Study
- Anukramaṇī
- Source
5 gāthino viśvāmitraḥ| indraḥ| triṣṭup|
yu̱dhmasya̍ te vṛṣa̱bhasya̍ sva̱rāja̍ u̱grasya̱ yūna̱: sthavi̍rasya̱ ghṛṣve̍: |
ajū̍ryato va̱jriṇo̍ vī̱ryā̱3ṇīndra̍ śru̱tasya̍ maha̱to ma̱hāni̍
||1||यु॒ध्मस्य॑ ते वृष॒भस्य॑ स्व॒राज॑ उ॒ग्रस्य॒ यून॒: स्थवि॑रस्य॒ घृष्वे॑: ।
अजू॑र्यतो व॒ज्रिणो॑ वी॒र्या॒३णीन्द्र॑ श्रु॒तस्य॑ मह॒तो म॒हानि॑
ma̱hām̐ a̍si mahiṣa̱ vṛṣṇye̍bhirdhana̱spṛdu̍gra̱ saha̍māno a̱nyān |
eko̱ viśva̍sya̱ bhuva̍nasya̱ rājā̱ sa yo̱dhayā̍ ca kṣa̱yayā̍ ca̱ janā̍n
||2||म॒हाँ अ॑सि महिष॒ वृष्ण्ये॑भिर्धन॒स्पृदु॑ग्र॒ सह॑मानो अ॒न्यान् ।
एको॒ विश्व॑स्य॒ भुव॑नस्य॒ राजा॒ स यो॒धया॑ च क्ष॒यया॑ च॒ जना॑न्
pra mātrā̍bhī ririce̱ roca̍māna̱: pra de̱vebhi̍rvi̱śvato̱ apra̍tītaḥ |
pra ma̱jmanā̍ di̱va indra̍: pṛthi̱vyāḥ prororma̱ho a̱ntari̍kṣādṛjī̱ṣī
||3||प्र मात्रा॑भी रिरिचे॒ रोच॑मान॒: प्र दे॒वेभि॑र्वि॒श्वतो॒ अप्र॑तीतः ।
प्र म॒ज्मना॑ दि॒व इन्द्र॑: पृथि॒व्याः प्रोरोर्म॒हो अ॒न्तरि॑क्षादृजी॒षी
u̱ruṃ ga̍bhī̱raṃ ja̱nuṣā̱bhyu1graṃ vi̱śvavya̍casamava̱taṃ ma̍tī̱nām |
indra̱ṃ somā̍saḥ pra̱divi̍ su̱tāsa̍: samu̱draṃ na sra̱vata̱ ā vi̍śanti
||4||उ॒रुं ग॑भी॒रं ज॒नुषा॒भ्यु१ग्रं वि॒श्वव्य॑चसमव॒तं म॑ती॒नाम् ।
इन्द्रं॒ सोमा॑सः प्र॒दिवि॑ सु॒तास॑: समु॒द्रं न स्र॒वत॒ आ वि॑शन्ति
yaṃ soma̍mindra pṛthi̱vīdyāvā̱ garbha̱ṃ na mā̱tā bi̍bhṛ̱tastvā̱yā |
taṃ te̍ hinvanti̱ tamu̍ te mṛjantyadhva̱ryavo̍ vṛṣabha̱ pāta̱vā u̍
||5||यं सोम॑मिन्द्र पृथि॒वीद्यावा॒ गर्भं॒ न मा॒ता बि॑भृ॒तस्त्वा॒या ।
तं ते॑ हिन्वन्ति॒ तमु॑ ते मृजन्त्यध्व॒र्यवो॑ वृषभ॒ पात॒वा उ॑