Study
- Anukramaṇī
- Source
7 purumīl̤ahājamīl̤ahau sauhotrau| aśvinau| triṣṭup|
ka u̍ śravatkata̱mo ya̱jñiyā̍nāṃ va̱ndāru̍ de̱vaḥ ka̍ta̱mo ju̍ṣāte |
kasye̱māṃ de̱vīma̱mṛte̍ṣu̱ preṣṭhā̍ṃ hṛ̱di śre̍ṣāma suṣṭu̱tiṃ su̍ha̱vyām
||1||क उ॑ श्रवत्कत॒मो य॒ज्ञिया॑नां व॒न्दारु॑ दे॒वः क॑त॒मो जु॑षाते ।
कस्ये॒मां दे॒वीम॒मृते॑षु॒ प्रेष्ठां॑ हृ॒दि श्रे॑षाम सुष्टु॒तिं सु॑ह॒व्याम्
ko mṛ̍l̤āti kata̱ma āga̍miṣṭho de̱vānā̍mu kata̱maḥ śambha̍viṣṭhaḥ |
ratha̱ṃ kamā̍hurdra̱vada̍śvamā̱śuṃ yaṃ sūrya̍sya duhi̱tāvṛ̍ṇīta
||2||को मृ॑ळाति कत॒म आग॑मिष्ठो दे॒वाना॑मु कत॒मः शम्भ॑विष्ठः ।
रथं॒ कमा॑हुर्द्र॒वद॑श्वमा॒शुं यं सूर्य॑स्य दुहि॒तावृ॑णीत
ma̱kṣū hi ṣmā̱ gaccha̍tha̱ īva̍to̱ dyūnindro̱ na śa̱ktiṃ pari̍takmyāyām |
di̱va ājā̍tā di̱vyā su̍pa̱rṇā kayā̱ śacī̍nāṃ bhavatha̱: śaci̍ṣṭhā
||3||म॒क्षू हि ष्मा॒ गच्छ॑थ॒ ईव॑तो॒ द्यूनिन्द्रो॒ न श॒क्तिं परि॑तक्म्यायाम् ।
दि॒व आजा॑ता दि॒व्या सु॑प॒र्णा कया॒ शची॑नां भवथ॒: शचि॑ष्ठा
kā vā̍ṃ bhū̱dupa̍māti̱: kayā̍ na̱ āśvi̍nā gamatho hū̱yamā̍nā |
ko vā̍ṃ ma̱haści̱t tyaja̍so a̱bhīka̍ uru̱ṣyata̍ṃ mādhvī dasrā na ū̱tī
||4||का वां॑ भू॒दुप॑माति॒: कया॑ न॒ आश्वि॑ना गमथो हू॒यमा॑ना ।
को वां॑ म॒हश्चि॒त् त्यज॑सो अ॒भीक॑ उरु॒ष्यतं॑ माध्वी दस्रा न ऊ॒ती
u̱ru vā̱ṃ ratha̱: pari̍ nakṣati̱ dyāmā yat sa̍mu̱drāda̱bhi varta̍te vām |
madhvā̍ mādhvī̱ madhu̍ vāṃ pruṣāya̱n yat sī̍ṃ vā̱ṃ pṛkṣo̍ bhu̱raja̍nta pa̱kvāḥ
||5||उ॒रु वां॒ रथ॒: परि॑ नक्षति॒ द्यामा यत् स॑मु॒द्राद॒भि वर्त॑ते वाम् ।
मध्वा॑ माध्वी॒ मधु॑ वां प्रुषाय॒न् यत् सीं॑ वां॒ पृक्षो॑ भु॒रज॑न्त प॒क्वाः
sindhu̍rha vāṃ ra̱sayā̍ siñca̱daśvā̍n ghṛ̱ṇā vayo̍'ru̱ṣāsa̱: pari̍ gman |
tadū̱ ṣu vā̍maji̱raṃ ce̍ti̱ yāna̱ṃ yena̱ patī̱ bhava̍thaḥ sū̱ryāyā̍:
||6||सिन्धु॑र्ह वां र॒सया॑ सिञ्च॒दश्वा॑न् घृ॒णा वयो॑ऽरु॒षास॒: परि॑ ग्मन् ।
तदू॒ षु वा॑मजि॒रं चे॑ति॒ यानं॒ येन॒ पती॒ भव॑थः सू॒र्याया॑:
i̱heha̱ yad vā̍ṃ sama̱nā pa̍pṛ̱kṣe seyama̱sme su̍ma̱tirvā̍jaratnā |
u̱ru̱ṣyata̍ṃ jari̱tāra̍ṃ yu̱vaṃ ha̍ śri̱taḥ kāmo̍ nāsatyā yuva̱drik
||7||इ॒हेह॒ यद् वां॑ सम॒ना प॑पृ॒क्षे सेयम॒स्मे सु॑म॒तिर्वा॑जरत्ना ।
उ॒रु॒ष्यतं॑ जरि॒तारं॑ यु॒वं ह॑ श्रि॒तः कामो॑ नासत्या युव॒द्रिक्