Study
- Anukramaṇī
- Source
5 gāthī kauśikaḥ| agniḥ,| 1triṣṭup, 2-3 anuṣṭup, 4 virāḍ rūpā, 5 satobṛhatī|
i̱maṃ no̍ ya̱jñama̱mṛte̍ṣu dhehī̱mā ha̱vyā jā̍tavedo juṣasva |
sto̱kānā̍magne̱ meda̍so ghṛ̱tasya̱ hota̱: prāśā̍na pratha̱mo ni̱ṣadya̍
||1||इ॒मं नो॑ य॒ज्ञम॒मृते॑षु धेही॒मा ह॒व्या जा॑तवेदो जुषस्व ।
स्तो॒काना॑मग्ने॒ मेद॑सो घृ॒तस्य॒ होत॒: प्राशा॑न प्रथ॒मो नि॒षद्य॑
ghṛ̱tava̍ntaḥ pāvaka te sto̱kāḥ śco̍tanti̱ meda̍saḥ |
svadha̍rman de̱vavī̍taye̱ śreṣṭha̍ṃ no dhehi̱ vārya̍m
||2||घृ॒तव॑न्तः पावक ते स्तो॒काः श्चो॑तन्ति॒ मेद॑सः ।
स्वध॑र्मन् दे॒ववी॑तये॒ श्रेष्ठं॑ नो धेहि॒ वार्य॑म्
tubhya̍ṃ sto̱kā ghṛ̍ta̱ścuto'gne̱ viprā̍ya santya |
ṛṣi̱: śreṣṭha̱: sami̍dhyase ya̱jñasya̍ prāvi̱tā bha̍va
||3||तुभ्यं॑ स्तो॒का घृ॑त॒श्चुतोऽग्ने॒ विप्रा॑य सन्त्य ।
ऋषि॒: श्रेष्ठ॒: समि॑ध्यसे य॒ज्ञस्य॑ प्रावि॒ता भ॑व
tubhya̍ṃ ścotantyadhrigo śacīvaḥ sto̱kāso̍ agne̱ meda̍so ghṛ̱tasya̍ |
ka̱vi̱śa̱sto bṛ̍ha̱tā bhā̱nunāgā̍ ha̱vyā ju̍ṣasva medhira
||4||तुभ्यं॑ श्चोतन्त्यध्रिगो शचीवः स्तो॒कासो॑ अग्ने॒ मेद॑सो घृ॒तस्य॑ ।
क॒वि॒श॒स्तो बृ॑ह॒ता भा॒नुनागा॑ ह॒व्या जु॑षस्व मेधिर
oji̍ṣṭhaṃ te madhya̱to meda̱ udbhṛ̍ta̱ṃ pra te̍ va̱yaṃ da̍dāmahe |
ścota̍nti te vaso sto̱kā adhi̍ tva̱ci prati̱ tān de̍va̱śo vi̍hi
||5||ओजि॑ष्ठं ते मध्य॒तो मेद॒ उद्भृ॑तं॒ प्र ते॑ व॒यं द॑दामहे ।
श्चोत॑न्ति ते वसो स्तो॒का अधि॑ त्व॒चि प्रति॒ तान् दे॑व॒शो वि॑हि