Study
- Anukramaṇī
- Source
9 gāthino viśvāmitraḥ| aśvinau| triṣṭup|
dhe̱nuḥ pra̱tnasya̱ kāmya̱ṃ duhā̍nā̱ 'ntaḥ pu̱traśca̍rati̱ dakṣi̍ṇāyāḥ |
ā dyo̍ta̱niṃ va̍hati śu̱bhrayā̍mo̱ṣasa̱: stomo̍ a̱śvinā̍vajīgaḥ
||1||धे॒नुः प्र॒त्नस्य॒ काम्यं॒ दुहा॑ना॒ ऽन्तः पु॒त्रश्च॑रति॒ दक्षि॑णायाः ।
आ द्यो॑त॒निं व॑हति शु॒भ्रया॑मो॒षस॒: स्तोमो॑ अ॒श्विना॑वजीगः
su̱yug va̍hanti̱ prati̍ vāmṛ̱teno̱rdhvā bha̍vanti pi̱tare̍va̱ medhā̍: |
jare̍thāma̱smad vi pa̱ṇerma̍nī̱ṣāṃ yu̱vorava̍ścakṛ̱mā yā̍tama̱rvāk
||2||सु॒युग् व॑हन्ति॒ प्रति॑ वामृ॒तेनो॒र्ध्वा भ॑वन्ति पि॒तरे॑व॒ मेधा॑: ।
जरे॑थाम॒स्मद् वि प॒णेर्म॑नी॒षां यु॒वोरव॑श्चकृ॒मा या॑तम॒र्वाक्
su̱yugbhi̱raśvai̍: su̱vṛtā̱ rathe̍na̱ dasrā̍vi̱maṃ śṛ̍ṇuta̱ṃ śloka̱madre̍: |
kima̱ṅga vā̱ṃ pratyava̍rti̱ṃ gami̍ṣṭhā̱ ''hurviprā̍so aśvinā purā̱jāḥ
||3||सु॒युग्भि॒रश्वै॑: सु॒वृता॒ रथे॑न॒ दस्रा॑वि॒मं शृ॑णुतं॒ श्लोक॒मद्रे॑: ।
किम॒ङ्ग वां॒ प्रत्यव॑र्तिं॒ गमि॑ष्ठा॒ ऽऽहुर्विप्रा॑सो अश्विना पुरा॒जाः
ā ma̍nyethā̱mā ga̍ta̱ṃ kacci̱devai̱rviśve̱ janā̍so a̱śvinā̍ havante |
i̱mā hi vā̱ṃ goṛ̍jīkā̱ madhū̍ni̱ pra mi̱trāso̱ na da̱duru̱sro agre̍
||4||आ म॑न्येथा॒मा ग॑तं॒ कच्चि॒देवै॒र्विश्वे॒ जना॑सो अ॒श्विना॑ हवन्ते ।
इ॒मा हि वां॒ गोऋ॑जीका॒ मधू॑नि॒ प्र मि॒त्रासो॒ न द॒दुरु॒स्रो अग्रे॑
ti̱raḥ pu̱rū ci̍daśvinā̱ rajā̍ṃsyāṅgū̱ṣo vā̍ṃ maghavānā̱ jane̍ṣu |
eha yā̍taṃ pa̱thibhi̍rdeva̱yānai̱rdasrā̍vi̱me vā̍ṃ ni̱dhayo̱ madhū̍nām
||5||ति॒रः पु॒रू चि॑दश्विना॒ रजां॑स्याङ्गू॒षो वां॑ मघवाना॒ जने॑षु ।
एह या॑तं प॒थिभि॑र्देव॒यानै॒र्दस्रा॑वि॒मे वां॑ नि॒धयो॒ मधू॑नाम्
pu̱rā̱ṇamoka̍: sa̱khyaṃ śi̱vaṃ vā̍ṃ yu̱vorna̍rā̱ dravi̍ṇaṃ ja̱hnāvyā̍m |
puna̍: kṛṇvā̱nāḥ sa̱khyā śi̱vāni̱ madhvā̍ madema sa̱ha nū sa̍mā̱nāḥ
||6||पु॒रा॒णमोक॑: स॒ख्यं शि॒वं वां॑ यु॒वोर्न॑रा॒ द्रवि॑णं ज॒ह्नाव्या॑म् ।
पुन॑: कृण्वा॒नाः स॒ख्या शि॒वानि॒ मध्वा॑ मदेम स॒ह नू स॑मा॒नाः
aśvi̍nā vā̱yunā̍ yu̱vaṃ su̍dakṣā ni̱yudbhi̍śca sa̱joṣa̍sā yuvānā |
nāsa̍tyā ti̱roa̍hnyaṃ juṣā̱ṇā soma̍ṃ pibatama̱sridhā̍ sudānū
||7||अश्वि॑ना वा॒युना॑ यु॒वं सु॑दक्षा नि॒युद्भि॑श्च स॒जोष॑सा युवाना ।
नास॑त्या ति॒रोअ॑ह्न्यं जुषा॒णा सोमं॑ पिबतम॒स्रिधा॑ सुदानू
aśvi̍nā̱ pari̍ vā̱miṣa̍: purū̱cīrī̱yurgī̱rbhiryata̍mānā̱ amṛ̍dhrāḥ |
ratho̍ ha vāmṛta̱jā adri̍jūta̱: pari̱ dyāvā̍pṛthi̱vī yā̍ti sa̱dyaḥ
||8||अश्वि॑ना॒ परि॑ वा॒मिष॑: पुरू॒चीरी॒युर्गी॒र्भिर्यत॑माना॒ अमृ॑ध्राः ।
रथो॑ ह वामृत॒जा अद्रि॑जूत॒: परि॒ द्यावा॑पृथि॒वी या॑ति स॒द्यः
aśvi̍nā madhu̱ṣutta̍mo yu̱vāku̱: soma̱staṃ pā̍ta̱mā ga̍taṃ duro̱ṇe |
ratho̍ ha vā̱ṃ bhūri̱ varpa̱: kari̍krat su̱tāva̍to niṣkṛ̱tamāga̍miṣṭhaḥ
||9||अश्वि॑ना मधु॒षुत्त॑मो यु॒वाकु॒: सोम॒स्तं पा॑त॒मा ग॑तं दुरो॒णे ।
रथो॑ ह वां॒ भूरि॒ वर्प॒: करि॑क्रत् सु॒ताव॑तो निष्कृ॒तमाग॑मिष्ठः