Study
- Anukramaṇī
- Source
5 devaśravā devavātaśca bhāratau| agniḥ|triṣṭup, 3 satobṛhatī|
nirma̍thita̱: sudhi̍ta̱ ā sa̱dhasthe̱ yuvā̍ ka̱vira̍dhva̱rasya̍ praṇe̱tā |
jūrya̍tsva̱gnira̱jaro̱ vane̱ṣvatrā̍ dadhe a̱mṛta̍ṃ jā̱tave̍dāḥ
||1||निर्म॑थित॒: सुधि॑त॒ आ स॒धस्थे॒ युवा॑ क॒विर॑ध्व॒रस्य॑ प्रणे॒ता ।
जूर्य॑त्स्व॒ग्निर॒जरो॒ वने॒ष्वत्रा॑ दधे अ॒मृतं॑ जा॒तवे॑दाः
ama̍nthiṣṭā̱ṃ bhāra̍tā re̱vada̱gniṃ de̱vaśra̍vā de̱vavā̍taḥ su̱dakṣa̍m |
agne̱ vi pa̍śya bṛha̱tābhi rā̱yeṣāṃ no̍ ne̱tā bha̍vatā̱danu̱ dyūn
||2||अम॑न्थिष्टां॒ भार॑ता रे॒वद॒ग्निं दे॒वश्र॑वा दे॒ववा॑तः सु॒दक्ष॑म् ।
अग्ने॒ वि प॑श्य बृह॒ताभि रा॒येषां नो॑ ने॒ता भ॑वता॒दनु॒ द्यून्
daśa̱ kṣipa̍: pū̱rvyaṃ sī̍majījana̱n tsujā̍taṃ mā̱tṛṣu̍ pri̱yam |
a̱gniṃ stu̍hi daivavā̱taṃ de̍vaśravo̱ yo janā̍nā̱masa̍d va̱śī
||3||दश॒ क्षिप॑: पू॒र्व्यं सी॑मजीजन॒न् त्सुजा॑तं मा॒तृषु॑ प्रि॒यम् ।
अ॒ग्निं स्तु॑हि दैववा॒तं दे॑वश्रवो॒ यो जना॑ना॒मस॑द् व॒शी
ni tvā̍ dadhe̱ vara̱ ā pṛ̍thi̱vyā il̤ā̍yāspa̱de su̍dina̱tve ahnā̍m |
dṛ̱ṣadva̍tyā̱ṃ mānu̍ṣa āpa̱yāyā̱ṃ sara̍svatyāṃ re̱vada̍gne didīhi
||4||नि त्वा॑ दधे॒ वर॒ आ पृ॑थि॒व्या इळा॑यास्प॒दे सु॑दिन॒त्वे अह्ना॑म् ।
दृ॒षद्व॑त्यां॒ मानु॑ष आप॒यायां॒ सर॑स्वत्यां रे॒वद॑ग्ने दिदीहि
il̤ā̍magne puru̱daṃsa̍ṃ sa̱niṃ goḥ śa̍śvatta̱maṃ hava̍mānāya sādha |
syānna̍: sū̱nustana̍yo vi̱jāvāgne̱ sā te̍ suma̱tirbhū̍tva̱sme
||5||इळा॑मग्ने पुरु॒दंसं॑ स॒निं गोः श॑श्वत्त॒मं हव॑मानाय साध ।
स्यान्न॑: सू॒नुस्तन॑यो वि॒जावाग्ने॒ सा ते॑ सुम॒तिर्भू॑त्व॒स्मे