Study
- Anukramaṇī
- Source
6 kātya utkīlaḥ| agniḥ| pragāthaḥ(1, 3, 5 bṛhatī, 2, 4, 6 sato bṛhatī)|
a̱yama̱gniḥ su̱vīrya̱syeśe̍ ma̱haḥ saubha̍gasya |
rā̱ya ī̍śe svapa̱tyasya̱ goma̍ta̱ īśe̍ vṛtra̱hathā̍nām
||1||अ॒यम॒ग्निः सु॒वीर्य॒स्येशे॑ म॒हः सौभ॑गस्य ।
रा॒य ई॑शे स्वप॒त्यस्य॒ गोम॑त॒ ईशे॑ वृत्र॒हथा॑नाम्
i̱maṃ na̍ro marutaḥ saścatā̱ vṛdha̱ṃ yasmi̱n rāya̱: śevṛ̍dhāsaḥ |
a̱bhi ye santi̱ pṛta̍nāsu dū̱ḍhyo̍ vi̱śvāhā̱ śatru̍māda̱bhuḥ
||2||इ॒मं न॑रो मरुतः सश्चता॒ वृधं॒ यस्मि॒न् राय॒: शेवृ॑धासः ।
अ॒भि ये सन्ति॒ पृत॑नासु दू॒ढ्यो॑ वि॒श्वाहा॒ शत्रु॑माद॒भुः
sa tvaṃ no̍ rā̱yaḥ śi̍śīhi̱ mīḍhvo̍ agne su̱vīrya̍sya |
tuvi̍dyumna̱ varṣi̍ṣṭhasya pra̱jāva̍to'namī̱vasya̍ śu̱ṣmiṇa̍:
||3||स त्वं नो॑ रा॒यः शि॑शीहि॒ मीढ्वो॑ अग्ने सु॒वीर्य॑स्य ।
तुवि॑द्युम्न॒ वर्षि॑ष्ठस्य प्र॒जाव॑तोऽनमी॒वस्य॑ शु॒ष्मिण॑:
cakri̱ryo viśvā̱ bhuva̍nā̱bhi sā̍sa̱hiścakri̍rde̱veṣvā duva̍: |
ā de̱veṣu̱ yata̍ta̱ ā su̱vīrya̱ ā śaṃsa̍ u̱ta nṛ̱ṇām
||4||चक्रि॒र्यो विश्वा॒ भुव॑ना॒भि सा॑स॒हिश्चक्रि॑र्दे॒वेष्वा दुव॑: ।
आ दे॒वेषु॒ यत॑त॒ आ सु॒वीर्य॒ आ शंस॑ उ॒त नृ॒णाम्
mā no̍ a̱gne'ma̍taye̱ māvīra̍tāyai rīradhaḥ |
māgotā̍yai sahasasputra̱ mā ni̱de'pa̱ dveṣā̱ṃsyā kṛ̍dhi
||5||मा नो॑ अ॒ग्नेऽम॑तये॒ मावीर॑तायै रीरधः ।
मागोता॑यै सहसस्पुत्र॒ मा नि॒देऽप॒ द्वेषां॒स्या कृ॑धि
śa̱gdhi vāja̍sya subhaga pra̱jāva̱to'gne̍ bṛha̱to a̍dhva̱re |
saṃ rā̱yā bhūya̍sā sṛja mayo̱bhunā̱ tuvi̍dyumna̱ yaśa̍svatā
||6||श॒ग्धि वाज॑स्य सुभग प्र॒जाव॒तोऽग्ने॑ बृह॒तो अ॑ध्व॒रे ।
सं रा॒या भूय॑सा सृज मयो॒भुना॒ तुवि॑द्युम्न॒ यश॑स्वता