Sūktam 45 — pṛkṣāso (7 mantras) — Śākala Saṃhitā (Ṛgveda)

Study

e̱ṣa sya bhā̱nurudi̍yarti yu̱jyate̱ ratha̱: pari̍jmā di̱vo a̱sya sāna̍vi |

pṛ̱kṣāso̍ asmin mithu̱nā adhi̱ trayo̱ dṛti̍stu̱rīyo̱ madhu̍no̱ vi ra̍pśate

||1||

ए॒ष स्य भा॒नुरुदि॑यर्ति यु॒ज्यते॒ रथ॒: परि॑ज्मा दि॒वो अ॒स्य सान॑वि ।

पृ॒क्षासो॑ अस्मिन् मिथु॒ना अधि॒ त्रयो॒ दृति॑स्तु॒रीयो॒ मधु॑नो॒ वि र॑प्शते

ud vā̍ṃ pṛ̱kṣāso̱ madhu̍manta īrate̱ rathā̱ aśvā̍sa u̱ṣaso̱ vyu̍ṣṭiṣu |

a̱po̱rṇu̱vanta̱stama̱ ā parī̍vṛta̱ṃ sva1rṇa śu̱kraṃ ta̱nvanta̱ ā raja̍:

||2||

उद् वां॑ पृ॒क्षासो॒ मधु॑मन्त ईरते॒ रथा॒ अश्वा॑स उ॒षसो॒ व्यु॑ष्टिषु ।

अ॒पो॒र्णु॒वन्त॒स्तम॒ आ परी॑वृतं॒ स्व१र्ण शु॒क्रं त॒न्वन्त॒ आ रज॑:

madhva̍: pibataṃ madhu̱pebhi̍rā̱sabhi̍ru̱ta pri̱yaṃ madhu̍ne yuñjāthā̱ṃ ratha̍m |

ā va̍rta̱niṃ madhu̍nā jinvathaspa̱tho dṛti̍ṃ vahethe̱ madhu̍mantamaśvinā

||3||

मध्व॑: पिबतं मधु॒पेभि॑रा॒सभि॑रु॒त प्रि॒यं मधु॑ने युञ्जाथां॒ रथ॑म् ।

आ व॑र्त॒निं मधु॑ना जिन्वथस्प॒थो दृतिं॑ वहेथे॒ मधु॑मन्तमश्विना

ha̱ṃsāso̱ ye vā̱ṃ madhu̍manto a̱sridho̱ hira̍ṇyaparṇā u̱huva̍ uṣa̱rbudha̍: |

u̱da̱pruto̍ ma̱ndino̍ mandini̱spṛśo̱ madhvo̱ na makṣa̱: sava̍nāni gacchathaḥ

||4||

हं॒सासो॒ ये वां॒ मधु॑मन्तो अ॒स्रिधो॒ हिर॑ण्यपर्णा उ॒हुव॑ उष॒र्बुध॑: ।

उ॒द॒प्रुतो॑ म॒न्दिनो॑ मन्दिनि॒स्पृशो॒ मध्वो॒ न मक्ष॒: सव॑नानि गच्छथः

sva̱dhva̱rāso̱ madhu̍manto a̱gnaya̍ u̱srā ja̍rante̱ prati̱ vasto̍ra̱śvinā̍ |

yanni̱ktaha̍stasta̱raṇi̍rvicakṣa̱ṇaḥ soma̍ṃ su̱ṣāva̱ madhu̍manta̱madri̍bhiḥ

||5||

स्व॒ध्व॒रासो॒ मधु॑मन्तो अ॒ग्नय॑ उ॒स्रा ज॑रन्ते॒ प्रति॒ वस्तो॑र॒श्विना॑ ।

यन्नि॒क्तह॑स्तस्त॒रणि॑र्विचक्ष॒णः सोमं॑ सु॒षाव॒ मधु॑मन्त॒मद्रि॑भिः

ā̱ke̱ni̱pāso̱ aha̍bhi̱rdavi̍dhvata̱: sva1rṇa śu̱kraṃ ta̱nvanta̱ ā raja̍: |

sūra̍ści̱daśvā̍n yuyujā̱na ī̍yate̱ viśvā̱m̐ anu̍ sva̱dhayā̍ cetathaspa̱thaḥ

||6||

आ॒के॒नि॒पासो॒ अह॑भि॒र्दवि॑ध्वत॒: स्व१र्ण शु॒क्रं त॒न्वन्त॒ आ रज॑: ।

सूर॑श्चि॒दश्वा॑न् युयुजा॒न ई॑यते॒ विश्वाँ॒ अनु॑ स्व॒धया॑ चेतथस्प॒थः

pra vā̍mavocamaśvinā dhiya̱ṃdhā ratha̱: svaśvo̍ a̱jaro̱ yo asti̍ |

yena̍ sa̱dyaḥ pari̱ rajā̍ṃsi yā̱tho ha̱viṣma̍ntaṃ ta̱raṇi̍ṃ bho̱jamaccha̍

||7||

प्र वा॑मवोचमश्विना धियं॒धा रथ॒: स्वश्वो॑ अ॒जरो॒ यो अस्ति॑ ।

येन॑ स॒द्यः परि॒ रजां॑सि या॒थो ह॒विष्म॑न्तं त॒रणिं॑ भो॒जमच्छ॑