Study
- Anukramaṇī
- Source
5 vāmadevo gautamaḥ| agniḥ(liṅgoktadevatā iti eke)|triṣṭup|
pratya̱gniru̱ṣasā̱magra̍makhyad vibhātī̱nāṃ su̱manā̍ ratna̱dheya̍m |
yā̱tama̍śvinā su̱kṛto̍ duro̱ṇamutsūryo̱ jyoti̍ṣā de̱va e̍ti
||1||प्रत्य॒ग्निरु॒षसा॒मग्र॑मख्यद् विभाती॒नां सु॒मना॑ रत्न॒धेय॑म् ।
या॒तम॑श्विना सु॒कृतो॑ दुरो॒णमुत्सूर्यो॒ ज्योति॑षा दे॒व ए॑ति
ū̱rdhvaṃ bhā̱nuṃ sa̍vi̱tā de̱vo a̍śred dra̱psaṃ davi̍dhvad gavi̱ṣo na satvā̍ |
anu̍ vra̱taṃ varu̍ṇo yanti mi̱tro yatsūrya̍ṃ di̱vyā̍ro̱haya̍nti
||2||ऊ॒र्ध्वं भा॒नुं स॑वि॒ता दे॒वो अ॑श्रेद् द्र॒प्सं दवि॑ध्वद् गवि॒षो न सत्वा॑ ।
अनु॑ व्र॒तं वरु॑णो यन्ति मि॒त्रो यत्सूर्यं॑ दि॒व्या॑रो॒हय॑न्ति
yaṃ sī̱makṛ̍ṇva̱n tama̍se vi̱pṛce̍ dhru̱vakṣe̍mā̱ ana̍vasyanto̱ artha̍m |
taṃ sūrya̍ṃ ha̱rita̍: sa̱pta ya̱hvīḥ spaśa̱ṃ viśva̍sya̱ jaga̍to vahanti
||3||यं सी॒मकृ॑ण्व॒न् तम॑से वि॒पृचे॑ ध्रु॒वक्षे॑मा॒ अन॑वस्यन्तो॒ अर्थ॑म् ।
तं सूर्यं॑ ह॒रित॑: स॒प्त य॒ह्वीः स्पशं॒ विश्व॑स्य॒ जग॑तो वहन्ति
vahi̍ṣṭhebhirvi̱hara̍nyāsi̱ tantu̍mava̱vyaya̱nnasi̍taṃ deva̱ vasma̍ |
davi̍dhvato ra̱śmaya̱: sūrya̍sya̱ carme̱vāvā̍dhu̱stamo̍ a̱psva1ntaḥ
||4||वहि॑ष्ठेभिर्वि॒हर॑न्यासि॒ तन्तु॑मव॒व्यय॒न्नसि॑तं देव॒ वस्म॑ ।
दवि॑ध्वतो र॒श्मय॒: सूर्य॑स्य॒ चर्मे॒वावा॑धु॒स्तमो॑ अ॒प्स्व१न्तः
anā̍yato̱ ani̍baddhaḥ ka̱thāyaṃ nya̍ṅṅuttā̱no'va̍ padyate̱ na |
kayā̍ yāti sva̱dhayā̱ ko da̍darśa di̱vaḥ ska̱mbhaḥ samṛ̍taḥ pāti̱ nāka̍m
||5||अना॑यतो॒ अनि॑बद्धः क॒थायं न्य॑ङ्ङुत्ता॒नोऽव॑ पद्यते॒ न ।
कया॑ याति स्व॒धया॒ को द॑दर्श दि॒वः स्क॒म्भः समृ॑तः पाति॒ नाक॑म्