Study
- Anukramaṇī
- Source
6 gāthino viśvāmitraḥ| agniḥ|1-2, 6 gāyatrī, 3 uṣṇik, 4 triṣṭup, 5 jagatī|
agne̍ ju̱ṣasva̍ no ha̱viḥ pu̍ro̱l̤āśa̍ṃ jātavedaḥ | prā̱ta̱:sā̱ve dhi̍yāvaso
||1||अग्ने॑ जु॒षस्व॑ नो ह॒विः पु॑रो॒ळाशं॑ जातवेदः । प्रा॒त॒:सा॒वे धि॑यावसो
pu̱ro̱l̤ā a̍gne paca̱tastubhya̍ṃ vā ghā̱ pari̍ṣkṛtaḥ | taṃ ju̍ṣasva yaviṣṭhya
||2||पु॒रो॒ळा अ॑ग्ने पच॒तस्तुभ्यं॑ वा घा॒ परि॑ष्कृतः । तं जु॑षस्व यविष्ठ्य
agne̍ vī̱hi pu̍ro̱l̤āśa̱māhu̍taṃ ti̱roa̍hnyam | saha̍saḥ sū̱nura̍syadhva̱re hi̱taḥ
||3||अग्ने॑ वी॒हि पु॑रो॒ळाश॒माहु॑तं ति॒रोअ॑ह्न्यम् । सह॑सः सू॒नुर॑स्यध्व॒रे हि॒तः
mādhya̍ṃdine̱ sava̍ne jātavedaḥ puro̱l̤āśa̍mi̱ha ka̍ve juṣasva |
agne̍ ya̱hvasya̱ tava̍ bhāga̱dheya̱ṃ na pra mi̍nanti vi̱dathe̍ṣu̱ dhīrā̍:
||4||माध्यं॑दिने॒ सव॑ने जातवेदः पुरो॒ळाश॑मि॒ह क॑वे जुषस्व ।
अग्ने॑ य॒ह्वस्य॒ तव॑ भाग॒धेयं॒ न प्र मि॑नन्ति वि॒दथे॑षु॒ धीरा॑:
agne̍ tṛ̱tīye̱ sava̍ne̱ hi kāni̍ṣaḥ puro̱l̤āśa̍ṃ sahasaḥ sūna̱vāhu̍tam |
athā̍ de̱veṣva̍dhva̱raṃ vi̍pa̱nyayā̱ dhā ratna̍vantama̱mṛte̍ṣu̱ jāgṛ̍vim
||5||अग्ने॑ तृ॒तीये॒ सव॑ने॒ हि कानि॑षः पुरो॒ळाशं॑ सहसः सून॒वाहु॑तम् ।
अथा॑ दे॒वेष्व॑ध्व॒रं वि॑प॒न्यया॒ धा रत्न॑वन्तम॒मृते॑षु॒ जागृ॑विम्
agne̍ vṛdhā̱na āhu̍tiṃ puro̱l̤āśa̍ṃ jātavedaḥ | ju̱ṣasva̍ ti̱roa̍hnyam
||6||अग्ने॑ वृधा॒न आहु॑तिं पुरो॒ळाशं॑ जातवेदः । जु॒षस्व॑ ति॒रोअ॑ह्न्यम्