Study
- Anukramaṇī
- Source
7 vāmadevo gautamaḥ, 1-3 indro vā| 1-3 indraḥ, ātmā vā, 4-7 śyenaḥ| triṣṭup|
a̱haṃ manu̍rabhava̱ṃ sūrya̍ścā̱haṃ ka̱kṣīvā̱m̐ ṛṣi̍rasmi̱ vipra̍: |
a̱haṃ kutsa̍mārjune̱yaṃ nyṛ̍ñje̱'haṃ ka̱viru̱śanā̱ paśya̍tā mā
||1||अ॒हं मनु॑रभवं॒ सूर्य॑श्चा॒हं क॒क्षीवाँ॒ ऋषि॑रस्मि॒ विप्र॑: ।
अ॒हं कुत्स॑मार्जुने॒यं न्यृ॑ञ्जे॒ऽहं क॒विरु॒शना॒ पश्य॑ता मा
a̱haṃ bhūmi̍madadā̱māryā̍yā̱'haṃ vṛ̱ṣṭiṃ dā̱śuṣe̱ martyā̍ya |
a̱hama̱po a̍nayaṃ vāvaśā̱nā mama̍ de̱vāso̱ anu̱ keta̍māyan
||2||अ॒हं भूमि॑मददा॒मार्या॑या॒ऽहं वृ॒ष्टिं दा॒शुषे॒ मर्त्या॑य ।
अ॒हम॒पो अ॑नयं वावशा॒ना मम॑ दे॒वासो॒ अनु॒ केत॑मायन्
a̱haṃ puro̍ mandasā̱no vyai̍ra̱ṃ nava̍ sā̱kaṃ na̍va̱tīḥ śamba̍rasya |
śa̱ta̱ta̱maṃ ve̱śya̍ṃ sa̱rvatā̍tā̱ divo̍dāsamatithi̱gvaṃ yadāva̍m
||3||अ॒हं पुरो॑ मन्दसा॒नो व्यै॑रं॒ नव॑ सा॒कं न॑व॒तीः शम्ब॑रस्य ।
श॒त॒त॒मं वे॒श्यं॑ स॒र्वता॑ता॒ दिवो॑दासमतिथि॒ग्वं यदाव॑म्
pra su ṣa vibhyo̍ maruto̱ vira̍stu̱ pra śye̱naḥ śye̱nebhya̍ āśu̱patvā̍ |
a̱ca̱krayā̱ yat sva̱dhayā̍ supa̱rṇo ha̱vyaṃ bhara̱nmana̍ve de̱vaju̍ṣṭam
||4||प्र सु ष विभ्यो॑ मरुतो॒ विर॑स्तु॒ प्र श्ये॒नः श्ये॒नेभ्य॑ आशु॒पत्वा॑ ।
अ॒च॒क्रया॒ यत् स्व॒धया॑ सुप॒र्णो ह॒व्यं भर॒न्मन॑वे दे॒वजु॑ष्टम्
bhara̱d yadi̱ virato̱ vevi̍jānaḥ pa̱thoruṇā̱ mano̍javā asarji |
tūya̍ṃ yayau̱ madhu̍nā so̱myeno̱ta śravo̍ vivide śye̱no atra̍
||5||भर॒द् यदि॒ विरतो॒ वेवि॑जानः प॒थोरुणा॒ मनो॑जवा असर्जि ।
तूयं॑ ययौ॒ मधु॑ना सो॒म्येनो॒त श्रवो॑ विविदे श्ये॒नो अत्र॑
ṛ̱jī̱pī śye̱no dada̍māno a̱ṃśuṃ pa̍rā̱vata̍: śaku̱no ma̱ndraṃ mada̍m |
soma̍ṃ bharad dādṛhā̱ṇo de̱vāvā̍n di̱vo a̱muṣmā̱dutta̍rādā̱dāya̍
||6||ऋ॒जी॒पी श्ये॒नो दद॑मानो अं॒शुं प॑रा॒वत॑: शकु॒नो म॒न्द्रं मद॑म् ।
सोमं॑ भरद् दादृहा॒णो दे॒वावा॑न् दि॒वो अ॒मुष्मा॒दुत्त॑रादा॒दाय॑
ā̱dāya̍ śye̱no a̍bhara̱t soma̍ṃ sa̱hasra̍ṃ sa̱vām̐ a̱yuta̍ṃ ca sā̱kam |
atrā̱ pura̍ṃdhirajahā̱darā̍tī̱rmade̱ soma̍sya mū̱rā amū̍raḥ
||7||आ॒दाय॑ श्ये॒नो अ॑भर॒त् सोमं॑ स॒हस्रं॑ स॒वाँ अ॒युतं॑ च सा॒कम् ।
अत्रा॒ पुरं॑धिरजहा॒दरा॑ती॒र्मदे॒ सोम॑स्य मू॒रा अमू॑रः