Study
- Anukramaṇī
- Source
8 gāthino viśvāmitraḥ| indraḥ| triṣṭup|
ā yā̍hya̱rvāṅupa̍ vandhure̱ṣṭhāstavedanu̍ pra̱diva̍: soma̱peya̍m |
pri̱yā sakhā̍yā̱ vi mu̱copa̍ ba̱rhistvāmi̱me ha̍vya̱vāho̍ havante
||1||आ या॑ह्य॒र्वाङुप॑ वन्धुरे॒ष्ठास्तवेदनु॑ प्र॒दिव॑: सोम॒पेय॑म् ।
प्रि॒या सखा॑या॒ वि मु॒चोप॑ ब॒र्हिस्त्वामि॒मे ह॑व्य॒वाहो॑ हवन्ते
ā yā̍hi pū̱rvīrati̍ carṣa̱ṇīrām̐ a̱rya ā̱śiṣa̱ upa̍ no̱ hari̍bhyām |
i̱mā hi tvā̍ ma̱taya̱: stoma̍taṣṭā̱ indra̱ hava̍nte sa̱khyaṃ ju̍ṣā̱ṇāḥ
||2||आ या॑हि पू॒र्वीरति॑ चर्ष॒णीराँ अ॒र्य आ॒शिष॒ उप॑ नो॒ हरि॑भ्याम् ।
इ॒मा हि त्वा॑ म॒तय॒: स्तोम॑तष्टा॒ इन्द्र॒ हव॑न्ते स॒ख्यं जु॑षा॒णाः
ā no̍ ya̱jñaṃ na̍mo̱vṛdha̍ṃ sa̱joṣā̱ indra̍ deva̱ hari̍bhiryāhi̱ tūya̍m |
a̱haṃ hi tvā̍ ma̱tibhi̱rjoha̍vīmi ghṛ̱tapra̍yāḥ sadha̱māde̱ madhū̍nām
||3||आ नो॑ य॒ज्ञं न॑मो॒वृधं॑ स॒जोषा॒ इन्द्र॑ देव॒ हरि॑भिर्याहि॒ तूय॑म् ।
अ॒हं हि त्वा॑ म॒तिभि॒र्जोह॑वीमि घृ॒तप्र॑याः सध॒मादे॒ मधू॑नाम्
ā ca̱ tvāme̱tā vṛṣa̍ṇā̱ vahā̍to̱ harī̱ sakhā̍yā su̱dhurā̱ svaṅgā̍ |
dhā̱nāva̱dindra̱: sava̍naṃ juṣā̱ṇaḥ sakhā̱ sakhyu̍: śṛṇava̱d vanda̍nāni
||4||आ च॒ त्वामे॒ता वृष॑णा॒ वहा॑तो॒ हरी॒ सखा॑या सु॒धुरा॒ स्वङ्गा॑ ।
धा॒नाव॒दिन्द्र॒: सव॑नं जुषा॒णः सखा॒ सख्यु॑: शृणव॒द् वन्द॑नानि
ku̱vinmā̍ go̱pāṃ kara̍se̱ jana̍sya ku̱vid rājā̍naṃ maghavannṛjīṣin |
ku̱vinma̱ ṛṣi̍ṃ papi̱vāṃsa̍ṃ su̱tasya̍ ku̱vinme̱ vasvo̍ a̱mṛta̍sya̱ śikṣā̍:
||5||कु॒विन्मा॑ गो॒पां कर॑से॒ जन॑स्य कु॒विद् राजा॑नं मघवन्नृजीषिन् ।
कु॒विन्म॒ ऋषिं॑ पपि॒वांसं॑ सु॒तस्य॑ कु॒विन्मे॒ वस्वो॑ अ॒मृत॑स्य॒ शिक्षा॑:
ā tvā̍ bṛ̱hanto̱ hara̍yo yujā̱nā a̱rvāgi̍ndra sadha̱mādo̍ vahantu |
pra ye dvi̱tā di̱va ṛ̱ñjantyātā̱: susa̍mmṛṣṭāso vṛṣa̱bhasya̍ mū̱rāḥ
||6||आ त्वा॑ बृ॒हन्तो॒ हर॑यो युजा॒ना अ॒र्वागि॑न्द्र सध॒मादो॑ वहन्तु ।
प्र ये द्वि॒ता दि॒व ऋ॒ञ्जन्त्याता॒: सुस॑म्मृष्टासो वृष॒भस्य॑ मू॒राः
indra̱ piba̱ vṛṣa̍dhūtasya̱ vṛṣṇa̱ ā yaṃ te̍ śye̱na u̍śa̱te ja̱bhāra̍ |
yasya̱ made̍ cyā̱vaya̍si̱ pra kṛ̱ṣṭīryasya̱ made̱ apa̍ go̱trā va̱vartha̍
||7||इन्द्र॒ पिब॒ वृष॑धूतस्य॒ वृष्ण॒ आ यं ते॑ श्ये॒न उ॑श॒ते ज॒भार॑ ।
यस्य॒ मदे॑ च्या॒वय॑सि॒ प्र कृ॒ष्टीर्यस्य॒ मदे॒ अप॑ गो॒त्रा व॒वर्थ॑
śu̱naṃ hu̍vema ma̱ghavā̍na̱mindra̍ma̱smin bhare̱ nṛta̍ma̱ṃ vāja̍sātau |
śṛ̱ṇvanta̍mu̱gramū̱taye̍ sa̱matsu̱ ghnanta̍ṃ vṛ̱trāṇi̍ sa̱ṃjita̱ṃ dhanā̍nām
||8||शु॒नं हु॑वेम म॒घवा॑न॒मिन्द्र॑म॒स्मिन् भरे॒ नृत॑मं॒ वाज॑सातौ ।
शृ॒ण्वन्त॑मु॒ग्रमू॒तये॑ स॒मत्सु॒ घ्नन्तं॑ वृ॒त्राणि॑ सं॒जितं॒ धना॑नाम्