Study
- Anukramaṇī
- Source
8 gāthino viśvāmitraḥ|indraḥ| triṣṭup, 1-4gāyatrī, 6 jagatī|
dhā̱nāva̍ntaṃ kara̱mbhiṇa̍mapū̱pava̍ntamu̱kthina̍m | indra̍ prā̱tarju̍ṣasva naḥ
||1||धा॒नाव॑न्तं कर॒म्भिण॑मपू॒पव॑न्तमु॒क्थिन॑म् । इन्द्र॑ प्रा॒तर्जु॑षस्व नः
pu̱ro̱l̤āśa̍ṃ paca̱tya̍ṃ ju̱ṣasve̱ndrā gu̍rasva ca | tubhya̍ṃ ha̱vyāni̍ sisrate
||2||पु॒रो॒ळाशं॑ पच॒त्यं॑ जु॒षस्वे॒न्द्रा गु॑रस्व च । तुभ्यं॑ ह॒व्यानि॑ सिस्रते
pu̱ro̱l̤āśa̍ṃ ca no̱ ghaso̍ jo̱ṣayā̍se̱ gira̍śca naḥ | va̱dhū̱yuri̍va̱ yoṣa̍ṇām
||3||पु॒रो॒ळाशं॑ च नो॒ घसो॑ जो॒षया॑से॒ गिर॑श्च नः । व॒धू॒युरि॑व॒ योष॑णाम्
pu̱ro̱l̤āśa̍ṃ sanaśruta prātaḥsā̱ve ju̍ṣasva naḥ | indra̱ kratu̱rhi te̍ bṛ̱han
||4||पु॒रो॒ळाशं॑ सनश्रुत प्रातःसा॒वे जु॑षस्व नः । इन्द्र॒ क्रतु॒र्हि ते॑ बृ॒हन्
mādhya̍ṃdinasya̱ sava̍nasya dhā̱nāḥ pu̍ro̱l̤āśa̍mindra kṛṣve̱ha cāru̍m |
pra yat sto̱tā ja̍ri̱tā tūrṇya̍rtho vṛṣā̱yamā̍ṇa̱ upa̍ gī̱rbhirīṭṭe̍
||5||माध्यं॑दिनस्य॒ सव॑नस्य धा॒नाः पु॑रो॒ळाश॑मिन्द्र कृष्वे॒ह चारु॑म् ।
प्र यत् स्तो॒ता ज॑रि॒ता तूर्ण्य॑र्थो वृषा॒यमा॑ण॒ उप॑ गी॒र्भिरीट्टे॑
tṛ̱tīye̍ dhā̱nāḥ sava̍ne puruṣṭuta puro̱l̤āśa̱māhu̍taṃ māmahasva naḥ |
ṛ̱bhu̱manta̱ṃ vāja̍vantaṃ tvā kave̱ praya̍svanta̱ upa̍ śikṣema dhī̱tibhi̍:
||6||तृ॒तीये॑ धा॒नाः सव॑ने पुरुष्टुत पुरो॒ळाश॒माहु॑तं मामहस्व नः ।
ऋ॒भु॒मन्तं॒ वाज॑वन्तं त्वा कवे॒ प्रय॑स्वन्त॒ उप॑ शिक्षेम धी॒तिभि॑:
pū̱ṣa̱ṇvate̍ te cakṛmā kara̱mbhaṃ hari̍vate̱ harya̍śvāya dhā̱nāḥ |
a̱pū̱pama̍ddhi̱ saga̍ṇo ma̱rudbhi̱: soma̍ṃ piba vṛtra̱hā śū̍ra vi̱dvān
||7||पू॒ष॒ण्वते॑ ते चकृमा कर॒म्भं हरि॑वते॒ हर्य॑श्वाय धा॒नाः ।
अ॒पू॒पम॑द्धि॒ सग॑णो म॒रुद्भि॒: सोमं॑ पिब वृत्र॒हा शू॑र वि॒द्वान्
prati̍ dhā̱nā bha̍rata̱ tūya̍masmai puro̱l̤āśa̍ṃ vī̱rata̍māya nṛ̱ṇām |
di̱vedi̍ve sa̱dṛśī̍rindra̱ tubhya̱ṃ vardha̍ntu tvā soma̱peyā̍ya dhṛṣṇo
||8||प्रति॑ धा॒ना भ॑रत॒ तूय॑मस्मै पुरो॒ळाशं॑ वी॒रत॑माय नृ॒णाम् ।
दि॒वेदि॑वे स॒दृशी॑रिन्द्र॒ तुभ्यं॒ वर्ध॑न्तु त्वा सोम॒पेया॑य धृष्णो