Study
- Anukramaṇī
- Source
9 gāthino viśvāmitraḥ| indraḥ| gāyatrī|
ā tū na̍ indra ma̱drya̍gghuvā̱naḥ soma̍pītaye | hari̍bhyāṃ yāhyadrivaḥ
||1||आ तू न॑ इन्द्र म॒द्र्य॑ग्घुवा॒नः सोम॑पीतये । हरि॑भ्यां याह्यद्रिवः
sa̱tto hotā̍ na ṛ̱tviya̍stisti̱re ba̱rhirā̍nu̱ṣak | ayu̍jranprā̱taradra̍yaḥ
||2||स॒त्तो होता॑ न ऋ॒त्विय॑स्तिस्ति॒रे ब॒र्हिरा॑नु॒षक् । अयु॑ज्रन्प्रा॒तरद्र॑यः
i̱mā brahma̍ brahmavāhaḥ kri̱yanta̱ ā ba̱rhiḥ sī̍da | vī̱hi śū̍ra puro̱l̤āśa̍m
||3||इ॒मा ब्रह्म॑ ब्रह्मवाहः क्रि॒यन्त॒ आ ब॒र्हिः सी॑द । वी॒हि शू॑र पुरो॒ळाश॑म्
rā̱ra̱ndhi sava̍neṣu ṇa e̱ṣu stome̍ṣu vṛtrahan | u̱ktheṣvi̍ndra girvaṇaḥ
||4||रा॒र॒न्धि सव॑नेषु ण ए॒षु स्तोमे॑षु वृत्रहन् । उ॒क्थेष्वि॑न्द्र गिर्वणः
ma̱taya̍: soma̱pāmu̱ruṃ ri̱hanti̱ śava̍sa̱spati̍m | indra̍ṃ va̱tsaṃ na mā̱tara̍:
||5||म॒तय॑: सोम॒पामु॒रुं रि॒हन्ति॒ शव॑स॒स्पति॑म् । इन्द्रं॑ व॒त्सं न मा॒तर॑:
sa ma̍ndasvā̱ hyandha̍so̱ rādha̍se ta̱nvā̍ ma̱he | na sto̱tāra̍ṃ ni̱de ka̍raḥ
||6||स म॑न्दस्वा॒ ह्यन्ध॑सो॒ राध॑से त॒न्वा॑ म॒हे । न स्तो॒तारं॑ नि॒दे क॑रः
va̱yami̍ndra tvā̱yavo̍ ha̱viṣma̍nto jarāmahe | u̱ta tvama̍sma̱yurva̍so
||7||व॒यमि॑न्द्र त्वा॒यवो॑ ह॒विष्म॑न्तो जरामहे । उ॒त त्वम॑स्म॒युर्व॑सो
māre a̱smad vi mu̍muco̱ hari̍priyā̱rvāṅ yā̍hi | indra̍ svadhāvo̱ matsve̱ha
||8||मारे अ॒स्मद् वि मु॑मुचो॒ हरि॑प्रिया॒र्वाङ् या॑हि । इन्द्र॑ स्वधावो॒ मत्स्वे॒ह
a̱rvāñca̍ṃ tvā su̱khe rathe̱ vaha̍tāmindra ke̱śinā̍ | ghṛ̱tasnū̍ ba̱rhirā̱sade̍
||9||अ॒र्वाञ्चं॑ त्वा सु॒खे रथे॒ वह॑तामिन्द्र के॒शिना॑ । घृ॒तस्नू॑ ब॒र्हिरा॒सदे॑