Study
- Anukramaṇī
- Source
5 gāthino viśvāmitraḥ| indraḥ| triṣṭup|
śaṃsā̍ ma̱hāmindra̱ṃ yasmi̱n viśvā̱ ā kṛ̱ṣṭaya̍: soma̱pāḥ kāma̱mavya̍n |
yaṃ su̱kratu̍ṃ dhi̱ṣaṇe̍ vibhvata̱ṣṭaṃ gha̱naṃ vṛ̱trāṇā̍ṃ ja̱naya̍nta de̱vāḥ
||1||शंसा॑ म॒हामिन्द्रं॒ यस्मि॒न् विश्वा॒ आ कृ॒ष्टय॑: सोम॒पाः काम॒मव्य॑न् ।
यं सु॒क्रतुं॑ धि॒षणे॑ विभ्वत॒ष्टं घ॒नं वृ॒त्राणां॑ ज॒नय॑न्त दे॒वाः
yaṃ nu naki̱: pṛta̍nāsu sva̱rāja̍ṃ dvi̱tā tara̍ti̱ nṛta̍maṃ hari̱ṣṭhām |
i̱nata̍ma̱: satva̍bhi̱ryo ha̍ śū̱ṣaiḥ pṛ̍thu̱jrayā̍ aminā̱dāyu̱rdasyo̍:
||2||यं नु नकि॒: पृत॑नासु स्व॒राजं॑ द्वि॒ता तर॑ति॒ नृत॑मं हरि॒ष्ठाम् ।
इ॒नत॑म॒: सत्व॑भि॒र्यो ह॑ शू॒षैः पृ॑थु॒ज्रया॑ अमिना॒दायु॒र्दस्यो॑:
sa̱hāvā̍ pṛ̱tsu ta̱raṇi̱rnārvā̍ vyāna̱śī roda̍sī me̱hanā̍vān |
bhago̱ na kā̱re havyo̍ matī̱nāṃ pi̱teva̱ cāru̍: su̱havo̍ vayo̱dhāḥ
||3||स॒हावा॑ पृ॒त्सु त॒रणि॒र्नार्वा॑ व्यान॒शी रोद॑सी मे॒हना॑वान् ।
भगो॒ न का॒रे हव्यो॑ मती॒नां पि॒तेव॒ चारु॑: सु॒हवो॑ वयो॒धाः
dha̱rtā di̱vo raja̍saspṛ̱ṣṭa ū̱rdhvo ratho̱ na vā̱yurvasu̍bhirni̱yutvā̍n |
kṣa̱pāṃ va̱stā ja̍ni̱tā sūrya̍sya̱ vibha̍ktā bhā̱gaṃ dhi̱ṣaṇe̍va̱ vāja̍m
||4||ध॒र्ता दि॒वो रज॑सस्पृ॒ष्ट ऊ॒र्ध्वो रथो॒ न वा॒युर्वसु॑भिर्नि॒युत्वा॑न् ।
क्ष॒पां व॒स्ता ज॑नि॒ता सूर्य॑स्य॒ विभ॑क्ता भा॒गं धि॒षणे॑व॒ वाज॑म्
śu̱naṃ hu̍vema ma̱ghavā̍na̱mindra̍ma̱smin bhare̱ nṛta̍ma̱ṃ vāja̍sātau |
śṛ̱ṇvanta̍mu̱gramū̱taye̍ sa̱matsu̱ ghnanta̍ṃ vṛ̱trāṇi̍ sa̱ṃjita̱ṃ dhanā̍nām
||5||शु॒नं हु॑वेम म॒घवा॑न॒मिन्द्र॑म॒स्मिन् भरे॒ नृत॑मं॒ वाज॑सातौ ।
शृ॒ण्वन्त॑मु॒ग्रमू॒तये॑ स॒मत्सु॒ घ्नन्तं॑ वृ॒त्राणि॑ सं॒जितं॒ धना॑नाम्