Study
- Anukramaṇī
- Source
5 gāthī kauśikaḥ| agniḥ, 4 purīṣyā agnayaḥ | triṣṭup, 4 anuṣṭup|
a̱yaṃ so a̱gniryasmi̱n tsoma̱mindra̍: su̱taṃ da̱dhe ja̱ṭhare̍ vāvaśā̱naḥ |
sa̱ha̱sriṇa̱ṃ vāja̱matya̱ṃ na sapti̍ṃ sasa̱vān tsan tstū̍yase jātavedaḥ
||1||अ॒यं सो अ॒ग्निर्यस्मि॒न् त्सोम॒मिन्द्र॑: सु॒तं द॒धे ज॒ठरे॑ वावशा॒नः ।
स॒ह॒स्रिणं॒ वाज॒मत्यं॒ न सप्तिं॑ सस॒वान् त्सन् त्स्तू॑यसे जातवेदः
agne̱ yat te̍ di̱vi varca̍: pṛthi̱vyāṃ yadoṣa̍dhīṣva̱psvā ya̍jatra |
yenā̱ntari̍kṣamu̱rvā̍ta̱tantha̍ tve̱ṣaḥ sa bhā̱nura̍rṇa̱vo nṛ̱cakṣā̍:
||2||अग्ने॒ यत् ते॑ दि॒वि वर्च॑: पृथि॒व्यां यदोष॑धीष्व॒प्स्वा य॑जत्र ।
येना॒न्तरि॑क्षमु॒र्वा॑त॒तन्थ॑ त्वे॒षः स भा॒नुर॑र्ण॒वो नृ॒चक्षा॑:
agne̍ di̱vo arṇa̱macchā̍ jigā̱syacchā̍ de̱vām̐ ū̍ciṣe̱ dhiṣṇyā̱ ye |
yā ro̍ca̱ne pa̱rastā̱t sūrya̍sya̱ yāścā̱vastā̍dupa̱tiṣṭha̍nta̱ āpa̍:
||3||अग्ने॑ दि॒वो अर्ण॒मच्छा॑ जिगा॒स्यच्छा॑ दे॒वाँ ऊ॑चिषे॒ धिष्ण्या॒ ये ।
या रो॑च॒ने प॒रस्ता॒त् सूर्य॑स्य॒ याश्चा॒वस्ता॑दुप॒तिष्ठ॑न्त॒ आप॑:
pu̱rī̱ṣyā̍so a̱gnaya̍: prāva̱ṇebhi̍: sa̱joṣa̍saḥ |
ju̱ṣantā̍ṃ ya̱jñama̱druho̍'namī̱vā iṣo̍ ma̱hīḥ
||4||पु॒री॒ष्या॑सो अ॒ग्नय॑: प्राव॒णेभि॑: स॒जोष॑सः ।
जु॒षन्तां॑ य॒ज्ञम॒द्रुहो॑ऽनमी॒वा इषो॑ म॒हीः
il̤ā̍magne puru̱daṃsa̍ṃ sa̱niṃ goḥ śa̍śvatta̱maṃ hava̍mānāya sādha |
syānna̍: sū̱nustana̍yo vi̱jāvā 'gne̱ sā te̍ suma̱tirbhū̍tva̱sme
||5||इळा॑मग्ने पुरु॒दंसं॑ स॒निं गोः श॑श्वत्त॒मं हव॑मानाय साध ।
स्यान्न॑: सू॒नुस्तन॑यो वि॒जावा ऽग्ने॒ सा ते॑ सुम॒तिर्भू॑त्व॒स्मे