Study
- Anukramaṇī
- Source
9 gāthino viśvāmitraḥ| agniḥ| bṛhatī, 9 triṣṭup|
sakhā̍yastvā vavṛmahe de̱vaṃ martā̍sa ū̱taye̍ |
a̱pāṃ napā̍taṃ su̱bhaga̍ṃ su̱dīdi̍tiṃ su̱pratū̍rtimane̱hasa̍m
||1||सखा॑यस्त्वा ववृमहे दे॒वं मर्ता॑स ऊ॒तये॑ ।
अ॒पां नपा॑तं सु॒भगं॑ सु॒दीदि॑तिं सु॒प्रतू॑र्तिमने॒हस॑म्
kāya̍māno va̱nā tvaṃ yanmā̱tṝraja̍ganna̱paḥ |
na tat te̍ agne pra̱mṛṣe̍ ni̱varta̍na̱ṃ yad dū̱re sanni̱hābha̍vaḥ
||2||काय॑मानो व॒ना त्वं यन्मा॒तॄरज॑गन्न॒पः ।
न तत् ते॑ अग्ने प्र॒मृषे॑ नि॒वर्त॑नं॒ यद् दू॒रे सन्नि॒हाभ॑वः
ati̍ tṛ̱ṣṭaṃ va̍vakṣi̱thāthai̱va su̱manā̍ asi |
praprā̱nye yanti̱ parya̱nya ā̍sate̱ yeṣā̍ṃ sa̱khye asi̍ śri̱taḥ
||3||अति॑ तृ॒ष्टं व॑वक्षि॒थाथै॒व सु॒मना॑ असि ।
प्रप्रा॒न्ये यन्ति॒ पर्य॒न्य आ॑सते॒ येषां॑ स॒ख्ये असि॑ श्रि॒तः
ī̱yi̱vāṃsa̱mati̱ sridha̱: śaśva̍tī̱rati̍ sa̱ścata̍: |
anvī̍mavindan nici̱rāso̍ a̱druho̱'psu si̱ṃhami̍va śri̱tam
||4||ई॒यि॒वांस॒मति॒ स्रिध॒: शश्व॑ती॒रति॑ स॒श्चत॑: ।
अन्वी॑मविन्दन् निचि॒रासो॑ अ॒द्रुहो॒ऽप्सु सिं॒हमि॑व श्रि॒तम्
sa̱sṛ̱vāṃsa̍miva̱ tmanā̱ 'gnimi̱tthā ti̱rohi̍tam |
aina̍ṃ nayanmāta̱riśvā̍ parā̱vato̍ de̱vebhyo̍ mathi̱taṃ pari̍
||5||स॒सृ॒वांस॑मिव॒ त्मना॒ ऽग्निमि॒त्था ति॒रोहि॑तम् ।
ऐनं॑ नयन्मात॒रिश्वा॑ परा॒वतो॑ दे॒वेभ्यो॑ मथि॒तं परि॑
taṃ tvā̱ martā̍ agṛbhṇata de̱vebhyo̍ havyavāhana |
viśvā̱n yad ya̱jñām̐ a̍bhi̱pāsi̍ mānuṣa̱ tava̱ kratvā̍ yaviṣṭhya
||6||तं त्वा॒ मर्ता॑ अगृभ्णत दे॒वेभ्यो॑ हव्यवाहन ।
विश्वा॒न् यद् य॒ज्ञाँ अ॑भि॒पासि॑ मानुष॒ तव॒ क्रत्वा॑ यविष्ठ्य
tad bha̱draṃ tava̍ da̱ṃsanā̱ pākā̍ya cicchadayati |
tvāṃ yada̍gne pa̱śava̍: sa̱māsa̍te̱ sami̍ddhamapiśarva̱re
||7||तद् भ॒द्रं तव॑ दं॒सना॒ पाका॑य चिच्छदयति ।
त्वां यद॑ग्ने प॒शव॑: स॒मास॑ते॒ समि॑द्धमपिशर्व॒रे
ā ju̍hotā svadhva̱raṃ śī̱raṃ pā̍va̱kaśo̍ciṣam |
ā̱śuṃ dū̱tama̍ji̱raṃ pra̱tnamīḍya̍ṃ śru̱ṣṭī de̱vaṃ sa̍paryata
||8||आ जु॑होता स्वध्व॒रं शी॒रं पा॑व॒कशो॑चिषम् ।
आ॒शुं दू॒तम॑जि॒रं प्र॒त्नमीड्यं॑ श्रु॒ष्टी दे॒वं स॑पर्यत
trīṇi̍ śa̱tā trī sa̱hasrā̍ṇya̱gniṃ tri̱ṃśacca̍ de̱vā nava̍ cāsaparyan |
aukṣa̍n ghṛ̱tairastṛ̍ṇan ba̱rhira̍smā̱ ādiddhotā̍ra̱ṃ nya̍sādayanta
||9||त्रीणि॑ श॒ता त्री स॒हस्रा॑ण्य॒ग्निं त्रिं॒शच्च॑ दे॒वा नव॑ चासपर्यन् ।
औक्ष॑न् घृ॒तैरस्तृ॑णन् ब॒र्हिर॑स्मा॒ आदिद्धोता॑रं॒ न्य॑सादयन्त