Study
- Anukramaṇī
- Source
6 gāthino viśvāmitraḥ| viśve devāḥ| triṣṭup|
pra me̍ vivi̱kvām̐ a̍vidanmanī̱ṣāṃ dhe̱nuṃ cara̍ntī̱ṃ prayu̍tā̱mago̍pām |
sa̱dyaści̱d yā du̍du̱he bhūri̍ dhā̱serindra̱stada̱gniḥ pa̍ni̱tāro̍ asyāḥ
||1||प्र मे॑ विवि॒क्वाँ अ॑विदन्मनी॒षां धे॒नुं चर॑न्तीं॒ प्रयु॑ता॒मगो॑पाम् ।
स॒द्यश्चि॒द् या दु॑दु॒हे भूरि॑ धा॒सेरिन्द्र॒स्तद॒ग्निः प॑नि॒तारो॑ अस्याः
indra̱: su pū̱ṣā vṛṣa̍ṇā su̱hastā̍ di̱vo na prī̱tāḥ śa̍śa̱yaṃ du̍duhre |
viśve̱ yada̍syāṃ ra̱ṇaya̍nta de̱vāḥ pra vo'tra̍ vasavaḥ su̱mnama̍śyām
||2||इन्द्र॒: सु पू॒षा वृष॑णा सु॒हस्ता॑ दि॒वो न प्री॒ताः श॑श॒यं दु॑दुह्रे ।
विश्वे॒ यद॑स्यां र॒णय॑न्त दे॒वाः प्र वोऽत्र॑ वसवः सु॒म्नम॑श्याम्
yā jā̱mayo̱ vṛṣṇa̍ i̱cchanti̍ śa̱ktiṃ na̍ma̱syantī̍rjānate̱ garbha̍masmin |
acchā̍ pu̱traṃ dhe̱navo̍ vāvaśā̱nā ma̱haśca̍ranti̱ bibhra̍ta̱ṃ vapū̍ṃṣi
||3||या जा॒मयो॒ वृष्ण॑ इ॒च्छन्ति॑ श॒क्तिं न॑म॒स्यन्ती॑र्जानते॒ गर्भ॑मस्मिन् ।
अच्छा॑ पु॒त्रं धे॒नवो॑ वावशा॒ना म॒हश्च॑रन्ति॒ बिभ्र॑तं॒ वपूं॑षि
acchā̍ vivakmi̱ roda̍sī su̱meke̱ grāvṇo̍ yujā̱no a̍dhva̱re ma̍nī̱ṣā |
i̱mā u̍ te̱ mana̍ve̱ bhūri̍vārā ū̱rdhvā bha̍vanti darśa̱tā yaja̍trāḥ
||4||अच्छा॑ विवक्मि॒ रोद॑सी सु॒मेके॒ ग्राव्णो॑ युजा॒नो अ॑ध्व॒रे म॑नी॒षा ।
इ॒मा उ॑ ते॒ मन॑वे॒ भूरि॑वारा ऊ॒र्ध्वा भ॑वन्ति दर्श॒ता यज॑त्राः
yā te̍ ji̱hvā madhu̍matī sume̱dhā agne̍ de̱veṣū̱cyata̍ urū̱cī |
taye̱ha viśvā̱m̐ ava̍se̱ yaja̍trā̱nā sā̍daya pā̱yayā̍ cā̱ madhū̍ni
||5||या ते॑ जि॒ह्वा मधु॑मती सुमे॒धा अग्ने॑ दे॒वेषू॒च्यत॑ उरू॒ची ।
तये॒ह विश्वाँ॒ अव॑से॒ यज॑त्रा॒ना सा॑दय पा॒यया॑ चा॒ मधू॑नि
yā te̍ agne̱ parva̍tasyeva̱ dhārāsa̍ścantī pī̱paya̍d deva ci̱trā |
tāma̱smabhya̱ṃ prama̍tiṃ jātavedo̱ vaso̱ rāsva̍ suma̱tiṃ vi̱śvaja̍nyām
||6||या ते॑ अग्ने॒ पर्व॑तस्येव॒ धारास॑श्चन्ती पी॒पय॑द् देव चि॒त्रा ।
ताम॒स्मभ्यं॒ प्रम॑तिं जातवेदो॒ वसो॒ रास्व॑ सुम॒तिं वि॒श्वज॑न्याम्