Study
- Anukramaṇī
- Source
7 vāmadevo gautamaḥ| dyāvāpṛthivī|triṣṭup, 5-7 gāyatrī|
ma̱hī dyāvā̍pṛthi̱vī i̱ha jyeṣṭhe̍ ru̱cā bha̍vatāṃ śu̱caya̍dbhira̱rkaiḥ |
yat sī̍ṃ vari̍ṣṭhe bṛha̱tī vi̍mi̱nvan ru̱vaddho̱kṣā pa̍prathā̱nebhi̱revai̍:
||1||म॒ही द्यावा॑पृथि॒वी इ॒ह ज्येष्ठे॑ रु॒चा भ॑वतां शु॒चय॑द्भिर॒र्कैः ।
यत् सीं॑ वरि॑ष्ठे बृह॒ती वि॑मि॒न्वन् रु॒वद्धो॒क्षा प॑प्रथा॒नेभि॒रेवै॑:
de̱vī de̱vebhi̍ryaja̱te yaja̍trai̱rami̍natī tasthaturu̱kṣamā̍ṇe |
ṛ̱tāva̍rī a̱druhā̍ de̱vapu̍tre ya̱jñasya̍ ne̱trī śu̱caya̍dbhira̱rkaiḥ
||2||दे॒वी दे॒वेभि॑र्यज॒ते यज॑त्रै॒रमि॑नती तस्थतुरु॒क्षमा॑णे ।
ऋ॒ताव॑री अ॒द्रुहा॑ दे॒वपु॑त्रे य॒ज्ञस्य॑ ने॒त्री शु॒चय॑द्भिर॒र्कैः
sa it svapā̱ bhuva̍neṣvāsa̱ ya i̱me dyāvā̍pṛthi̱vī ja̱jāna̍ |
u̱rvī ga̍bhī̱re raja̍sī su̱meke̍ ava̱ṃśe dhīra̱: śacyā̱ samai̍rat
||3||स इत् स्वपा॒ भुव॑नेष्वास॒ य इ॒मे द्यावा॑पृथि॒वी ज॒जान॑ ।
उ॒र्वी ग॑भी॒रे रज॑सी सु॒मेके॑ अवं॒शे धीर॒: शच्या॒ समै॑रत्
nū ro̍dasī bṛ̱hadbhi̍rno̱ varū̍thai̱: patnī̍vadbhiri̱ṣaya̍ntī sa̱joṣā̍: |
u̱rū̱cī viśve̍ yaja̱te ni pā̍taṃ dhi̱yā syā̍ma ra̱thya̍: sadā̱sāḥ
||4||नू रो॑दसी बृ॒हद्भि॑र्नो॒ वरू॑थै॒: पत्नी॑वद्भिरि॒षय॑न्ती स॒जोषा॑: ।
उ॒रू॒ची विश्वे॑ यज॒ते नि पा॑तं धि॒या स्या॑म र॒थ्य॑: सदा॒साः
pra vā̱ṃ mahi̱ dyavī̍ a̱bhyupa̍stutiṃ bharāmahe | śucī̱ upa̱ praśa̍staye
||5||प्र वां॒ महि॒ द्यवी॑ अ॒भ्युप॑स्तुतिं भरामहे । शुची॒ उप॒ प्रश॑स्तये
pu̱nā̱ne ta̱nvā̍ mi̱thaḥ svena̱ dakṣe̍ṇa rājathaḥ | ū̱hyāthe̍ sa̱nādṛ̱tam
||6||पु॒ना॒ने त॒न्वा॑ मि॒थः स्वेन॒ दक्षे॑ण राजथः । ऊ॒ह्याथे॑ स॒नादृ॒तम्
ma̱hī mi̱trasya̍ sādhatha̱stara̍ntī̱ pipra̍tī ṛ̱tam | pari̍ ya̱jñaṃ ni ṣe̍dathuḥ
||7||म॒ही मि॒त्रस्य॑ साधथ॒स्तर॑न्ती॒ पिप्र॑ती ऋ॒तम् । परि॑ य॒ज्ञं नि षे॑दथुः