Study
- Anukramaṇī
- Source
9 gāthino viśvāmitraḥ| indraḥ| gāyatrī|
indra̍ tvā vṛṣa̱bhaṃ va̱yaṃ su̱te some̍ havāmahe | sa pā̍hi̱ madhvo̱ andha̍saḥ
||1||इन्द्र॑ त्वा वृष॒भं व॒यं सु॒ते सोमे॑ हवामहे । स पा॑हि॒ मध्वो॒ अन्ध॑सः
indra̍ kratu̱vida̍ṃ su̱taṃ soma̍ṃ harya puruṣṭuta | pibā vṛ̍ṣasva̱ tātṛ̍pim
||2||इन्द्र॑ क्रतु॒विदं॑ सु॒तं सोमं॑ हर्य पुरुष्टुत । पिबा वृ॑षस्व॒ तातृ॑पिम्
indra̱ pra ṇo̍ dhi̱tāvā̍naṃ ya̱jñaṃ viśve̍bhirde̱vebhi̍: | ti̱ra sta̍vāna viśpate
||3||इन्द्र॒ प्र णो॑ धि॒तावा॑नं य॒ज्ञं विश्वे॑भिर्दे॒वेभि॑: । ति॒र स्त॑वान विश्पते
indra̱ somā̍: su̱tā i̱me tava̱ pra ya̍nti satpate | kṣaya̍ṃ ca̱ndrāsa̱ inda̍vaḥ
||4||इन्द्र॒ सोमा॑: सु॒ता इ॒मे तव॒ प्र य॑न्ति सत्पते । क्षयं॑ च॒न्द्रास॒ इन्द॑वः
da̱dhi̱ṣvā ja̱ṭhare̍ su̱taṃ soma̍mindra̱ vare̍ṇyam | tava̍ dyu̱kṣāsa̱ inda̍vaḥ
||5||द॒धि॒ष्वा ज॒ठरे॑ सु॒तं सोम॑मिन्द्र॒ वरे॑ण्यम् । तव॑ द्यु॒क्षास॒ इन्द॑वः
girva̍ṇaḥ pā̱hi na̍: su̱taṃ madho̱rdhārā̍bhirajyase | indra̱ tvādā̍ta̱midyaśa̍:
||6||गिर्व॑णः पा॒हि न॑: सु॒तं मधो॒र्धारा॑भिरज्यसे । इन्द्र॒ त्वादा॑त॒मिद्यश॑:
a̱bhi dyu̱mnāni̍ va̱nina̱ indra̍ṃ sacante̱ akṣi̍tā | pī̱tvī soma̍sya vāvṛdhe
||7||अ॒भि द्यु॒म्नानि॑ व॒निन॒ इन्द्रं॑ सचन्ते॒ अक्षि॑ता । पी॒त्वी सोम॑स्य वावृधे
a̱rvā̱vato̍ na̱ ā ga̍hi parā̱vata̍śca vṛtrahan | i̱mā ju̍ṣasva no̱ gira̍:
||8||अ॒र्वा॒वतो॑ न॒ आ ग॑हि परा॒वत॑श्च वृत्रहन् । इ॒मा जु॑षस्व नो॒ गिर॑:
yada̍nta̱rā pa̍rā̱vata̍marvā̱vata̍ṃ ca hū̱yase̍ | indre̱ha tata̱ ā ga̍hi
||9||यद॑न्त॒रा प॑रा॒वत॑मर्वा॒वतं॑ च हू॒यसे॑ । इन्द्रे॒ह तत॒ आ ग॑हि