Study
- Anukramaṇī
- Source
9 gāthino viśvāmitraḥ, 7 ātmā| 1-3 vaiśvānaro'gniḥ, 4-6 marutaḥ, 7-8 ātmā (agnirvā), 9 viśvāmitropadhyāyaḥ|1-6 jagatī, 7-9 triṣṭup|
vai̱śvā̱na̱raṃ mana̍sā̱gniṃ ni̱cāyyā̍ ha̱viṣma̍nto anuṣa̱tyaṃ sva̱rvida̍m |
su̱dānu̍ṃ de̱vaṃ ra̍thi̱raṃ va̍sū̱yavo̍ gī̱rbhī ra̱ṇvaṃ ku̍śi̱kāso̍ havāmahe
||1||वै॒श्वा॒न॒रं मन॑सा॒ग्निं नि॒चाय्या॑ ह॒विष्म॑न्तो अनुष॒त्यं स्व॒र्विद॑म् ।
सु॒दानुं॑ दे॒वं र॑थि॒रं व॑सू॒यवो॑ गी॒र्भी र॒ण्वं कु॑शि॒कासो॑ हवामहे
taṃ śu̱bhrama̱gnimava̍se havāmahe vaiśvāna̱raṃ mā̍ta̱riśvā̍namu̱kthya̍m |
bṛha̱spati̱ṃ manu̍ṣo de̱vatā̍taye̱ vipra̱ṃ śrotā̍ra̱mati̍thiṃ raghu̱ṣyada̍m
||2||तं शु॒भ्रम॒ग्निमव॑से हवामहे वैश्वान॒रं मा॑त॒रिश्वा॑नमु॒क्थ्य॑म् ।
बृह॒स्पतिं॒ मनु॑षो दे॒वता॑तये॒ विप्रं॒ श्रोता॑र॒मति॑थिं रघु॒ष्यद॑म्
aśvo̱ na kranda̱ñjani̍bhi̱: sami̍dhyate vaiśvāna̱raḥ ku̍śi̱kebhi̍ryu̱geyu̍ge |
sa no̍ a̱gniḥ su̱vīrya̱ṃ svaśvya̱ṃ dadhā̍tu̱ ratna̍ma̱mṛte̍ṣu̱ jāgṛ̍viḥ
||3||अश्वो॒ न क्रन्द॒ञ्जनि॑भि॒: समि॑ध्यते वैश्वान॒रः कु॑शि॒केभि॑र्यु॒गेयु॑गे ।
स नो॑ अ॒ग्निः सु॒वीर्यं॒ स्वश्व्यं॒ दधा॑तु॒ रत्न॑म॒मृते॑षु॒ जागृ॑विः
pra ya̍ntu̱ vājā̱stavi̍ṣībhira̱gnaya̍: śu̱bhe sammi̍ślā̱: pṛṣa̍tīrayukṣata |
bṛ̱ha̱dukṣo̍ ma̱ruto̍ vi̱śvave̍dasa̱: pra ve̍payanti̱ parva̍tā̱m̐ adā̍bhyāḥ
||4||प्र य॑न्तु॒ वाजा॒स्तवि॑षीभिर॒ग्नय॑: शु॒भे सम्मि॑श्ला॒: पृष॑तीरयुक्षत ।
बृ॒ह॒दुक्षो॑ म॒रुतो॑ वि॒श्ववे॑दस॒: प्र वे॑पयन्ति॒ पर्व॑ताँ॒ अदा॑भ्याः
a̱gni̱śriyo̍ ma̱ruto̍ vi̱śvakṛ̍ṣṭaya̱ ā tve̱ṣamu̱gramava̍ īmahe va̱yam |
te svā̱nino̍ ru̱driyā̍ va̱rṣani̍rṇijaḥ si̱ṃhā na he̱ṣakra̍tavaḥ su̱dāna̍vaḥ
||5||अ॒ग्नि॒श्रियो॑ म॒रुतो॑ वि॒श्वकृ॑ष्टय॒ आ त्वे॒षमु॒ग्रमव॑ ईमहे व॒यम् ।
ते स्वा॒निनो॑ रु॒द्रिया॑ व॒र्षनि॑र्णिजः सिं॒हा न हे॒षक्र॑तवः सु॒दान॑वः
vrāta̍ṃvrātaṃ ga̱ṇaṃga̍ṇaṃ suśa̱stibhi̍ra̱gnerbhāma̍ṃ ma̱rutā̱moja̍ īmahe |
pṛṣa̍daśvāso anava̱bhrarā̍dhaso̱ gantā̍ro ya̱jñaṃ vi̱dathe̍ṣu̱ dhīrā̍:
||6||व्रातं॑व्रातं ग॒णंग॑णं सुश॒स्तिभि॑र॒ग्नेर्भामं॑ म॒रुता॒मोज॑ ईमहे ।
पृष॑दश्वासो अनव॒भ्ररा॑धसो॒ गन्ता॑रो य॒ज्ञं वि॒दथे॑षु॒ धीरा॑:
a̱gnira̍smi̱ janma̍nā jā̱tave̍dā ghṛ̱taṃ me̱ cakṣu̍ra̱mṛta̍ṃ ma ā̱san |
a̱rkastri̱dhātū̱ raja̍so vi̱māno'ja̍sro gha̱rmo ha̱vira̍smi̱ nāma̍
||7||अ॒ग्निर॑स्मि॒ जन्म॑ना जा॒तवे॑दा घृ॒तं मे॒ चक्षु॑र॒मृतं॑ म आ॒सन् ।
अ॒र्कस्त्रि॒धातू॒ रज॑सो वि॒मानोऽज॑स्रो घ॒र्मो ह॒विर॑स्मि॒ नाम॑
tri̱bhiḥ pa̱vitrai̱rapu̍po̱ddhya1rkaṃ hṛ̱dā ma̱tiṃ jyoti̱ranu̍ prajā̱nan |
varṣi̍ṣṭha̱ṃ ratna̍makṛta sva̱dhābhi̱rādid dyāvā̍pṛthi̱vī parya̍paśyat
||8||त्रि॒भिः प॒वित्रै॒रपु॑पो॒द्ध्य१र्कं हृ॒दा म॒तिं ज्योति॒रनु॑ प्रजा॒नन् ।
वर्षि॑ष्ठं॒ रत्न॑मकृत स्व॒धाभि॒रादिद् द्यावा॑पृथि॒वी पर्य॑पश्यत्
śa̱tadhā̍ra̱mutsa̱makṣī̍yamāṇaṃ vipa̱ścita̍ṃ pi̱tara̱ṃ vaktvā̍nām |
me̱l̤iṃ mada̍ntaṃ pi̱troru̱pasthe̱ taṃ ro̍dasī pipṛtaṃ satya̱vāca̍m
||9||श॒तधा॑र॒मुत्स॒मक्षी॑यमाणं विप॒श्चितं॑ पि॒तरं॒ वक्त्वा॑नाम् ।
मे॒ळिं मद॑न्तं पि॒त्रोरु॒पस्थे॒ तं रो॑दसी पिपृतं सत्य॒वाच॑म्