Study
- Anukramaṇī
- Source
9 gāthino viśvāmitraḥ| agniḥ| uṣṇik|
tvāma̍gne manī̱ṣiṇa̍: sa̱mrāja̍ṃ carṣaṇī̱nām | de̱vaṃ martā̍sa indhate̱ sama̍dhva̱re
||1||त्वाम॑ग्ने मनी॒षिण॑: स॒म्राजं॑ चर्षणी॒नाम् । दे॒वं मर्ता॑स इन्धते॒ सम॑ध्व॒रे
tvāṃ ya̱jñeṣvṛ̱tvija̱magne̱ hotā̍ramīl̤ate | go̱pā ṛ̱tasya̍ dīdihi̱ sve dame̍
||2||त्वां य॒ज्ञेष्वृ॒त्विज॒मग्ने॒ होता॑रमीळते । गो॒पा ऋ॒तस्य॑ दीदिहि॒ स्वे दमे॑
sa ghā̱ yaste̱ dadā̍śati sa̱midhā̍ jā̱tave̍dase | so a̍gne dhatte su̱vīrya̱ṃ sa pu̍ṣyati
||3||स घा॒ यस्ते॒ ददा॑शति स॒मिधा॑ जा॒तवे॑दसे । सो अ॑ग्ने धत्ते सु॒वीर्यं॒ स पु॑ष्यति
sa ke̱tura̍dhva̱rāṇā̍ma̱gnirde̱vebhi̱rā ga̍mat | a̱ñjā̱naḥ sa̱pta hotṛ̍bhirha̱viṣma̍te
||4||स के॒तुर॑ध्व॒राणा॑म॒ग्निर्दे॒वेभि॒रा ग॑मत् । अ॒ञ्जा॒नः स॒प्त होतृ॑भिर्ह॒विष्म॑ते
pra hotre̍ pū̱rvyaṃ vaco̱'gnaye̍ bharatā bṛ̱hat | vi̱pāṃ jyotī̍ṃṣi̱ bibhra̍te̱ na ve̱dhase̍
||5||प्र होत्रे॑ पू॒र्व्यं वचो॒ऽग्नये॑ भरता बृ॒हत् । वि॒पां ज्योतीं॑षि॒ बिभ्र॑ते॒ न वे॒धसे॑
a̱gniṃ va̍rdhantu no̱ giro̱ yato̱ jāya̍ta u̱kthya̍: | ma̱he vājā̍ya̱ dravi̍ṇāya darśa̱taḥ
||6||अ॒ग्निं व॑र्धन्तु नो॒ गिरो॒ यतो॒ जाय॑त उ॒क्थ्य॑: । म॒हे वाजा॑य॒ द्रवि॑णाय दर्श॒तः
agne̱ yaji̍ṣṭho adhva̱re de̱vān de̍vaya̱te ya̍ja | hotā̍ ma̱ndro vi rā̍ja̱syati̱ sridha̍:
||7||अग्ने॒ यजि॑ष्ठो अध्व॒रे दे॒वान् दे॑वय॒ते य॑ज । होता॑ म॒न्द्रो वि रा॑ज॒स्यति॒ स्रिध॑:
sa na̍: pāvaka dīdihi dyu̱mada̱sme su̱vīrya̍m | bhavā̍ sto̱tṛbhyo̱ anta̍maḥ sva̱staye̍
||8||स न॑: पावक दीदिहि द्यु॒मद॒स्मे सु॒वीर्य॑म् । भवा॑ स्तो॒तृभ्यो॒ अन्त॑मः स्व॒स्तये॑
taṃ tvā̱ viprā̍ vipa̱nyavo̍ jāgṛ̱vāṃsa̱: sami̍ndhate | ha̱vya̱vāha̱mama̍rtyaṃ saho̱vṛdha̍m
||9||तं त्वा॒ विप्रा॑ विप॒न्यवो॑ जागृ॒वांस॒: समि॑न्धते । ह॒व्य॒वाह॒मम॑र्त्यं सहो॒वृध॑म्