Study
- Anukramaṇī
- Source
11 gāthino viśvāmitraḥ| indraḥ| triṣṭup|
indra̍: pū̱rbhidāti̍ra̱ddāsa̍ma̱rkairvi̱dadva̍su̱rdaya̍māno̱ vi śatrū̍n |
brahma̍jūtasta̱nvā̍ vāvṛdhā̱no bhūri̍dātra̱ āpṛ̍ṇa̱droda̍sī u̱bhe
||1||इन्द्र॑: पू॒र्भिदाति॑र॒द्दास॑म॒र्कैर्वि॒दद्व॑सु॒र्दय॑मानो॒ वि शत्रू॑न् ।
ब्रह्म॑जूतस्त॒न्वा॑ वावृधा॒नो भूरि॑दात्र॒ आपृ॑ण॒द्रोद॑सी उ॒भे
ma̱khasya̍ te tavi̱ṣasya̱ pra jū̱timiya̍rmi̱ vāca̍ma̱mṛtā̍ya̱ bhūṣa̍n |
indra̍ kṣitī̱nāma̍si̱ mānu̍ṣīṇāṃ vi̱śāṃ daivī̍nāmu̱ta pū̍rva̱yāvā̍
||2||म॒खस्य॑ ते तवि॒षस्य॒ प्र जू॒तिमिय॑र्मि॒ वाच॑म॒मृता॑य॒ भूष॑न् ।
इन्द्र॑ क्षिती॒नाम॑सि॒ मानु॑षीणां वि॒शां दैवी॑नामु॒त पू॑र्व॒यावा॑
indro̍ vṛ̱trama̍vṛṇo̱cchardha̍nīti̱: pra mā̱yinā̍maminā̱d varpa̍ṇītiḥ |
aha̱n vya̍ṃsamu̱śadha̱gvane̍ṣvā̱virdhenā̍ akṛṇod rā̱myāṇā̍m
||3||इन्द्रो॑ वृ॒त्रम॑वृणो॒च्छर्ध॑नीति॒: प्र मा॒यिना॑ममिना॒द् वर्प॑णीतिः ।
अह॒न् व्यं॑समु॒शध॒ग्वने॑ष्वा॒विर्धेना॑ अकृणोद् रा॒म्याणा॑म्
indra̍: sva̱rṣā ja̱naya̱nnahā̍ni ji̱gāyo̱śigbhi̱: pṛta̍nā abhi̱ṣṭiḥ |
prāro̍caya̱nmana̍ve ke̱tumahnā̱mavi̍nda̱jjyoti̍rbṛha̱te raṇā̍ya
||4||इन्द्र॑: स्व॒र्षा ज॒नय॒न्नहा॑नि जि॒गायो॒शिग्भि॒: पृत॑ना अभि॒ष्टिः ।
प्रारो॑चय॒न्मन॑वे के॒तुमह्ना॒मवि॑न्द॒ज्ज्योति॑र्बृह॒ते रणा॑य
indra̱stujo̍ ba̱rhaṇā̱ ā vi̍veśa nṛ̱vad dadhā̍no̱ naryā̍ pu̱rūṇi̍ |
ace̍taya̱d dhiya̍ i̱mā ja̍ri̱tre premaṃ varṇa̍matiracchu̱kramā̍sām
||5||इन्द्र॒स्तुजो॑ ब॒र्हणा॒ आ वि॑वेश नृ॒वद् दधा॑नो॒ नर्या॑ पु॒रूणि॑ ।
अचे॑तय॒द् धिय॑ इ॒मा ज॑रि॒त्रे प्रेमं वर्ण॑मतिरच्छु॒क्रमा॑साम्
ma̱ho ma̱hāni̍ panayantya̱syendra̍sya̱ karma̱ sukṛ̍tā pu̱rūṇi̍ |
vṛ̱jane̍na vṛji̱nān tsaṃ pi̍peṣa mā̱yābhi̱rdasyū̍m̐ra̱bhibhū̍tyojāḥ
||6||म॒हो म॒हानि॑ पनयन्त्य॒स्येन्द्र॑स्य॒ कर्म॒ सुकृ॑ता पु॒रूणि॑ ।
वृ॒जने॑न वृजि॒नान् त्सं पि॑पेष मा॒याभि॒र्दस्यूँ॑र॒भिभू॑त्योजाः
yu̱dhendro̍ ma̱hnā vari̍vaścakāra de̱vebhya̱: satpa̍tiścarṣaṇi̱prāḥ |
vi̱vasva̍ta̱: sada̍ne asya̱ tāni̱ viprā̍ u̱kthebhi̍: ka̱vayo̍ gṛṇanti
||7||यु॒धेन्द्रो॑ म॒ह्ना वरि॑वश्चकार दे॒वेभ्य॒: सत्प॑तिश्चर्षणि॒प्राः ।
वि॒वस्व॑त॒: सद॑ने अस्य॒ तानि॒ विप्रा॑ उ॒क्थेभि॑: क॒वयो॑ गृणन्ति
sa̱trā̱sāha̱ṃ vare̍ṇyaṃ saho̱dāṃ sa̍sa̱vāṃsa̱ṃ sva̍ra̱paśca̍ de̱vīḥ |
sa̱sāna̱ yaḥ pṛ̍thi̱vīṃ dyāmu̱temāmindra̍ṃ mada̱ntyanu̱ dhīra̍ṇāsaḥ
||8||स॒त्रा॒साहं॒ वरे॑ण्यं सहो॒दां स॑स॒वांसं॒ स्व॑र॒पश्च॑ दे॒वीः ।
स॒सान॒ यः पृ॑थि॒वीं द्यामु॒तेमामिन्द्रं॑ मद॒न्त्यनु॒ धीर॑णासः
sa̱sānātyā̍m̐ u̱ta sūrya̍ṃ sasā̱nendra̍: sasāna puru̱bhoja̍sa̱ṃ gām |
hi̱ra̱ṇyaya̍mu̱ta bhoga̍ṃ sasāna ha̱tvī dasyū̱nprārya̱ṃ varṇa̍māvat
||9||स॒सानात्याँ॑ उ॒त सूर्यं॑ ससा॒नेन्द्र॑: ससान पुरु॒भोज॑सं॒ गाम् ।
हि॒र॒ण्यय॑मु॒त भोगं॑ ससान ह॒त्वी दस्यू॒न्प्रार्यं॒ वर्ण॑मावत्
indra̱ oṣa̍dhīrasano̱dahā̍ni̱ vana̱spatī̍m̐rasanoda̱ntari̍kṣam |
bi̱bheda̍ va̱laṃ nu̍nu̱de vivā̱co'thā̍bhavad dami̱tābhikra̍tūnām
||10||इन्द्र॒ ओष॑धीरसनो॒दहा॑नि॒ वन॒स्पतीँ॑रसनोद॒न्तरि॑क्षम् ।
बि॒भेद॑ व॒लं नु॑नु॒दे विवा॒चोऽथा॑भवद् दमि॒ताभिक्र॑तूनाम्
śu̱naṃ hu̍vema ma̱ghavā̍na̱mindra̍ma̱smin bhare̱ nṛta̍ma̱ṃ vāja̍sātau |
śṛ̱ṇvanta̍mu̱gramū̱taye̍ sa̱matsu̱ ghnanta̍ṃ vṛ̱trāṇi̍ sa̱ṃjita̱ṃ dhanā̍nām
||11||शु॒नं हु॑वेम म॒घवा॑न॒मिन्द्र॑म॒स्मिन् भरे॒ नृत॑मं॒ वाज॑सातौ ।
शृ॒ण्वन्त॑मु॒ग्रमू॒तये॑ स॒मत्सु॒ घ्नन्तं॑ वृ॒त्राणि॑ सं॒जितं॒ धना॑नाम्