Study
- Anukramaṇī
- Source
11 gāthino viśvāmitraḥ| vaiśvānaro'gniḥ| jagatī|
vai̱śvā̱na̱rāya̍ pṛthu̱pāja̍se̱ vipo̱ ratnā̍ vidhanta dha̱ruṇe̍ṣa̱ca gāta̍ve |
a̱gnirhi de̱vām̐ a̱mṛto̍ duva̱syatyathā̱ dharmā̍ṇi sa̱natā̱ na dū̍duṣat
||1||वै॒श्वा॒न॒राय॑ पृथु॒पाज॑से॒ विपो॒ रत्ना॑ विधन्त ध॒रुणे॑ष॒च गात॑वे ।
अ॒ग्निर्हि दे॒वाँ अ॒मृतो॑ दुव॒स्यत्यथा॒ धर्मा॑णि स॒नता॒ न दू॑दुषत्
a̱ntardū̱to roda̍sī da̱sma ī̍yate̱ hotā̱ niṣa̍tto̱ manu̍ṣaḥ pu̱rohi̍taḥ |
kṣaya̍ṃ bṛ̱hanta̱ṃ pari̍ bhūṣati̱ dyubhi̍rde̱vebhi̍ra̱gniri̍ṣi̱to dhi̱yāva̍suḥ
||2||अ॒न्तर्दू॒तो रोद॑सी द॒स्म ई॑यते॒ होता॒ निष॑त्तो॒ मनु॑षः पु॒रोहि॑तः ।
क्षयं॑ बृ॒हन्तं॒ परि॑ भूषति॒ द्युभि॑र्दे॒वेभि॑र॒ग्निरि॑षि॒तो धि॒याव॑सुः
ke̱tuṃ ya̱jñānā̍ṃ vi̱datha̍sya̱ sādha̍na̱ṃ viprā̍so a̱gniṃ ma̍hayanta̱ citti̍bhiḥ |
apā̍ṃsi̱ yasmi̱nnadhi̍ saṃda̱dhurgira̱stasmi̍ntsu̱mnāni̱ yaja̍māna̱ ā ca̍ke
||3||के॒तुं य॒ज्ञानां॑ वि॒दथ॑स्य॒ साध॑नं॒ विप्रा॑सो अ॒ग्निं म॑हयन्त॒ चित्ति॑भिः ।
अपां॑सि॒ यस्मि॒न्नधि॑ संद॒धुर्गिर॒स्तस्मि॑न्त्सु॒म्नानि॒ यज॑मान॒ आ च॑के
pi̱tā ya̱jñānā̱masu̍ro vipa̱ścitā̍ṃ vi̱māna̍ma̱gnirva̱yuna̍ṃ ca vā̱ghatā̍m |
ā vi̍veśa̱ roda̍sī̱ bhūri̍varpasā purupri̱yo bha̍ndate̱ dhāma̍bhiḥ ka̱viḥ
||4||पि॒ता य॒ज्ञाना॒मसु॑रो विप॒श्चितां॑ वि॒मान॑म॒ग्निर्व॒युनं॑ च वा॒घता॑म् ।
आ वि॑वेश॒ रोद॑सी॒ भूरि॑वर्पसा पुरुप्रि॒यो भ॑न्दते॒ धाम॑भिः क॒विः
ca̱ndrama̱gniṃ ca̱ndrara̍tha̱ṃ hari̍vrataṃ vaiśvāna̱rama̍psu̱ṣada̍ṃ sva̱rvida̍m |
vi̱gā̱haṃ tūrṇi̱ṃ tavi̍ṣībhi̱rāvṛ̍ta̱ṃ bhūrṇi̍ṃ de̱vāsa̍ i̱ha su̱śriya̍ṃ dadhuḥ
||5||च॒न्द्रम॒ग्निं च॒न्द्रर॑थं॒ हरि॑व्रतं वैश्वान॒रम॑प्सु॒षदं॑ स्व॒र्विद॑म् ।
वि॒गा॒हं तूर्णिं॒ तवि॑षीभि॒रावृ॑तं॒ भूर्णिं॑ दे॒वास॑ इ॒ह सु॒श्रियं॑ दधुः
a̱gnirde̱vebhi̱rmanu̍ṣaśca ja̱ntubhi̍stanvā̱no ya̱jñaṃ pu̍ru̱peśa̍saṃ dhi̱yā |
ra̱thīra̱ntarī̍yate̱ sādha̍diṣṭibhirjī̱ro damū̍nā abhiśasti̱cāta̍naḥ
||6||अ॒ग्निर्दे॒वेभि॒र्मनु॑षश्च ज॒न्तुभि॑स्तन्वा॒नो य॒ज्ञं पु॑रु॒पेश॑सं धि॒या ।
र॒थीर॒न्तरी॑यते॒ साध॑दिष्टिभिर्जी॒रो दमू॑ना अभिशस्ति॒चात॑नः
agne̱ jara̍sva svapa̱tya āyu̍nyū̱rjā pi̍nvasva̱ samiṣo̍ didīhi naḥ |
vayā̍ṃsi jinva bṛha̱taśca̍ jāgṛva u̱śigde̱vānā̱masi̍ su̱kratu̍rvi̱pām
||7||अग्ने॒ जर॑स्व स्वप॒त्य आयु॑न्यू॒र्जा पि॑न्वस्व॒ समिषो॑ दिदीहि नः ।
वयां॑सि जिन्व बृह॒तश्च॑ जागृव उ॒शिग्दे॒वाना॒मसि॑ सु॒क्रतु॑र्वि॒पाम्
vi̱śpati̍ṃ ya̱hvamati̍thi̱ṃ nara̱: sadā̍ ya̱ntāra̍ṃ dhī̱nāmu̱śija̍ṃ ca vā̱ghatā̍m |
a̱dhva̱rāṇā̱ṃ ceta̍naṃ jā̱tave̍dasa̱ṃ pra śa̍ṃsanti̱ nama̍sā jū̱tibhi̍rvṛ̱dhe
||8||वि॒श्पतिं॑ य॒ह्वमति॑थिं॒ नर॒: सदा॑ य॒न्तारं॑ धी॒नामु॒शिजं॑ च वा॒घता॑म् ।
अ॒ध्व॒राणां॒ चेत॑नं जा॒तवे॑दसं॒ प्र शं॑सन्ति॒ नम॑सा जू॒तिभि॑र्वृ॒धे
vi̱bhāvā̍ de̱vaḥ su̱raṇa̱: pari̍ kṣi̱tīra̱gnirba̍bhūva̱ śava̍sā su̱madra̍thaḥ |
tasya̍ vra̱tāni̍ bhūripo̱ṣiṇo̍ va̱yamupa̍ bhūṣema̱ dama̱ ā su̍vṛ̱ktibhi̍:
||9||वि॒भावा॑ दे॒वः सु॒रण॒: परि॑ क्षि॒तीर॒ग्निर्ब॑भूव॒ शव॑सा सु॒मद्र॑थः ।
तस्य॑ व्र॒तानि॑ भूरिपो॒षिणो॑ व॒यमुप॑ भूषेम॒ दम॒ आ सु॑वृ॒क्तिभि॑:
vaiśvā̍nara̱ tava̱ dhāmā̱nyā ca̍ke̱ yebhi̍: sva̱rvidabha̍vo vicakṣaṇa |
jā̱ta āpṛ̍ṇo̱ bhuva̍nāni̱ roda̍sī̱ agne̱ tā viśvā̍ pari̱bhūra̍si̱ tmanā̍
||10||वैश्वा॑नर॒ तव॒ धामा॒न्या च॑के॒ येभि॑: स्व॒र्विदभ॑वो विचक्षण ।
जा॒त आपृ॑णो॒ भुव॑नानि॒ रोद॑सी॒ अग्ने॒ ता विश्वा॑ परि॒भूर॑सि॒ त्मना॑
vai̱śvā̱na̱rasya̍ da̱ṃsanā̍bhyo bṛ̱hadari̍ṇā̱deka̍: svapa̱syayā̍ ka̱viḥ |
u̱bhā pi̱tarā̍ ma̱haya̍nnajāyatā̱gnirdyāvā̍pṛthi̱vī bhūri̍retasā
||11||वै॒श्वा॒न॒रस्य॑ दं॒सना॑भ्यो बृ॒हदरि॑णा॒देक॑: स्वप॒स्यया॑ क॒विः ।
उ॒भा पि॒तरा॑ म॒हय॑न्नजायता॒ग्निर्द्यावा॑पृथि॒वी भूरि॑रेतसा