Study
- Anukramaṇī
- Source
7 vāmadevo gautamaḥ| indravāyū, 1 vāyuḥ| gāyatrī|
agra̍ṃ pibā̱ madhū̍nāṃ su̱taṃ vā̍yo̱ divi̍ṣṭiṣu | tvaṃ hi pū̍rva̱pā asi̍
||1||अग्रं॑ पिबा॒ मधू॑नां सु॒तं वा॑यो॒ दिवि॑ष्टिषु । त्वं हि पू॑र्व॒पा असि॑
śa̱tenā̍ no a̱bhiṣṭi̍bhirni̱yutvā̱m̐ indra̍sārathiḥ | vāyo̍ su̱tasya̍ tṛmpatam
||2||श॒तेना॑ नो अ॒भिष्टि॑भिर्नि॒युत्वाँ॒ इन्द्र॑सारथिः । वायो॑ सु॒तस्य॑ तृम्पतम्
ā vā̍ṃ sa̱hasra̱ṃ hara̍ya̱ indra̍vāyū a̱bhi praya̍: | vaha̍ntu̱ soma̍pītaye
||3||आ वां॑ स॒हस्रं॒ हर॑य॒ इन्द्र॑वायू अ॒भि प्रय॑: । वह॑न्तु॒ सोम॑पीतये
ratha̱ṃ hira̍ṇyavandhura̱mindra̍vāyū svadhva̱ram | ā hi sthātho̍ divi̱spṛśa̍m
||4||रथं॒ हिर॑ण्यवन्धुर॒मिन्द्र॑वायू स्वध्व॒रम् । आ हि स्थाथो॑ दिवि॒स्पृश॑म्
rathe̍na pṛthu̱pāja̍sā dā̱śvāṃsa̱mupa̍ gacchatam | indra̍vāyū i̱hā ga̍tam
||5||रथे॑न पृथु॒पाज॑सा दा॒श्वांस॒मुप॑ गच्छतम् । इन्द्र॑वायू इ॒हा ग॑तम्
indra̍vāyū a̱yaṃ su̱tastaṃ de̱vebhi̍: sa̱joṣa̍sā | piba̍taṃ dā̱śuṣo̍ gṛ̱he
||6||इन्द्र॑वायू अ॒यं सु॒तस्तं दे॒वेभि॑: स॒जोष॑सा । पिब॑तं दा॒शुषो॑ गृ॒हे
i̱ha pra̱yāṇa̍mastu vā̱mindra̍vāyū vi̱moca̍nam | i̱ha vā̱ṃ soma̍pītaye
||7||इ॒ह प्र॒याण॑मस्तु वा॒मिन्द्र॑वायू वि॒मोच॑नम् । इ॒ह वां॒ सोम॑पीतये