Study
- Anukramaṇī
- Source
5 gāthino viśvāmitraḥ| agniḥ, 4 agnīndrau| virāṭ|
agne̍ di̱vaḥ sū̱nura̍si̱ prace̍tā̱stanā̍ pṛthi̱vyā u̱ta vi̱śvave̍dāḥ |
ṛdha̍gde̱vām̐ i̱ha ya̍jā cikitvaḥ
||1||अग्ने॑ दि॒वः सू॒नुर॑सि॒ प्रचे॑ता॒स्तना॑ पृथि॒व्या उ॒त वि॒श्ववे॑दाः ।
ऋध॑ग्दे॒वाँ इ॒ह य॑जा चिकित्वः
a̱gniḥ sa̍noti vī̱ryā̍ṇi vi̱dvān tsa̱noti̱ vāja̍ma̱mṛtā̍ya̱ bhūṣa̍n |
sa no̍ de̱vām̐ eha va̍hā purukṣo
||2||अ॒ग्निः स॑नोति वी॒र्या॑णि वि॒द्वान् त्स॒नोति॒ वाज॑म॒मृता॑य॒ भूष॑न् ।
स नो॑ दे॒वाँ एह व॑हा पुरुक्षो
a̱gnirdyāvā̍pṛthi̱vī vi̱śvaja̍nye̱ ā bhā̍ti de̱vī a̱mṛte̱ amū̍raḥ |
kṣaya̱n vājai̍: puruśca̱ndro namo̍bhiḥ
||3||अ॒ग्निर्द्यावा॑पृथि॒वी वि॒श्वज॑न्ये॒ आ भा॑ति दे॒वी अ॒मृते॒ अमू॑रः ।
क्षय॒न् वाजै॑: पुरुश्च॒न्द्रो नमो॑भिः
agna̱ indra̍śca dā̱śuṣo̍ duro̱ṇe su̱tāva̍to ya̱jñami̱hopa̍ yātam |
ama̍rdhantā soma̱peyā̍ya devā
||4||अग्न॒ इन्द्र॑श्च दा॒शुषो॑ दुरो॒णे सु॒ताव॑तो य॒ज्ञमि॒होप॑ यातम् ।
अम॑र्धन्ता सोम॒पेया॑य देवा
agne̍ a̱pāṃ sami̍dhyase duro̱ṇe nitya̍: sūno sahaso jātavedaḥ |
sa̱dhasthā̍ni ma̱haya̍māna ū̱tī
||5||अग्ने॑ अ॒पां समि॑ध्यसे दुरो॒णे नित्य॑: सूनो सहसो जातवेदः ।
स॒धस्था॑नि म॒हय॑मान ऊ॒ती