Study
- Anukramaṇī
- Source
7 kātya utkīlaḥ| agniḥ| triṣṭup|
vi pāja̍sā pṛ̱thunā̱ śośu̍cāno̱ bādha̍sva dvi̱ṣo ra̱kṣaso̱ amī̍vāḥ |
su̱śarma̍ṇo bṛha̱taḥ śarma̍ṇi syāma̱gnera̱haṃ su̱hava̍sya̱ praṇī̍tau
||1||वि पाज॑सा पृ॒थुना॒ शोशु॑चानो॒ बाध॑स्व द्वि॒षो र॒क्षसो॒ अमी॑वाः ।
सु॒शर्म॑णो बृह॒तः शर्म॑णि स्याम॒ग्नेर॒हं सु॒हव॑स्य॒ प्रणी॑तौ
tvaṃ no̍ a̱syā u̱ṣaso̱ vyu̍ṣṭau̱ tvaṃ sūra̱ udi̍te bodhi go̱pāḥ |
janme̍va̱ nitya̱ṃ tana̍yaṃ juṣasva̱ stoma̍ṃ me agne ta̱nvā̍ sujāta
||2||त्वं नो॑ अ॒स्या उ॒षसो॒ व्यु॑ष्टौ॒ त्वं सूर॒ उदि॑ते बोधि गो॒पाः ।
जन्मे॑व॒ नित्यं॒ तन॑यं जुषस्व॒ स्तोमं॑ मे अग्ने त॒न्वा॑ सुजात
tvaṃ nṛ̱cakṣā̍ vṛṣa̱bhānu̍ pū̱rvīḥ kṛ̱ṣṇāsva̍gne aru̱ṣo vi bhā̍hi |
vaso̱ neṣi̍ ca̱ parṣi̱ cātyaṃha̍: kṛ̱dhī no̍ rā̱ya u̱śijo̍ yaviṣṭha
||3||त्वं नृ॒चक्षा॑ वृष॒भानु॑ पू॒र्वीः कृ॒ष्णास्व॑ग्ने अरु॒षो वि भा॑हि ।
वसो॒ नेषि॑ च॒ पर्षि॒ चात्यंह॑: कृ॒धी नो॑ रा॒य उ॒शिजो॑ यविष्ठ
aṣā̍l̤aho agne vṛṣa̱bho di̍dīhi̱ puro̱ viśvā̱: saubha̍gā saṃjigī̱vān |
ya̱jñasya̍ ne̱tā pra̍tha̱masya̍ pā̱yorjāta̍vedo bṛha̱taḥ su̍praṇīte
||4||अषा॑ळहो अग्ने वृष॒भो दि॑दीहि॒ पुरो॒ विश्वा॒: सौभ॑गा संजिगी॒वान् ।
य॒ज्ञस्य॑ ने॒ता प्र॑थ॒मस्य॑ पा॒योर्जात॑वेदो बृह॒तः सु॑प्रणीते
acchi̍drā̱ śarma̍ jaritaḥ pu̱rūṇi̍ de̱vām̐ acchā̱ dīdyā̍naḥ sume̱dhāḥ |
ratho̱ na sasni̍ra̱bhi va̍kṣi̱ vāja̱magne̱ tvaṃ roda̍sī naḥ su̱meke̍
||5||अच्छि॑द्रा॒ शर्म॑ जरितः पु॒रूणि॑ दे॒वाँ अच्छा॒ दीद्या॑नः सुमे॒धाः ।
रथो॒ न सस्नि॑र॒भि व॑क्षि॒ वाज॒मग्ने॒ त्वं रोद॑सी नः सु॒मेके॑
pra pī̍paya vṛṣabha̱ jinva̱ vājā̱nagne̱ tvaṃ roda̍sī naḥ su̱doghe̍ |
de̱vebhi̍rdeva su̱rucā̍ rucā̱no mā no̱ marta̍sya durma̱tiḥ pari̍ ṣṭhāt
||6||प्र पी॑पय वृषभ॒ जिन्व॒ वाजा॒नग्ने॒ त्वं रोद॑सी नः सु॒दोघे॑ ।
दे॒वेभि॑र्देव सु॒रुचा॑ रुचा॒नो मा नो॒ मर्त॑स्य दुर्म॒तिः परि॑ ष्ठात्
il̤ā̍magne puru̱daṃsa̍ṃ sa̱niṃ goḥ śa̍śvatta̱maṃ hava̍mānāya sādha |
syānna̍: sū̱nustana̍yo vi̱jāvā 'gne̱ sā te̍ suma̱tirbhū̍tva̱sme
||7||इळा॑मग्ने पुरु॒दंसं॑ स॒निं गोः श॑श्वत्त॒मं हव॑मानाय साध ।
स्यान्न॑: सू॒नुस्तन॑यो वि॒जावा ऽग्ने॒ सा ते॑ सुम॒तिर्भू॑त्व॒स्मे