Study
- Anukramaṇī
- Source
7 ṛṣabho vaiśvāmitraḥ| agniḥ| anuṣṭup|
pra vo̍ de̱vāyā̱gnaye̱ barhi̍ṣṭhamarcāsmai |
gama̍d de̱vebhi̱rā sa no̱ yaji̍ṣṭho ba̱rhirā sa̍dat
||1||प्र वो॑ दे॒वाया॒ग्नये॒ बर्हि॑ष्ठमर्चास्मै ।
गम॑द् दे॒वेभि॒रा स नो॒ यजि॑ष्ठो ब॒र्हिरा स॑दत्
ṛ̱tāvā̱ yasya̱ roda̍sī̱ dakṣa̱ṃ saca̍nta ū̱taya̍: |
ha̱viṣma̍nta̱stamī̍l̤ate̱ taṃ sa̍ni̱ṣyanto'va̍se
||2||ऋ॒तावा॒ यस्य॒ रोद॑सी॒ दक्षं॒ सच॑न्त ऊ॒तय॑: ।
ह॒विष्म॑न्त॒स्तमी॑ळते॒ तं स॑नि॒ष्यन्तोऽव॑से
sa ya̱ntā vipra̍ eṣā̱ṃ sa ya̱jñānā̱mathā̱ hi ṣaḥ |
a̱gniṃ taṃ vo̍ duvasyata̱ dātā̱ yo vani̍tā ma̱gham
||3||स य॒न्ता विप्र॑ एषां॒ स य॒ज्ञाना॒मथा॒ हि षः ।
अ॒ग्निं तं वो॑ दुवस्यत॒ दाता॒ यो वनि॑ता म॒घम्
sa na̱: śarmā̍ṇi vī̱taye̱'gnirya̍cchatu̱ śaṃta̍mā |
yato̍ naḥ pru̱ṣṇava̱d vasu̍ di̱vi kṣi̱tibhyo̍ a̱psvā
||4||स न॒: शर्मा॑णि वी॒तये॒ऽग्निर्य॑च्छतु॒ शंत॑मा ।
यतो॑ नः प्रु॒ष्णव॒द् वसु॑ दि॒वि क्षि॒तिभ्यो॑ अ॒प्स्वा
dī̱di̱vāṃsa̱mapū̍rvya̱ṃ vasvī̍bhirasya dhī̱tibhi̍: |
ṛkvā̍ṇo a̱gnimi̍ndhate̱ hotā̍raṃ vi̱śpati̍ṃ vi̱śām
||5||दी॒दि॒वांस॒मपू॑र्व्यं॒ वस्वी॑भिरस्य धी॒तिभि॑: ।
ऋक्वा॑णो अ॒ग्निमि॑न्धते॒ होता॑रं वि॒श्पतिं॑ वि॒शाम्
u̱ta no̱ brahma̍nnaviṣa u̱ktheṣu̍ deva̱hūta̍maḥ |
śaṃ na̍: śocā ma̱rudvṛ̱dho'gne̍ sahasra̱sāta̍maḥ
||6||उ॒त नो॒ ब्रह्म॑न्नविष उ॒क्थेषु॑ देव॒हूत॑मः ।
शं न॑: शोचा म॒रुद्वृ॒धोऽग्ने॑ सहस्र॒सात॑मः
nū no̍ rāsva sa̱hasra̍vat to̱kava̍tpuṣṭi̱mad vasu̍ |
dyu̱mada̍gne su̱vīrya̱ṃ varṣi̍ṣṭha̱manu̍pakṣitam
||7||नू नो॑ रास्व स॒हस्र॑वत् तो॒कव॑त्पुष्टि॒मद् वसु॑ ।
द्यु॒मद॑ग्ने सु॒वीर्यं॒ वर्षि॑ष्ठ॒मनु॑पक्षितम्