Study
- Anukramaṇī
- Source
5 gāthino viśvāmitraḥ| indraḥ| bṛhatī|
ā ma̱ndrairi̍ndra̱ hari̍bhiryā̱hi ma̱yūra̍romabhiḥ |
mā tvā̱ ke ci̱nni ya̍ma̱nviṃ na pā̱śino'ti̱ dhanve̍va̱ tām̐ i̍hi
||1||आ म॒न्द्रैरि॑न्द्र॒ हरि॑भिर्या॒हि म॒यूर॑रोमभिः ।
मा त्वा॒ के चि॒न्नि य॑म॒न्विं न पा॒शिनोऽति॒ धन्वे॑व॒ ताँ इ॑हि
vṛ̱tra̱khā̱do va̍laṃru̱jaḥ pu̱rāṃ da̱rmo a̱pāma̱jaḥ |
sthātā̱ ratha̍sya̱ haryo̍rabhisva̱ra indro̍ dṛ̱l̤ahā ci̍dāru̱jaḥ
||2||वृ॒त्र॒खा॒दो व॑लंरु॒जः पु॒रां द॒र्मो अ॒पाम॒जः ।
स्थाता॒ रथ॑स्य॒ हर्यो॑रभिस्व॒र इन्द्रो॑ दृ॒ळहा चि॑दारु॒जः
ga̱mbhī̱rām̐ u̍da̱dhīm̐ri̍va̱ kratu̍ṃ puṣyasi̱ gā i̍va |
pra su̍go̱pā yava̍saṃ dhe̱navo̍ yathā hra̱daṃ ku̱lyā i̍vāśata
||3||ग॒म्भी॒राँ उ॑द॒धीँरि॑व॒ क्रतुं॑ पुष्यसि॒ गा इ॑व ।
प्र सु॑गो॒पा यव॑सं धे॒नवो॑ यथा ह्र॒दं कु॒ल्या इ॑वाशत
ā na̱stuja̍ṃ ra̱yiṃ bha̱rāṃśa̱ṃ na pra̍tijāna̱te |
vṛ̱kṣaṃ pa̱kvaṃ phala̍ma̱ṅkīva̍ dhūnu̱hīndra̍ sa̱mpāra̍ṇa̱ṃ vasu̍
||4||आ न॒स्तुजं॑ र॒यिं भ॒रांशं॒ न प्र॑तिजान॒ते ।
वृ॒क्षं प॒क्वं फल॑म॒ङ्कीव॑ धूनु॒हीन्द्र॑ स॒म्पार॑णं॒ वसु॑
sva̱yuri̍ndra sva̱rāl̤a̍si̱ smaddi̍ṣṭi̱: svaya̍śastaraḥ |
sa vā̍vṛdhā̱na oja̍sā puruṣṭuta̱ bhavā̍ naḥ su̱śrava̍stamaḥ
||5||स्व॒युरि॑न्द्र स्व॒राळ॑सि॒ स्मद्दि॑ष्टि॒: स्वय॑शस्तरः ।
स वा॑वृधा॒न ओज॑सा पुरुष्टुत॒ भवा॑ नः सु॒श्रव॑स्तमः