Study
- Anukramaṇī
- Source
5 gāthī kauśikaḥ| agniḥ| triṣṭup|
a̱gniṃ hotā̍ra̱ṃ pra vṛ̍ṇe mi̱yedhe̱ gṛtsa̍ṃ ka̱viṃ vi̍śva̱vida̱mamū̍ram |
sa no̍ yakṣad de̱vatā̍tā̱ yajī̍yān rā̱ye vājā̍ya vanate ma̱ghāni̍
||1||अ॒ग्निं होता॑रं॒ प्र वृ॑णे मि॒येधे॒ गृत्सं॑ क॒विं वि॑श्व॒विद॒ममू॑रम् ।
स नो॑ यक्षद् दे॒वता॑ता॒ यजी॑यान् रा॒ये वाजा॑य वनते म॒घानि॑
pra te̍ agne ha̱viṣma̍tīmiya̱rmyacchā̍ sudyu̱mnāṃ rā̱tinī̍ṃ ghṛ̱tācī̍m |
pra̱da̱kṣi̱ṇid de̱vatā̍timurā̱ṇaḥ saṃ rā̱tibhi̱rvasu̍bhirya̱jñama̍śret
||2||प्र ते॑ अग्ने ह॒विष्म॑तीमिय॒र्म्यच्छा॑ सुद्यु॒म्नां रा॒तिनीं॑ घृ॒ताची॑म् ।
प्र॒द॒क्षि॒णिद् दे॒वता॑तिमुरा॒णः सं रा॒तिभि॒र्वसु॑भिर्य॒ज्ञम॑श्रेत्
sa tejī̍yasā̱ mana̍sā̱ tvota̍ u̱ta śi̍kṣa svapa̱tyasya̍ śi̱kṣoḥ |
agne̍ rā̱yo nṛta̍masya̱ prabhū̍tau bhū̱yāma̍ te suṣṭu̱taya̍śca̱ vasva̍:
||3||स तेजी॑यसा॒ मन॑सा॒ त्वोत॑ उ॒त शि॑क्ष स्वप॒त्यस्य॑ शि॒क्षोः ।
अग्ने॑ रा॒यो नृत॑मस्य॒ प्रभू॑तौ भू॒याम॑ ते सुष्टु॒तय॑श्च॒ वस्व॑:
bhūrī̍ṇi̱ hi tve da̍dhi̱re anī̱kā 'gne̍ de̱vasya̱ yajya̍vo̱ janā̍saḥ |
sa ā va̍ha de̱vatā̍tiṃ yaviṣṭha̱ śardho̱ yada̱dya di̱vyaṃ yajā̍si
||4||भूरी॑णि॒ हि त्वे द॑धि॒रे अनी॒का ऽग्ने॑ दे॒वस्य॒ यज्य॑वो॒ जना॑सः ।
स आ व॑ह दे॒वता॑तिं यविष्ठ॒ शर्धो॒ यद॒द्य दि॒व्यं यजा॑सि
yat tvā̱ hotā̍rama̱naja̍n mi̱yedhe̍ niṣā̱daya̍nto ya̱jathā̍ya de̱vāḥ |
sa tvaṃ no̍ agne'vi̱teha bo̱dhyadhi̱ śravā̍ṃsi dhehi nasta̱nūṣu̍
||5||यत् त्वा॒ होता॑रम॒नज॑न् मि॒येधे॑ निषा॒दय॑न्तो य॒जथा॑य दे॒वाः ।
स त्वं नो॑ अग्नेऽवि॒तेह बो॒ध्यधि॒ श्रवां॑सि धेहि नस्त॒नूषु॑