Study
- Anukramaṇī
- Source
7 gāthino viśvāmitraḥ| ṛbhavaḥ, 5-7 indra ṛbhavaśca | jagatī|
i̱heha̍ vo̱ mana̍sā ba̱ndhutā̍ nara u̱śijo̍ jagmura̱bhi tāni̱ veda̍sā |
yābhi̍rmā̱yābhi̱: prati̍jūtivarpasa̱: saudha̍nvanā ya̱jñiya̍ṃ bhā̱gamā̍na̱śa
||1||इ॒हेह॑ वो॒ मन॑सा ब॒न्धुता॑ नर उ॒शिजो॑ जग्मुर॒भि तानि॒ वेद॑सा ।
याभि॑र्मा॒याभि॒: प्रति॑जूतिवर्पस॒: सौध॑न्वना य॒ज्ञियं॑ भा॒गमा॑न॒श
yābhi̱: śacī̍bhiścama̱sām̐ api̍ṃśata̱ yayā̍ dhi̱yā gāmari̍ṇīta̱ carma̍ṇaḥ |
yena̱ harī̱ mana̍sā ni̱rata̍kṣata̱ tena̍ deva̱tvamṛ̍bhava̱: samā̍naśa
||2||याभि॒: शची॑भिश्चम॒साँ अपिं॑शत॒ यया॑ धि॒या गामरि॑णीत॒ चर्म॑णः ।
येन॒ हरी॒ मन॑सा नि॒रत॑क्षत॒ तेन॑ देव॒त्वमृ॑भव॒: समा॑नश
indra̍sya sa̱khyamṛ̱bhava̱: samā̍naśu̱rmano̱rnapā̍to a̱paso̍ dadhanvire |
sau̱dha̱nva̱nāso̍ amṛta̱tvameri̍re vi̱ṣṭvī śamī̍bhiḥ su̱kṛta̍: sukṛ̱tyayā̍
||3||इन्द्र॑स्य स॒ख्यमृ॒भव॒: समा॑नशु॒र्मनो॒र्नपा॑तो अ॒पसो॑ दधन्विरे ।
सौ॒ध॒न्व॒नासो॑ अमृत॒त्वमेरि॑रे वि॒ष्ट्वी शमी॑भिः सु॒कृत॑: सुकृ॒त्यया॑
indre̍ṇa yātha sa̱ratha̍ṃ su̱te sacā̱m̐ atho̱ vaśā̍nāṃ bhavathā sa̱ha śri̱yā |
na va̍: prati̱mai su̍kṛ̱tāni̍ vāghata̱: saudha̍nvanā ṛbhavo vī̱ryā̍ṇi ca
||4||इन्द्रे॑ण याथ स॒रथं॑ सु॒ते सचाँ॒ अथो॒ वशा॑नां भवथा स॒ह श्रि॒या ।
न व॑: प्रति॒मै सु॑कृ॒तानि॑ वाघत॒: सौध॑न्वना ऋभवो वी॒र्या॑णि च
indra̍ ṛ̱bhubhi̱rvāja̍vadbhi̱: samu̍kṣitaṃ su̱taṃ soma̱mā vṛ̍ṣasvā̱ gabha̍styoḥ |
dhi̱yeṣi̱to ma̍ghavan dā̱śuṣo̍ gṛ̱he sau̍dhanva̱nebhi̍: sa̱ha ma̍tsvā̱ nṛbhi̍:
||5||इन्द्र॑ ऋ॒भुभि॒र्वाज॑वद्भि॒: समु॑क्षितं सु॒तं सोम॒मा वृ॑षस्वा॒ गभ॑स्त्योः ।
धि॒येषि॒तो म॑घवन् दा॒शुषो॑ गृ॒हे सौ॑धन्व॒नेभि॑: स॒ह म॑त्स्वा॒ नृभि॑:
indra̍ ṛbhu̱mān vāja̍vān matsve̱ha no̱'smin tsava̍ne̱ śacyā̍ puruṣṭuta |
i̱māni̱ tubhya̱ṃ svasa̍rāṇi yemire vra̱tā de̱vānā̱ṃ manu̍ṣaśca̱ dharma̍bhiḥ
||6||इन्द्र॑ ऋभु॒मान् वाज॑वान् मत्स्वे॒ह नो॒ऽस्मिन् त्सव॑ने॒ शच्या॑ पुरुष्टुत ।
इ॒मानि॒ तुभ्यं॒ स्वस॑राणि येमिरे व्र॒ता दे॒वानां॒ मनु॑षश्च॒ धर्म॑भिः
indra̍ ṛ̱bhubhi̍rvā̱jibhi̍rvā̱jaya̍nni̱ha stoma̍ṃ jari̱turupa̍ yāhi ya̱jñiya̍m |
śa̱taṃ kete̍bhiriṣi̱rebhi̍rā̱yave̍ sa̱hasra̍ṇītho adhva̱rasya̱ homa̍ni
||7||इन्द्र॑ ऋ॒भुभि॑र्वा॒जिभि॑र्वा॒जय॑न्नि॒ह स्तोमं॑ जरि॒तुरुप॑ याहि य॒ज्ञिय॑म् ।
श॒तं केते॑भिरिषि॒रेभि॑रा॒यवे॑ स॒हस्र॑णीथो अध्व॒रस्य॒ होम॑नि