Study
- Anukramaṇī
- Source
15 gāthino viśvāmitraḥ| agniḥ, 1 ṛtavo vā| gāyatrī|
pra vo̱ vājā̍ a̱bhidya̍vo ha̱viṣma̍nto ghṛ̱tācyā̍ | de̱vāñji̍gāti sumna̱yuḥ
||1||प्र वो॒ वाजा॑ अ॒भिद्य॑वो ह॒विष्म॑न्तो घृ॒ताच्या॑ । दे॒वाञ्जि॑गाति सुम्न॒युः
īl̤e̍ a̱gniṃ vi̍pa̱ścita̍ṃ gi̱rā ya̱jñasya̱ sādha̍nam | śru̱ṣṭī̱vāna̍ṃ dhi̱tāvā̍nam
||2||ईळे॑ अ॒ग्निं वि॑प॒श्चितं॑ गि॒रा य॒ज्ञस्य॒ साध॑नम् । श्रु॒ष्टी॒वानं॑ धि॒तावा॑नम्
agne̍ śa̱kema̍ te va̱yaṃ yama̍ṃ de̱vasya̍ vā̱jina̍: | ati̱ dveṣā̍ṃsi tarema
||3||अग्ने॑ श॒केम॑ ते व॒यं यमं॑ दे॒वस्य॑ वा॒जिन॑: । अति॒ द्वेषां॑सि तरेम
sa̱mi̱dhyamā̍no adhva̱re̱3'gniḥ pā̍va̱ka īḍya̍: | śo̱ciṣke̍śa̱stamī̍mahe
||4||स॒मि॒ध्यमा॑नो अध्व॒रे॒३ऽग्निः पा॑व॒क ईड्य॑: । शो॒चिष्के॑श॒स्तमी॑महे
pṛ̱thu̱pājā̱ ama̍rtyo ghṛ̱tani̍rṇi̱k svā̍hutaḥ | a̱gnirya̱jñasya̍ havya̱vāṭ
||5||पृ॒थु॒पाजा॒ अम॑र्त्यो घृ॒तनि॑र्णि॒क् स्वा॑हुतः । अ॒ग्निर्य॒ज्ञस्य॑ हव्य॒वाट्
taṃ sa̱bādho̍ ya̱tasru̍ca i̱tthā dhi̱yā ya̱jñava̍ntaḥ | ā ca̍krura̱gnimū̱taye̍
||6||तं स॒बाधो॑ य॒तस्रु॑च इ॒त्था धि॒या य॒ज्ञव॑न्तः । आ च॑क्रुर॒ग्निमू॒तये॑
hotā̍ de̱vo ama̍rtyaḥ pu̱rastā̍deti mā̱yayā̍ | vi̱dathā̍ni praco̱daya̍n
||7||होता॑ दे॒वो अम॑र्त्यः पु॒रस्ता॑देति मा॒यया॑ । वि॒दथा॑नि प्रचो॒दय॑न्
vā̱jī vāje̍ṣu dhīyate'dhva̱reṣu̱ pra ṇī̍yate | vipro̍ ya̱jñasya̱ sādha̍naḥ
||8||वा॒जी वाजे॑षु धीयतेऽध्व॒रेषु॒ प्र णी॑यते । विप्रो॑ य॒ज्ञस्य॒ साध॑नः
dhi̱yā ca̍kre̱ vare̍ṇyo bhū̱tānā̱ṃ garbha̱mā da̍dhe | dakṣa̍sya pi̱tara̱ṃ tanā̍
||9||धि॒या च॑क्रे॒ वरे॑ण्यो भू॒तानां॒ गर्भ॒मा द॑धे । दक्ष॑स्य पि॒तरं॒ तना॑
ni tvā̍ dadhe̱ vare̍ṇya̱ṃ dakṣa̍sye̱l̤ā sa̍haskṛta | agne̍ sudī̱timu̱śija̍m
||10||नि त्वा॑ दधे॒ वरे॑ण्यं॒ दक्ष॑स्ये॒ळा स॑हस्कृत । अग्ने॑ सुदी॒तिमु॒शिज॑म्
a̱gniṃ ya̱ntura̍ma̱ptura̍mṛ̱tasya̱ yoge̍ va̱nuṣa̍: | viprā̱ vājai̱: sami̍ndhate
||11||अ॒ग्निं य॒न्तुर॑म॒प्तुर॑मृ॒तस्य॒ योगे॑ व॒नुष॑: । विप्रा॒ वाजै॒: समि॑न्धते
ū̱rjo napā̍tamadhva̱re dī̍di̱vāṃsa̱mupa̱ dyavi̍ | a̱gnimī̍l̤e ka̱vikra̍tum
||12||ऊ॒र्जो नपा॑तमध्व॒रे दी॑दि॒वांस॒मुप॒ द्यवि॑ । अ॒ग्निमी॑ळे क॒विक्र॑तुम्
ī̱l̤enyo̍ nama̱sya̍sti̱rastamā̍ṃsi darśa̱taḥ | sama̱gniri̍dhyate̱ vṛṣā̍
||13||ई॒ळेन्यो॑ नम॒स्य॑स्ति॒रस्तमां॑सि दर्श॒तः । सम॒ग्निरि॑ध्यते॒ वृषा॑
vṛṣo̍ a̱gniḥ sami̍dhya̱te'śvo̱ na de̍va̱vāha̍naḥ | taṃ ha̱viṣma̍nta īl̤ate
||14||वृषो॑ अ॒ग्निः समि॑ध्य॒तेऽश्वो॒ न दे॑व॒वाह॑नः । तं ह॒विष्म॑न्त ईळते
vṛṣa̍ṇaṃ tvā va̱yaṃ vṛ̍ṣa̱n vṛṣa̍ṇa̱: sami̍dhīmahi | agne̱ dīdya̍taṃ bṛ̱hat
||15||वृष॑णं त्वा व॒यं वृ॑ष॒न् वृष॑ण॒: समि॑धीमहि । अग्ने॒ दीद्य॑तं बृ॒हत्