Study
- Anukramaṇī
- Source
11 vāmadevo gautamaḥ| indraḥ| triṣṭup|
yanna̱ indro̍ juju̱ṣe yacca̱ vaṣṭi̱ tanno̍ ma̱hān ka̍rati śu̱ṣmyā ci̍t |
brahma̱ stoma̍ṃ ma̱ghavā̱ soma̍mu̱kthā yo aśmā̍na̱ṃ śava̍sā̱ bibhra̱deti̍
||1||यन्न॒ इन्द्रो॑ जुजु॒षे यच्च॒ वष्टि॒ तन्नो॑ म॒हान् क॑रति शु॒ष्म्या चि॑त् ।
ब्रह्म॒ स्तोमं॑ म॒घवा॒ सोम॑मु॒क्था यो अश्मा॑नं॒ शव॑सा॒ बिभ्र॒देति॑
vṛṣā̱ vṛṣa̍ndhi̱ṃ catu̍raśri̱masya̍nnu̱gro bā̱hubhyā̱ṃ nṛta̍ma̱: śacī̍vān |
śri̱ye paru̍ṣṇīmu̱ṣamā̍ṇa̱ ūrṇā̱ṃ yasyā̱: parvā̍ṇi sa̱khyāya̍ vi̱vye
||2||वृषा॒ वृष॑न्धिं॒ चतु॑रश्रि॒मस्य॑न्नु॒ग्रो बा॒हुभ्यां॒ नृत॑म॒: शची॑वान् ।
श्रि॒ये परु॑ष्णीमु॒षमा॑ण॒ ऊर्णां॒ यस्या॒: पर्वा॑णि स॒ख्याय॑ वि॒व्ये
yo de̱vo de̱vata̍mo̱ jāya̍māno ma̱ho vāje̍bhirma̱hadbhi̍śca̱ śuṣmai̍: |
dadhā̍no̱ vajra̍ṃ bā̱hvoru̱śanta̱ṃ dyāmame̍na rejaya̱t pra bhūma̍
||3||यो दे॒वो दे॒वत॑मो॒ जाय॑मानो म॒हो वाजे॑भिर्म॒हद्भि॑श्च॒ शुष्मै॑: ।
दधा॑नो॒ वज्रं॑ बा॒ह्वोरु॒शन्तं॒ द्याममे॑न रेजय॒त् प्र भूम॑
viśvā̱ rodhā̍ṃsi pra̱vata̍śca pū̱rvīrdyaurṛ̱ṣvājjani̍man rejata̱ kṣāḥ |
ā mā̱tarā̱ bhara̍ti śu̱ṣmyā gornṛ̱vat pari̍jman nonuvanta̱ vātā̍:
||4||विश्वा॒ रोधां॑सि प्र॒वत॑श्च पू॒र्वीर्द्यौर्ऋ॒ष्वाज्जनि॑मन् रेजत॒ क्षाः ।
आ मा॒तरा॒ भर॑ति शु॒ष्म्या गोर्नृ॒वत् परि॑ज्मन् नोनुवन्त॒ वाता॑:
tā tū ta̍ indra maha̱to ma̱hāni̱ viśve̱ṣvit sava̍neṣu pra̱vācyā̍ |
yacchū̍ra dhṛṣṇo dhṛṣa̱tā da̍dhṛ̱ṣvānahi̱ṃ vajre̍ṇa̱ śava̱sāvi̍veṣīḥ
||5||ता तू त॑ इन्द्र मह॒तो म॒हानि॒ विश्वे॒ष्वित् सव॑नेषु प्र॒वाच्या॑ ।
यच्छू॑र धृष्णो धृष॒ता द॑धृ॒ष्वानहिं॒ वज्रे॑ण॒ शव॒सावि॑वेषीः
tā tū te̍ sa̱tyā tu̍vinṛmṇa̱ viśvā̱ pra dhe̱nava̍: sisrate̱ vṛṣṇa̱ ūdhna̍: |
adhā̍ ha̱ tvad vṛ̍ṣamaṇo bhiyā̱nāḥ pra sindha̍vo̱ java̍sā cakramanta
||6||ता तू ते॑ स॒त्या तु॑विनृम्ण॒ विश्वा॒ प्र धे॒नव॑: सिस्रते॒ वृष्ण॒ ऊध्न॑: ।
अधा॑ ह॒ त्वद् वृ॑षमणो भिया॒नाः प्र सिन्ध॑वो॒ जव॑सा चक्रमन्त
atrāha̍ te hariva̱stā u̍ de̱vīravo̍bhirindra stavanta̱ svasā̍raḥ |
yat sī̱manu̱ pra mu̱co ba̍dbadhā̱nā dī̱rghāmanu̱ prasi̍tiṃ syanda̱yadhyai̍
||7||अत्राह॑ ते हरिव॒स्ता उ॑ दे॒वीरवो॑भिरिन्द्र स्तवन्त॒ स्वसा॑रः ।
यत् सी॒मनु॒ प्र मु॒चो ब॑द्बधा॒ना दी॒र्घामनु॒ प्रसि॑तिं स्यन्द॒यध्यै॑
pi̱pī̱l̤e a̱ṃśurmadyo̱ na sindhu̱rā tvā̱ śamī̍ śaśamā̱nasya̍ śa̱ktiḥ |
a̱sma̱drya̍k śuśucā̱nasya̍ yamyā ā̱śurna ra̱śmiṃ tu̱vyoja̍sa̱ṃ goḥ
||8||पि॒पी॒ळे अं॒शुर्मद्यो॒ न सिन्धु॒रा त्वा॒ शमी॑ शशमा॒नस्य॑ श॒क्तिः ।
अ॒स्म॒द्र्य॑क् शुशुचा॒नस्य॑ यम्या आ॒शुर्न र॒श्मिं तु॒व्योज॑सं॒ गोः
a̱sme varṣi̍ṣṭhā kṛṇuhi̱ jyeṣṭhā̍ nṛ̱mṇāni̍ sa̱trā sa̍hure̱ sahā̍ṃsi |
a̱smabhya̍ṃ vṛ̱trā su̱hanā̍ni randhi ja̱hi vadha̍rva̱nuṣo̱ martya̍sya
||9||अ॒स्मे वर्षि॑ष्ठा कृणुहि॒ ज्येष्ठा॑ नृ॒म्णानि॑ स॒त्रा स॑हुरे॒ सहां॑सि ।
अ॒स्मभ्यं॑ वृ॒त्रा सु॒हना॑नि रन्धि ज॒हि वध॑र्व॒नुषो॒ मर्त्य॑स्य
a̱smāka̱mit su śṛ̍ṇuhi̱ tvami̍ndrā̱'smabhya̍ṃ ci̱trām̐ upa̍ māhi̱ vājā̍n |
a̱smabhya̱ṃ viśvā̍ iṣaṇa̱: pura̍ṃdhīra̱smāka̱ṃ su ma̍ghavan bodhi go̱dāḥ
||10||अ॒स्माक॒मित् सु शृ॑णुहि॒ त्वमि॑न्द्रा॒ऽस्मभ्यं॑ चि॒त्राँ उप॑ माहि॒ वाजा॑न् ।
अ॒स्मभ्यं॒ विश्वा॑ इषण॒: पुरं॑धीर॒स्माकं॒ सु म॑घवन् बोधि गो॒दाः
nū ṣṭu̱ta i̍ndra̱ nū gṛ̍ṇā̱na iṣa̍ṃ jari̱tre na̱dyo̱3 na pī̍peḥ |
akā̍ri te harivo̱ brahma̱ navya̍ṃ dhi̱yā syā̍ma ra̱thya̍: sadā̱sāḥ
||11||नू ष्टु॒त इ॑न्द्र॒ नू गृ॑णा॒न इषं॑ जरि॒त्रे न॒द्यो॒३ न पी॑पेः ।
अका॑रि ते हरिवो॒ ब्रह्म॒ नव्यं॑ धि॒या स्या॑म र॒थ्य॑: सदा॒साः