱śaṃsā̍ namo̱vṛdhā̍ ma̱hnā dakṣa̍sya rājathaḥ | drāghi̍ṣṭhābhiḥ śucivratā
||17||उ॒रु॒शंसा॑ नमो॒वृधा॑ म॒ह्ना दक्ष॑स्य राजथः । द्राघि॑ष्ठाभिः शुचिव्रता
gṛ̱ṇā̱nā ja̱mada̍gninā̱ yonā̍vṛ̱tasya̍ sīdatam | pā̱taṃ soma̍mṛtāvṛdhā
||18||गृ॒णा॒ना ज॒मद॑ग्निना॒ योना॑वृ॒तस्य॑ सीदतम् । पा॒तं सोम॑मृतावृधा